Read Sidama_Qullaawa _Maxaafa LAYINKI DUDUWO 19 Bible Online

LAYINKI DUDUWO 19 - Sidama_Qullaawa _Maxaafa bible

LAYINKI DUDUWO 19

¹Yihudu moote Iyosaafiixi Yerusaalame mootimmasi minira keerunni higeenna,

²himanaanchu Hanaani beetti Iyu fule isinni xaade, «Bushuulle kaa'lanna Kaaliiqa gibbannorira ha'la danchateni? Kuni assootto coyi, Kaaliiqi hanqi aanakki dirranno gede assino.

³Ikkirono giddokki danchu coyi no. Asheera mokkollo gobbakki aaninni hunte, Maganu hedinore assate diinaggaawootto» yiisi.

⁴Iyosaafiixi Yerusaalame teesso assi'rirono, manna akaakkansa Magani Kaaliiqiwa qolate wodiidinni Bersaabehinni kayise aliyyeenni gaarame Efireemi gobba qacce geeshsha mannu mereero ha'ramino.

⁵Qiinshoonnitera Yihudu katamma baalate daanyuwa wore,

⁶«Coye affinanni yannara wo'manka woyite Kaaliiqi ledo'ne noota qaaggine lowo geeshsha qorophe. Ki'ne yoo yitinannihu Kaaliiqa hagiirsiisate ikkinnina manna hagiirsiisate di"ikkino.

⁷Halaale dawisa, mallaadanna gubbo ita Maganinke Kaaliiqi baxannokki daafira, taalo yoo yiiyye! Maganono waajje!» yiinsa.

⁸Iyosaafiixi Yerusaalamete Kaaliiqi seera sa'annoriha woy seeru hajonni giwantannori coye affanno gede Leewaawoota, qeesootanna Israeelete giddonni boosaallu boosaallu jajjabba hakkiicho wore yoo yitanno gede assi.

⁹Iyosaafiixi qole, «Kaaliiqa waajjatenni, ammanamatenninna taalu wodaninni soqqamme.

¹⁰Katamaho hee'rannohu manni'ne manna shee, woy seera sae, hajajo diige, woganna wodho hune Kaaliiqi aana sao assannokki gede kulle. Hatto assa hoogginiro kayinni hanqisi ki'nenna roduuwi'ne aana dirranno. Hatto assitiniro saotenni gattinanni.

¹¹«Maganittete coye baalanka annimmatenni towatannohu qeesootu qari Amaariyaati. Mannunnita gashshootu hajo baala Ismaeeli beetti Zebaadiya annimmatenni la"anno. Leewaawootu qolte assinanni coye baala towattanno. Waajjitinoontena, jawaattine loosse! Kaaliiqi dancha looso loossannori ledo hee'ro!» yii.