Read Sidama_Qullaawa _Maxaafa LAYINKI DUDUWO 15 Bible Online

LAYINKI DUDUWO 15 - Sidama_Qullaawa _Maxaafa bible

LAYINKI DUDUWO 15

¹Maganu Ayyaani Odeedi beetti Azaariyaasi aana dirri.

²Isino fule Aasanni xaade, «Moote Aasa, ati Yihudunna Biiniyaami ga're baala yeemmo'nere macciishshe! Ki'ne Kaaliiqi ledo heedhiniro, isino ki'ne ledo hee'ranno. Hasidhinisiro afidhinannisi; agurtinisiro kayinni isino aguranno'ne.

³Israeelete manni lowo yanna halaalaancho Magano agure, seerunna rosiisanno qeesichi nookkiha hee'rino.

⁴Qarru amadinsa yannara kayinni, Israeelete Magani Kaaliiqiwa alba higino; hasi'reno afi'rinosi.

⁵Hatte yannara base baalate mannaho qarrunna yaaddo batidhino daafira, fule keere higa mitiimmate.

⁶Maganu aanansa qarranna yaaddo abbino daafira mitte gosa wole gosa, mittu katami wole katama gadidisino.

⁷Ki'ne kayinni daafuri'ne waaga afidhinannina, daafurtinoontena jawaatte!» yiisi.

⁸Aasa himanaanchu Odeedi beetti Azaariyaasi[4] himanino himana macciishshe jawaati. Yihudunna Biiniyaami gobbara gaaraame Efireemi baattora isi amadino katammara noota tiyyi'nannita kaphu maganna baala gudi. Qullaawu Mini nafara nooha Kaaliiqiha kakkalote dargano haaroonsi.

⁹Maganisi Kaaliiqi ledosi noota afe, Efireemi, Minaasenna Simiooni ga'renni lowo manni daye Aasa gashshooti giddo hee'ri. Isino konne manna, Yihudunna Biiniyaami ga're manna baala isiwa daanno gede woshshi.

¹⁰Insano Aasa moohihunni tonaa ontikki diro, sayikki aganira addi addi gobbanni gamba yite Yerusaalame daggu.

¹¹Hatte yannara horrite abbitinoha 700 lalo, 7,000 ge'reewonna me"e Kaaliiqira kakkaltu.

¹²Akaakkansa Magano Kaaliiqa wo'mu wodaninninna wo'ma lubbonni magansi'rate gondooro e'u.

¹³Israeelete Magano Kaaliiqa magansi'rannokkihu ajuno akkaluno, meya labbaahu reyannota egensiissu.

¹⁴Yitino coye wonshitannota egensiisate qoonqonsa naggi assite Kaaliiqi su'minni xaartu. Xurumbanna buudu xurumba ufuuffanni hagiirrensa leellishshu.

¹⁵Yihudu manni konne gondooro wo'mu wodaninsanni eino daafira tashshi yiinonsa. Maganunniwano higgeenna isino higinonsa. Isino yitinore macciishshe wo'manka ragaanni keere uyinonsa.

¹⁶Moote Aasa ahaahesi Maaka Asheerara tiyyi'nanni mokkollo uurrisidhino daafira mootimmatenni dirrisise. Mokkollono cancani. Butukono gamba asse Qedirooni Lagichira masse giiri.

¹⁷Aasa kaphu maganna magansi'nannita gaarrate aana noo darguwa co'o asse huna hoogirono, lubbotenni noo geeshsha Kaaliiqira ammaname hee'rino.

¹⁸Isinna annisi Abiya Maganoho baddinoha culkunna birru uduunne baala masse Qullaawa Mine worino.

¹⁹Aasa moohihunni sajjiina ontikki dirisi geeshsha gobbasira olu dino.