Read Sidama_Qullaawa _Maxaafa LAYINKI DUDUWO 1 Bible Online

LAYINKI DUDUWO 1 - Sidama_Qullaawa _Maxaafa bible

LAYINKI DUDUWO 1

¹Daawiti beetti moote Selemooni gashshootesi gudise angara qo'li. Maganisi Kaaliiqino ledosi hee're, lowo geeshsha maccaha assinosi.

²Moote Selemooni Israeelete manna baalanka, kumunna xibbu roorroota, qoleno gashshootisi giddo noo roorrootanna boosaallu boosaallunkunni jawa baala,

³ledosi Gebaooni gaarira noo darga magansi'nanniwa ha'ranno gede hajaji. Hakkiichira hadhinohuno, Kaaliiqi soqqamaanchi Muse halallitte gobbara seekkinohu Maganunnihu Xaadu Dukkani Gebaooni noo daafiraati.

⁴Hatte yannara Maganu Taabooti moote Daawiti Qiriyaati-Yiariiminni abbe Yerusaalamete qixxeesse worino dukkani giddo no.

⁵Ikkollana Huuri beetti Uuri ilinohu Baasilaeeli camotenni seekkinohu kakkalote uduunnichino Gebaooni Qullaawu Dukkanira albaanni no. Selemooninna mannu baalu hakkiicho Kaaliiqira kumbuuli.

⁶Selemoonino Kaaliiqa magansi'nanniwa Xaadu Dukkanira albaanni noohura camotenni seekkinoonni uduunnichi kakkalonnihu aana kakkalo shiqishe Kaaliiqira kumbuuli. 1,000 saada gorrisiise shilqinshanni gede assi.

⁷Hakko hashsha Maganu Selemoonira leelle, «Maa aammohera hasi'ratto» yee xa'misi.

⁸Selemooni qole, «Anna'ya Daawiti bagamannokki baxillinni baxoottosi. Kune aneno anni'ya darga amade mooheemmo gede assoottoe.

⁹Kaaliiqa Magano'ya! Anni'ya Daawitira ootto hexxo wo'mitanno gede assi. Kuneeti kiirre fullannikki gosara moote assoottoe.

¹⁰Kunnira mannakki taashshe gashsha dandeemmo gede hayyonna egenno uyie. Hakkunni ka'a kayinni konne bati'ra mannakki hiitto asse gashsheemmo?» yii.

¹¹Maganu Selemoonira, «Umikkira jironna qiniite woy ayirrinye woy diinikki reyo woy seeda diro ikkikkinni, moohisoommohe manna gashshattota hayyonna egenno aammohera xa'mi'rootto.

¹²Kunnira xa'mi'rootto hayyonna egenno eemmohe. Qoleno xaa geeshsha aye mooteno afi're egenninokkitanna kunni ka'ano afi'rara dandaannokki jiro, qiniitenna ayirrinye eemmohe» yiisi.

¹³Selemoonino Xaadu Dukkani noowiinni magansi'nanni darginni Gebaooninni kae Yerusaalame ha'ri. Yerusaalame teesso assi're Israeelete manna gashshi.

¹⁴Selemooni 1,400 faradi gaarenna 12,000 farado qixxeessi'rino. Insa giddonnino gamisa Yerusaalamete, gattinore qole wole katammara heedhanno gede assi.

¹⁵Selemooni yannara Yerusaalamete culkanna birra bati'reenna kinchimma kiirroonni. Libaanoosi daguwano, base baalate fultino odahe gede assine kiirroonni.

¹⁶ Selemoonira farado Gibitsetenninna Qewe yinanni gobbanni abbinoonnisi. Daddalaasinesino Qewenni marte hirtinosi.

¹⁷Gibitsetenni mitte mitte faradi gaare 600 kinchu birrinni, mitto mitto farashsho 150 kinchu birrinni hirtino. Insano qolte Hitootunna Sooriyootu mootoollara hirtino.