Read Sidama_Qullaawa _Maxaafa UMI DUDUWO 20 Bible Online

UMI DUDUWO 20 - Sidama_Qullaawa _Maxaafa bible

UMI DUDUWO 20

¹Iyoaabi diru umira badheessu woggara mootoolla olaho fultanno yannara, olanto anga adhe fule Amooni horri. Moote Daawiti kayinni Yerusaalamete gatino. Iyoaabi olanto Raaba Katama doyissite amadduhu gedensaanni qasse diigge huntu.

²Daawiti Amoonootu magani Melooki yinannihu umi aaninni 34 kiilo ikkannohu dilqu kinchi aanaho noo ba'latto haa'ri; iseno Daawiti umi aana worroonni. Katamu giddonnino lowo jajja gudhi.

³Hakko hee'ranno manna magaaze, meesanenna qotto anga wore loosanno gede assi. Amoonootu katamma baalate hee'ranno manni konne looso loosanno gede assi. Hakkunni gedensaanni Daawitinna olantosi baala Yerusaalame higgu.

⁴Shiima yanna gedensaanni Gezeeri heedhanno Filisxeemooti ledo olu kai. Hatte yannara Husha ilaminohu Sibekayi, Refayimi ilama giddonni Siipayi yinanniha mitto haxirigga mancho shii; Filisxeemootuno qeelantu.

⁵Filisxeemootu ledo wolu olino kai. Hatte yannara Yaiiri beetti Elihanaani Gaati ilaminoha Gooliyaadi rodoo Lahiimi shii; urdesi daabbi du'mille wenenchu geeshshiho.

⁶Gaati Katamirano wolu oli kai. Hakko oli giddo lamente angaranna lamente lekkara lee lee qubbe afi'rinohu mittu haxiriggu manchi no. Isino ilama Refayimi sirchooti.

⁷Kuni manchi Israeele hasiisi yannara, iso Daawiti rodii Shaama ilinohu Yoonaataani shiino.

⁸Daawitinna olantosi shitinori kuri sasunku haxiriggooti Gaati manni Refayimi sirchooti.