Read Sidama_Qullaawa _Maxaafa LAYINKI DUDUWO 20 Bible Online

LAYINKI DUDUWO 20 - Sidama_Qullaawa _Maxaafa bible

LAYINKI DUDUWO 20

¹Hakkunni gedensaanni Moaabinna Amooni olanto halensa ikkitinori Meunootu[6] ledo Iyosaafiixi qassara fultu.

²Mannu daye Iyosaafiixira, «Ate qassara Reyino Baari widiidinni Edoomi gobbanni lowo olanto daggino. Kuneeti Hatsetsooni Taamaari balaxxe amaddino» yee kulisi. (Hatsetsooni Taamaari Ayini-Gaadira layinki su'maati.)

³Iyosaafiixino lowo geeshsha waajjino daafira yaannosire afate Kaaliiqa huucci'rate hedi. Mannuno ita aga agure Kaaliiqa huuccanno gede Yihuda baalaho lallawi.

⁴Yihudu katammara noo manni baalu kaa'lannonsa gede Kaaliiqa huucci'rara rahe Yerusaalame dayi.

⁵Yerusaalametenna Yihudu manni ledo haaru Qullaawu Mini nafarira gamba yee hee'reenna, moote Iyosaafiixi daye albansaanni uurre,

⁶qoonqosi naggi asse, «Akaakkanke Magano Kaaliiqa, gordoho heedhe gosa baala ati gashshootto; wolqanna roorre angakki no; ittisahera dandaannohu mittuno dino.

⁷Maganonke, mannikki Israeele tenne gobba daggu waro, balaxxe konniicho heedhanno daga fushshite baxillaanchikki Abirihaami sirchira oottohu diateeti?

⁸Mannikki tenne gobbara hee're, ate ayirrinyira Qullaawa Mine minino.

⁹Hatto assinohuno, ‹Qarru amadinkero: Olu kairo, dhibbu woy hude dagguro, ate su'ma woshshinanniwa kunni Minira albaanni dange qarrunni fushshattonke gede huucci'neemmohe. Atino macciishshite gatisattonke› yee hedeeti.

¹⁰«Xa kayinni kune Amooni, Moaabinna Edoomi gosa qassinonke. Akaakkanke Gibitsetenni fultu waro, tenne gosa gobba giddora e'annokki gede ati hoolteenna, gaangaabbe hadhinota ikkinnina insa shite diguddino.

¹¹Insa qoltanni noonke bado kayinni lai! Kune ati iqqa assite oottonke baattonni fushshite huntankera daggino.

¹²Maganonke, tenne gawajjitanni noonketa bati'ra olanto hoo'late ninke wolqa diafi'noommona, ati insa qorichishi! Atewa hinge raara agurranna, assineemmore mittoreno dianfoommo» yii.

¹³Hatte yannara, Yihudu manni baalu meentinsa, oosonsanna qaaqquullinsa ledo Qullaawu Minira albaanni uurre hee'reenna,

¹⁴Kaaliiqi Ayyaani mannu ledo noohura Leewaawichu Zakkaariyaasi beetti Yahazieeli aanira dirri. Yahazieeli Asaafi sirchi giddo Maataaniya, Yi"ieelinna Beenaya ilamaati.

¹⁵ Yahazieelino, «Moote Iyosaafiixi, Yihudunna Yerusaalamete manni baalu macciishshe! Kaaliiqi, ‹Olu ane Maganunniho ikkinnina ki'neha di"ikkinona, hexxo mudhitinoonte; tenne jawa olanto waajjitinoonte.

¹⁶Ga'a Tsiitsi Gaari faro amadde dagganno woyite ki'neno fulle! Insanni Yirueeli halallitte gobba hinge ha'nanni lagichi qaccera xaaddinanni.

¹⁷Konne ola ki'ne diolantinanni; darga darga'ne calla amaddine agarre! Ani Kaaliiqi eemmo'ne qeelle la'inannina. Ki'ne Yihudunna Yerusaalamete manna, huluullantinikkinninna waajjitinikkinni ga'a fultine xaadde. Ani Kaaliiqi ledo'ne hee'reemmona› yiino» yii.

¹⁸Hatte yannara Iyosaafiixi umo heeshshi yee albunni baatto kisanni Kaaliiqi albaanni kumbuuli. Yihudunna Yerusaalamete manni baalunkuno isi ledo kumbuulanni Kaaliiqa magansi'ri.

¹⁹Qehaatinna Qore ilama ikkitino Leewaawootino ka'e uurrite qoonqonsa naggi assite Israeelete Magano Kaaliiqa galattu.

²⁰Mannuno layinki soodo gute kae Teqoa yinanni halallitte ha'ri. Ha'ra hanafanni hee'reenna Iyosaafiixi uurre, «Yihudunna Yerusaalamete manna! Magano'ne Kaaliiqa addaxxitine jawaatte! Qinaanno'nena, himanaanosi yitinoreno ammanne» yiinsa.

²¹Isino mannu ledo amaalamihu gedensaanni faarsaano ayyaannate yannara uddidhanno imaana uddidhe, «Bagamannokkihu baxillisi hegerehona, Kaaliiqa galattesi!» yite faarsitanni olantote albaanni higge hadhanno gede hajaji.

²²Faarsaano faarsa hanaffuta, Kaaliiqi diininsara gara hawiseenna mimmitoho bagado alba qo'litu.

²³Amoonootunna Moaabootuno Edoomoota shite guddu. Edoomoota gudduhu gedensaanni insano mimmitonsa shite guddu.

²⁴Yihudu olanto halallitte gobbara noo roggera heedhe eela qolte la'anno woyite, diininsa mittuno gatikkinni ree goofeenna reeshshinsa waxaaxe nooha affu.

²⁵Iyosaafiixinna mannisino diinu jajja gudhitara hakkiichira martu. Lowo saada, sinqenna bagado, imaananna wole ayirrado uduunne afidhu. Afidhinore gudhitanni heedheennanni 3 barra wo'ma ikki. Ikkollana afidhinori lowo geeshsha bati'rino daafira gurte guda didandiitino.

²⁶Shoolki barra, Baraka[7] Lagichira gamba yite assinonsa coyi baalaho Kaaliiqa galattu. Kunnira hakkonne darga techo geeshsha, Galatu Lagicha yinanni.

²⁷Kaaliiqi diinansa qeeltanno gede assinonsa daafira Yihudunna Yerusaalamete manni baalu Iyosaafiixi albaanni wodhe hagiidhanni Yerusaalame higi.

²⁸Yerusaalame iillitanni heedhenni Maasinqotenni, suusulletenninna xurumbunni faarsitanni Qullaawu Minira e'u.

²⁹Israeelete diina assino gara macciishshitino gosa baala Kaaliiqa waajjitu.

³⁰Kunnira Iyosaafiixi gashshooti keere afi'ri. Maganisino raga baala keere assi.

³¹Iyosaafiixi moohinohu 35 dirisinniiti. Yerusaalame teesso assi're 25 diro gashshino. Shilihi beetto amasi Azuuba yinannite.

³²Iyosaafiixi ka'anna kawa yiikkinni annisi Aasa ha'rino doogo ha're, Kaaliiqi baxanno coye assino.

³³Ikkollana kaphu maganna magansi'rate gaarrate aana seekkinoonni darguwa didiigino. Mannuno akaakkansa Maganiwa wo'mu wodaninni dihigino.

³⁴Iyosaafiixi moohihunni kayise goofimarchu geeshsha assinohu wolu coyino Israeelete mootoollahu gede Hanaani beetti Iyu maxaafira borreessame no.

³⁵Mitte yannara Iyosaafiixi, lowo bunshe loosinohu Israeelete moote Akaaziyaasi ledo namoomino.

³⁶Lamunku mitteenni Etsiyoonigabiiri yinanni malkara jawu baari aanaanni higge hadhanno markabba seekkisiisidhino.

³⁷Maaresha Katamihu Dodawa beetti Elieezeeri Iyosaafiixira, «Akaaziyaasi ledo namoomootto daafira, Kaaliiqi assi'roottore baala diige hunanno» yee himanino. Markabbano hiiqqaqqantu. Daddalohono ha'ra didandiitino.