Read Sidama_Qullaawa _Maxaafa UMI DUDUWO 28 Bible Online

UMI DUDUWO 28 - Sidama_Qullaawa _Maxaafa bible

UMI DUDUWO 28

¹Moote Daawiti Israeelete roorrooti wo'munku Yerusaalamete gamba yitanno gede hajaji. Kunnira ga're ga'rete albisooti, gashshootu looso loossanno roorrooti, kumunna xibbu roorrooti, mootennihanna oososiha jajjanna saada towattannori, hattono mootete mini gashshaano, macca manninna egennantino bagadaano baala hakkiichira gamba yitu.

²Baalunku gamba yituhu gedensaanni Daawiti kae uurre, «Manna'ya hanni macciishshe! Maganinke Kaaliiqi lekkasinni kaxxannohanna hegerera Gondooru Taabooti hee'ranno mine minate qixxaawoommo.

³Ikkollana Maganu, ‹Ati bagadaanchoho; olu giddono lowo manni mundee dunootto. Kunnira Qullaawa Mine ati diminattoe› yiino.

⁴Israeelete Magani Kaaliiqi, Yihudu ga're Israeelete albisa asse doorino; Yihudu giddonnino anni'ya mine doorino; anni'ya ooso giddonnino ane doore Israeele baalate moote assinoe. Ane sirchino moohe hegere geeshsha gashshanno gede coyi'rino.

⁵Anera lowo ooso uyinoe. Insa baalunku giddonni Kaaliiqi gashshoote ikkitinota Israeele baalantera moohanno gede Selemooni doorino» yii.

⁶Qoleno Kaaliiqi, « ‹Qullaawa Mine minannoehunna nafarra seekkannoehu beettikki Selemooniiti. Isi beetto ikkannoe; anino anna ikkeemmosi.

⁷Isi xaante gede wo'manka woyite seera'yanna hajajo'ya seekke agadhiro, gashshootesi geedonniha asseemmo› yiino.

⁸«Xaano manna'ya, Kaaliiqinna mannasi ikkitino songo Israeelennite albaanni Maganinke Kaaliiqi hajajinonkere baala seekkitine agadhitinanni gede kuloommo'ne. Hatto assitiniro, tini dancha baatto utuwa'ne ikkitanno; dagganno ilamarano hegere geeshsha iqqidhinanni» yii.

⁹Daawiti Selemoonira, «Beetto'ya Selemooni! Ane annikki Magano egennatto gede, wo'mu wodaninninna hagiidhitino hedonni soqqamattosi gede kuleemmohe. Isi hedonkenna halchonke baala egennino; isiwa gamba yiittoro, isino atewa gamba yaannohe; agurittosiro kayinni hegere geeshsha agurannohe.

¹⁰Qullaawa Mine minattosi gede Kaaliiqi doorinoheta habbooti; xa ka'e mittu wodaninni jawaatte mini» yiisi.

¹¹Daawiti Selemoonira Qullaawu Mini waalcho, uduunnu minna, giddoyidi kifilla, aliidi kifillanna cubbo agursiinsanniwa Qullaawa Holge minnanni akeeka baala uyisi.

¹²Nafarratenna qooxeessinsara noo kifilla, miinju minenna Kaaliiqira shiqinshanni fushshaate worranni mine minnanni gara wodanisira Ayyaanu worino garinni kulisi.

¹³Daawiti qeesootahonna Leewaawootaho addi addi looso uyinanni gara, Qullaawa Mine assinanni coyenna Kaaliiqa magansi'nanni woyitira ikkanno uduunne amandanni gara kulisi.

¹⁴Addi addi hajora ikkanno uduunne seekkate mageeshshi birrinna mageeshshi culki ikkannorono kulisi.

¹⁵Culkunni seekkinannihunna birrunni seekkinannihu caabbicho worranni uduunnichi,

¹⁶qullaawa tima worranni xarapheezza seekkinanni culkinna wole xarapheeyye seekkinanni birri mageeshsha ikkannoro kulisi.

¹⁷Maalu qarabba, dissitta, manqorqorranna saanna seekkate ikkannoha fila culkanna birra uyi.

¹⁸Hattono hixaana giirranni uduunnichonna qoollansa Kaaliiqi Taabooti Gondoorunnihu iimaanni diriirsitannota kirubeeli misilla worranni lami-qale seekkate filu culki mageeshshihu hasiisannoro kulisi.

¹⁹Moote Daawiti qole, «Kuni baalunku Kaaliiqi loonsanni gede borrotenni uyinoe akeekaati» yii.

²⁰Moote Daawiti beettisi Selemoonira, «Mitte giddohanna muratoottoha ikki; waajjittokkinninna wolqa baittokkinni looso hanafi. Soqqameemmosihu Magani'ya Kaaliiqi ledokki no. Isi Qullaawa Minesi minte gudatto geeshsha atewiinni dibaxxanno; diagurannohe.

²¹Qullaawu Mini soqqansho baalantera qeesootanna Leewaawoota worroonni. Addi addi ogimma afi'rino manni baalu looso baala kaa'lahera baxe no. Roorrootunna mannu baalu hajajokki baala wonshanno» yiisi.