Read Sidama_Qullaawa _Maxaafa UMI DUDUWO 21 Bible Online

UMI DUDUWO 21 - Sidama_Qullaawa _Maxaafa bible

UMI DUDUWO 21

¹Sheexaanu Israeelete manna qarrisara yee manna kiiranno gede Daawiti kakkayisi.

²Daawitino olu roorricha Iyoaabinna wole olu hajajaano, «Mannu mageeshsha ikkinoro afate hasi'roommona, Daaninni kayissine Bersaabehi geeshsha qaccetenni qacce iillitine Israeelete manna kiirtine mageeshsha ikkinoro daggine kulle"e» yee hajaji.

³Iyoaabi kayinni, «Moote'ya! Kaaliiqi Israeelete olanto kunninni sayise xibbe ero assohe; insa baalunku ate soqqamaanooti. Tenne kayinni mayira heditto? Israeelete mannira sao mayira abbatto?» yiisi.

⁴Moote yiinore wonshanno gede qarrisinosi daafira, Iyoaabi fule ha're manna kiire galagale Yerusaalame higi.

⁵Olama dandaanno manni kiiro gudise Daawitira kulisi. Insano: Israeelete giddonni 1,100,000, Yihudunni qole 470,000 mannaati.

⁶Iyoaabi mootete hajajo makki'rino daafira, Leewinna Biiniyaami ga're dikiirino.

⁷Maganuno Daawiti assino coyira hanqe Israeele qorichishi.

⁸Daawitino, «Togo assa'yanni lowo cubbo loosoommo! Assoommo coyi gowwimmannihona, eeggatena ane soqqamaanchikki sao agurie!» yee Magano huucci'ri.

⁹Hatte yannara Kaaliiqi, Daawiti himanaanchira Gaadira,

¹⁰«Marte Daawiti, ‹Kuneeti doodhattora 3 coye eemmohena hakkuri giddonni mitto doodhi. Anino ati doodhootto coye wonsheemmohe› yiino» yite kulisi yii.

¹¹Gaadino Daawitiwa daye Kaaliiqi yiinosire kulanni,

¹²«Baattote sasu diri hude ubbannotanso, woy sase agana diinu shorrannohetanso, woy sase barra Kaaliiqi sokkaasinchi dhibba abbe Israeelete gobba baala reyotenni ganannota doodhatto? Kaaliiqira masse kuleemmona hanni doodhoottoha kulie» yiisi.

¹³Daawitino Gaadira, «Ani addinta shetoommo. Ikkollana mannu angara eammontenni Kaaliiqi maarannoha ikkino daafira isi qorichishiero woyyate» yee dawari.

¹⁴Kunnira Kaaliiqi Israeelete gobbara lowo dhibba dirriseenna 70,000 manni reyi.

¹⁵Hakkiinni aanche Kaaliiqi Yerusaalame hunanno gede Sokkaasincho soyi. Ikkollana Kaaliiqi mannu shetto lae marare, manna gudanni noo Sokkaasincho, «Xaate ikkinona aguri» yii. Hatte yannara sokkaasinchu Yabuusichu Oorina ayiddumme mule uurre no.

¹⁶Daawitino Yerusaalame ganara anga bise amade gordunna baattote mereero uurre noo sokkaasincho afi. Daawitinna xiddu uddano uddidhe noori Israeelete roorrooti baalu mitteenni baattote aana gombisantu.

¹⁷Daawitino, «Magano, sao anete; manna kiirranni gede assoommohuno aneeti. Kuni manni beebbaataamoho. Kaaliiqa Magano'ya, anenna mini'ya manna qorichishi ikkinnina mannikki aana konne qoomama dirrissooti» yee huucci'ri.

¹⁸Kaaliiqi sokkaasinchi Gaadira, «Daawiti Oorina ayiddumme mare Kaaliiqira kakkalote darga seekkanno gede kulisi» yii.

¹⁹Daawitino Kaaliiqi yiinota macciishshe himanaanchu Gaadi kulinosi gede assara ha'ri.

²⁰Hatte ayiddummera Oorina 4 oososi ledo qamade ga'nanni no. Sokkaasincho affu yannara oososi xooqqe marte maaxantu.

²¹Oorina Daawiti insawa daanni noota afe, ayiddummete giddonni fule baattote aana diriire keere haa'ri.

²²Daawitino, «Qoomamu mannu aaninni hoo'lanno gede Kaaliiqira kakkalote darga seekkeemmona ku'lattoreno eemmohena ayiddummekki hirie» yiisi.

²³Oorinano, «Moote'ya, ayiddumme adhite hedoottore assi; shilqinshanni kakkalora boottano eemmo. Giirateno gide gannanni kutta no; qamadeno haadhe fushshaate assite shiqishi. Kune baalankare oommohe» yiisi.

²⁴Moote Daawiti kayinni, «Dee'ni! Hatto di"ikkanno; baattokki fushshitannore baatummohekkinni diadheemmo. Kaaliiqira calla adhoommoricho dishiqisheemmo» yii.

²⁵Kunnira ayiddumme hirannosi gede Oorinara 600 culkinni[14] seekkinoonni womaashsha uyi.

²⁶Daawiti hakkiicho Kaaliiqira kakkalote darga seekke shilqonnitanna mittimmate kakkalo shiqishi. Kaaliiqano huucci'reenna kakkalo ittanno giira gordunni soye huuccattosira dawaro qolisi.

²⁷Kaaliiqino sokkaasincho, «Bisekki kou giddora qoli» yiisi. Sokkaasinchuno hajajinosi gede assi.

²⁸Kunni garinni Daawiti Kaaliiqi huuccattosi macciishshinosita buuxi. Kunnira Oorina ayiddummera noohura kakkalote darga lede kakkalo shiqishi.

²⁹Hatte yanna geeshsha Muse halallitte gobbara seekkinohu Kaaliiqa magansi'nanni dukkaninna kakkalo shiqinshanni uduunnichi magansi'nanniwa Gebaooni gaari aana no.

³⁰Ikkollana Daawiti, Kaaliiqi sokkaasinchi bise waajjino daafira hakkiira mare Kaaliiqa magansi'ra didandiino.