Read Sidama_Qullaawa _Maxaafa LAYINKI DUDUWO 10 Bible Online

LAYINKI DUDUWO 10 - Sidama_Qullaawa _Maxaafa bible

LAYINKI DUDUWO 10

¹Mitto barra Roobiaami Sekeemi ha'ri. Hakkiicho aliyye Israeele manni iso moohisara gamba yee agare no.

²Naabaaxi beetti Iyorbiaami Selemooni waajje Gibitsete maaxame noowiinni konne duduwo macciishshe galagale Israeele higi.

³Aliyye Israeeleno manna sokke Iyorbiaami abbisiissu. Hakkunni gedensaanni isinna Israeelete manni Roobiaamiwa marte,

⁴«Annikki Selemooni lowo duha duhisiise gadadisinonke. Xa ati kayinni konne duha aaninni shaashshittonkero atera soqqammeemmohe» yitusi.

⁵Roobiaamino, «Maahoyye qoleemmo'nena, sasu barri gedensaanni galagaltine higge» yiinsa. Mannuno fule ha'ri.

⁶Hakkunni gedensaanni moote Roobiaami annisira Selemoonira mala aanno geerra gamba asse, «Kunni mannira mayee dawaro?» yee mala xa'mi'ri.

⁷Geerruno, «Kunni mannira shaqqittonsaro, hagiirsiisittonsaronna labbanno dawaro qolittonsaro wo'manka woyite ammaname gashshamannohe» yiisi.

⁸Roobiaami kayinni geerru mala mishe, darawosi ikkitinoriwa, mala uyitannosi wedelliwa mare,

⁹«Ki'ne uyitinannie mali maati? Duha shaashshammonsara xa'mi'ranno mannira mayee qolo?» yee xa'mi.

¹⁰Insano dawarte, « ‹Annikki Selemooni lowo duha duhisiisinonke. Xa kayinni ati konne duha shaashshinke› yee qarra kalaqi mannira, ‹Anehu shiimiidi angichi du'mille anni'ya hallo rooranno!

¹¹Anni'ya lowo duha duhisiise gadidisino'ne. Ani kayinni hakkiinni saino duha duhisiiseemmo'ne. Anni'ya halangetenni ganino'ne. Ani kayinni haffarraame lichenni ganeemmo'ne› yiinsa» yitusi.

¹²Sasu barri gedensaanni, Iyorbiaaminna mannu baalu Roobiaami uyinonsa dinye garinni galagalte isiwa daggu.

¹³Moote Roobiaami geerru kultinosi mala facci asse agure mannaho kaajjado qolo qoli.

¹⁴Darawosi uyitinosi mali garinni, «Anni'ya lowo duha duhisiisino'ne. Ani kayinni hakkiinni saino duha duhisiiseemmo'ne. Anni'ya halangetenni ganino'ne. Ani kayinni haffarraame lichenni ganeemmo'ne» yiinsa.

¹⁵Kuni coyi ikkinohuno, Maganu Seelonni dayino himanaanchi Akiya widoonni qole Naabaaxi beettira Iyorbiaamira coyi'rino coyi wo'manno gedeeti. Moote Roobiaami mannu yiinota macciishsha giwinohuno kunniraati.

¹⁶Israeelete manni baalu Roobiaami coyensa haa'ra giwinota afihu gedensaanni, «Daawitinna sirchisi ho'lonke! Insa ninkera ma"assite egentinonke? Israeele, qae qaekki higi! Roobiaamino woyyannosire ma'lo!» yee lallawi. Insano qae qaensa higgu.

¹⁷Roobiaamino Yihudaho hee'ranno manni callaho moohi.

¹⁸Hakkunni gedensaanni Roobiaami wolqate looso loosiisannoha Adooniraami Israeelete manniwa soyi. Israeele kayinni iso kinnatenni gante shitu. Roobiaami rahe faradi gaare gidde Yerusaalame xooqe bai.

¹⁹Hatte yannanni kayise techo geeshsha aliyye Israeele Daawiti mini gashshoote gibbino gedeenni heedhanno.