Read Sidama_Qullaawa _Maxaafa LAYINKI DUDUWO 12 Bible Online

LAYINKI DUDUWO 12 - Sidama_Qullaawa _Maxaafa bible

LAYINKI DUDUWO 12

¹Roobiaami gashshootesi jawaachishi'rihu gedensaanni isinna mannisi baalu Kaaliiqi Seera facci assite agurtu.

²Kaaliiqira badhe wodhitino daafira Roobiaami moohihunni ontikki diro Gibitsete moote Shishaaqi Yihuda qasara gaadi.

³Isino 1,200 faradi gaarenna 60,000 farado adhe dayino. Isi ledo Gibitsetenni dayinohu kiiro anfoonnikkihu Liibiyu, Suukinna Itiyophiyu manni no.

⁴Yihudunnita qiinshoonni katamma amade Yerusaalamete geeshsha iilli.

⁵Himanaanchu Shemaiya Shishaaqi waajje Yerusaalamete gamba yite nooriwa Roobiaamiwanna Yihudu roorrootiwa daye, «Kaaliiqi, ‹Ane agurtinoonni daafira anino Shishaaqi angara sayise oommo'ne› yiino» yiinsa.

⁶Roobiaaminna Yihudu roorrooti umonsa shollishshe, «Kaaliiqi assino coyi garaho!» yitu.

⁷Kaaliiqi umonsa shollishshinota afe, Shemaiyara, «Kuneeti cubbonsa ammante umonsano shollishshinona digudeemmonsa. Shishaaqi amadannonsa yannara rahe gatiseemmonsa. Hanqi'ya gudisame Yerusaalamete aana didirranno.

⁸Ikkirono anera soqqamatenna wole gobba mootoollara soqqamate mereero noo badooshshe affanno gede Shishaaqi qeele gashshannonsa» yii.

⁹Kunnira Gibitsete moote Shishaaqi qase Yerusaalame e"e, Qullaawa Minenna mootimmate mine noo jajja baalanna moote Selemooni culkunni seekkisiisino wonqo baala adhe ha'ri.

¹⁰Moote Roobiaami adhantino wonqo darga camote wonqo seekkisiise mootete mine agartannorira ee towattanno gede assi.

¹¹Moote Qullaawu Minira eanno kiiro agaraasine tenne wonqo amaxxite dukkissannosi. Moote ha'rihu gedensaanni massite agaraasinete mine wortanno.

¹²Roobiaami umosi shollishino daafira Kaaliiqi hanqi lowo geeshsha digawajjinosi. Roorenka Yihudaho danchu coyi ikkino.

¹³Roobiaami gashshootesi jawaachishi're Yerusaalamete hee'ri. Moohi waro dirisi 41. Israeelete baatto baalate giddonni Kaaliiqi magansi'nasira dhoodhinoha Yerusaalamete Katama teesso assi're 17 diro gashshino. Amasi ilama Amoonittete. Su'maseno Naima yinanni.

¹⁴Roobiaami Kaaliiqa wo'mu wodaninni hasi'rinokki daafira busha coye assino.

¹⁵Roobiaami assinori hanafotenni goofimarchu geeshsha noori baalu minisi manni ikkito ledo mitteenni himanaanchu Shemaiyanna ajuujaanchu Iddo maxaafi giddo borreessante no. Roobiaaminna Iyorbiaami wo'manka woyite olantanni heedhino.

¹⁶Roobiaami annuwasinte gede reenna, Daawiti Katamira madaarrisi. Beettisi Abiya isi darga amade moohi.