Read Sidama_Qullaawa _Maxaafa UMI DUDUWO 29 Bible Online

UMI DUDUWO 29 - Sidama_Qullaawa _Maxaafa bible

UMI DUDUWO 29

¹Moote Daawiti songe noo manni baalaho, «Kune Kaaliiqi doorinohu beetti'ya Selemooni shiimaho; togoo loosono loose diegennino. Kuni minnanni mini kayinni mannaho minnanniha mootete mine ikkikkinni Maganonke Kaaliiqa magansi'nanniho. Kunnira loonsanni loosi lowo geeshsha wolqaataamoho.

²Anino danduummo geeshsha Qullaawa Mine minate culka, birra, camo, siwiila, haqqe, dilqa kinna, ilka, seesu kinnanna lowota cululluqa kinna gamba assoommo.

³Kuri qixxeessoommori gobbaanni, Maganu Minira laalaatoommo daafira umi'ya jajji giddonni lowo birranna culka oommo.

⁴Kunni garinni 100,000 kiilo ikkannoha fila culkanna 240,000 kiilo ikkannoha fila birra Qullaawu Mini xarra biifisatenna

⁵angate ogimma afidhinori seekkitanno uduunnira ikkanno gede oommo. Techo ki'ne giddonni wodanisinni baxe Kaaliiqira aannohu wolu ayeti?» yii.

⁶Hakkunni gedensaanni boosaallu boosaallu roorrooti, ga're ga'rete albisooti, kumunna xibbu hajajaanonna gobbate gashshaano,

⁷170,000 kiilo saino culka, 620,000 ikkitanno camo, 340,000 kiilo ikkanno birranna 3,400,000 kiilo rooranno siwiila aate qixxaabbu.

⁸Dilqa kinna afidhinori, Leewaawichu Gershooni boosaallo ikkinohu Yihieeli towatannohura Qullaawu Minira miinja ikkanno gede afansha assite uyitu.

⁹Mannu Kaaliiqira afansha baxe wo'mu wodaninni uyi. Lowo jajji gamba yiino daafira hagiidhitu; moote Daawitino lowo geeshsha hagiidhi.

¹⁰Daawiti hattenne songo baalate albaanni Kaaliiqa, «Albi awurinke Yaiqoobi Magano Kaaliiqa, hegerenni hegere geeshsha galatu atera iillohe!

¹¹Ati jawahonna wolqaataamoho; ati ayirrinyu, xummenna gaamaarre wo'mitinoheho; gordohonna baattote aana noori baalu ateho; ati wo'munkura aliidihonna wo'munku aana roorre afi'rootto mooteeti.

¹²Jironna ayirrinye afi'nannihu atewiinniiti; wo'manka gashshoottohu ateeti; wolqanna jawaante angakki no. Ati manna jawaatanna wolqaataamo assa dandaatto.

¹³Maganonke, ninke xa ate galanteemmohe; ayirrado su'makkino guwinseemmo.

¹⁴«Baalankare oottonkehu ateeti; aninna manni'ya kageeshsha hige maminni abbinoommo? Atenkalla qolle uyinoommohe.

¹⁵Kaaliiqa'ya, akaakkanke baalante gede ninkeno tenne gobbara wosinchimma hee'neemmoreeti. Dirinke caalu gede mulenni sa"annoho; ninkeno reyinummokkinni diganteemmoreeti.

¹⁶Kaaliiqa Maganonke, konne baala jajja gamba assinoommohu qullaawu su'mikkira Qullaawa Mine minateeti. Ikkollana baalunku ateho; ninkerano atilla oottonke.

¹⁷Ati mannu baalunku wodana fonqolte la'e, ammanamino manninni hagiidhattota afoommo. Konne baala atera baxe oommohehu, halaalunniitinna taalotenniiti. Qoleno konne gamba yee noohu mannikki atera afansha aatenni lowo geeshsha hagiidhinota afoommo.

¹⁸Akaakkanke Abirihaami, Yisihaaqinna Yaiqoobi Magano Kaaliiqa, mannakki wo'manka woyite kunni garinni hagiidhanni aannoha assi; wo'manka woyite atera ammanaminoha assi.

¹⁹Beetti'ya Selemoonino hajajatto hajajo, wodhonna woga baala wo'mu wodaninni wonshanno gedenna kuri qixxeessoommori baalunkunni Qullaawa Mine minate ka"anno gede assi» yii.

²⁰Hakkunni gedensaanni Daawiti manna, «Magano'ne Kaaliiqa galatte!» yii. Gamba yee noo manni baalu akaakkansa Magano Kaaliiqa galati. Baattote aana gombisame Kaaliiqira kumbuuli; mooteteno ayirrinye uyi.

²¹Layinki soodo lowo saada gorrite Kaaliiqira kakkalo shiqishshu. Hakkunni gedensaanni mannu itanno gede uyitu. Qolteno 1,000 bootta, 1,000 ge'reewu goccanna 1,000 ge'reewu wilii'le gorrite gudinse shilqinshanni kakkalo assite shiqishshu; woyinete xajjeno fushshaate assite shiqishshu.

²²Kunni garinni hakko barra Kaaliiqi albaanni ittanninna agganni lowo geeshsha hagiidhitanni hossu. Selemooni moote ikkinotano lallabbe egensiissu. Kaaliiqi su'minni ejersu zayite umoho dunte moohissusi. Saadooqino buurte qeesicha assidhu.

²³Kunni garinni Selemooni annisi darga amade moohi. Isino baalunku coyi qiniinosi moote ikki; Israeelete manni baalunku hajajamisi.

²⁴Roorrootunna olanto baala wolootu Daawiti ooso nafa gattukkinni moote Selemoonira ammanante heedhannota egensiissu.

²⁵Kaaliiqi gobbate manni baalu aana Selemooni ayirrado assisi; isira albaanni mookkinoti Israeelete mootoolla afidhinokkiha mootimmate ayirrinye uyisi.

²⁶Isseyi beetti Daawiti Israeele baalate moohino.

²⁷Kebirooni 7, Yerusaalamete 33, mitteenni 40 diro gashshino.

²⁸Lowo jironna ayirrinye afi're dirono duuwe reyino. Beettisi Selemooni isi darga amade moohino.

²⁹Uminni kayisse jeefote geeshsha nooti moote Daawiti dhagge 3 himanaano: Saamueeli, Naataaninna Gaadi borreessitino maxaaffa giddo no.

³⁰Daawiti gashshino gara, mageeshshi wolqa noosiro, isi, Israeeletenna qooxeessinsara noo mootoolla baalate aana ikkino coye tenne maxaaffa giddo borreessinoonni.