Read Sidama_Qullaawa _Maxaafa LAYINKI DUDUWO 11 Bible Online

LAYINKI DUDUWO 11 - Sidama_Qullaawa _Maxaafa bible

LAYINKI DUDUWO 11

¹Roobiaami Yerusaalame iillihu gedensaanni, Israeelete ga're baala qase qo'lara hedino daafira, Yihudunninna Biiniyaami ga'renni 180,000 olanto woshshe mittowa gamba assi.

²Ikkollana Kaaliiqi himanaanchu Shemaiya widoonni qole,

³«Moote Roobiaamira, Yihudunna Biiniyaami ga're baalantera,

⁴‹Roduuwi'ne Israeelete aana bala tugginoonte; baalunku mini mini'nera higge. Konne coye assoommohu aneeti› yiino yite kulinsa» yii. Insano Kaaliiqi yiino coye macciishshite mini mininsara higgu.

⁵Roobiaami Yerusaalame teesso assi're Yihudunna Biiniyaami katammara qiisho seekki'ri. Katammano:

⁶Beeteliheemi, Etaami, Teqoa,

⁷Beeti-Tsuuri, Sokko, Adulaami,

⁸Gaati, Maaresha, Ziifi,

⁹Adoorayimi, Lakiishi, Azeqa,

¹⁰Tsoria, Ayalooni, Kebirooni yinannireeti.

¹¹Roobiaami tenne katamma jawaachishe qiishi're, mittu mittunku katamira hajajannoha wore sagale, zayitenna woyinete xajje duuni.

¹²Qoleno baalante katammara wonqonna urde duune lowo geeshsha jawaachishi. Kunni garinni Yihudanna Biiniyaami gashshoote umisire assi'ri.

¹³Israeelete gobba baalantera noo qeesootinna Leewaawooti ka'e Yihuda daggu.

¹⁴Leewaawootu saada allaa'litannota baattonsanna jajjansa baala agurte Yihudanna Yerusaalame dagginohu moote Iyorbiaaminna oososi Kaaliiqira qeesimmatenni soqqantannota hooltinonsa daafiraati.

¹⁵Iyorbiaami meichunna bootu misilenni seekkisiisi'rino magannara soqqantannore umisi qeese wodhino.

¹⁶Kunnira, wo'mu wodaninni Israeelete Magano Kaaliiqa magansidhara hasidhannori baalu akaakkansa Maganira Kaaliiqira kakkaltara Leewaawootu hoode Yerusaalame daggu.

¹⁷Kuni coyi Yihudu gashshooti jawaatanno gede assi. Insano 3 diro, Yihudu moote Selemooni beetto Roobiaami kaa'litanni, Daawitinna Selemooni yanna gede ikkite heedhu.

¹⁸Roobiaami Mahalaati yinanni beetto adhino; annise Yarimooti Daawiti beettooti. Amase Abihayili qolte Isseyi beetti Eeliyaabi ilinote.

¹⁹Iseno Yiuushi, Shemaarayanna Zahaami yinannire 3 labballi ooso iltinosi.

²⁰Xaano keeshshe Abeseloomi beetto Maaka adhe, Abiya, Atayi, Ziizanna Sheloomiiti yinannire shoole ooso ili.

²¹Roobiaamira mitteenni 18 meentinna 60 irkote meenti noosi. Insano 28 labballonna 60 seenne ilino. Roobiaami baalunku meenti giddonni Maaka roorse baxanno.

²²Roobiaami Maaka beetto Abiya moote ikkanno gede hasi'rino daafira, roduuwisira roorricha assisi.

²³Roobiaami hayyotenni faro faro qole labballi oososira annimma ee, qiinshoonnitera Yihudunna Biiniyaami katamma baalate shoominsa. Hasidhannore baala ee, lowo seenneno haa'rinsa.