Read Sidama_Qullaawa _Maxaafa LAYINKI DUDUWO 23 Bible Online

LAYINKI DUDUWO 23 - Sidama_Qullaawa _Maxaafa bible

LAYINKI DUDUWO 23

¹Iyoaasi 6 diro maaxamihu gedensaanni, qeesichu Yoodahe jawaante lexxe, 100 roorroota ikkitinori: Yirohaami beetti Azaariyaasi, Yihohanaani beetti Ismaeeli, Iyoobeedi beetti Azaariyaasi, Adaya beetti Maiseyanna Ziikiri beetti Elishafaaxi kaa'litannosi gede gondooro eessi.

²Insano Yihudu katamma baala hadhe, Leewaawootanna Israeelennita boosaallu boosaallu annuwa haadhe Yerusaalame abbitu.

³Baalunku Qullaawa Mine gamba yite Iyoaasi ledo gondooro e'u. Qeesichu Yoodaheno, «Kaaliiqi Daawiti sirchira uyino hexxo garinni Iyoaasi moohanno.

⁴Xa assitinanniti: Fooliishshote Barra qeesootunna Leewaawootu soqqanshote dagganno woyite insa giddonni sayikki anga ikkitannori Qullaawu Mini waalcho agartanno gede asse.

⁵Wolootu sayikki anga ikkitannori mootete mine agartona. Gattinori sayikki anga ikkitannori qolte Safote Waalcho agartona. Wolu manni baalu Qullaawu Mini nafara gamba yoona.

⁶Soqqanshote bado iillitinonsa qeesootanna Leewaawoota agurranna wolu mittuno eoonke. Insa kayinni keeraa'mitinore ikkitino daafira giddora e'ona. Gatino manni Kaaliiqi hajajo ayirrise gobbaanni hee'rona.

⁷Leewaawootu bagado adhite moote Iyoaasi agartona; isi ha'rannowa baala ledosi hadhona. Qullaawu Minira eannoha baala shinona» yii.

⁸Leewaawootunna Yihudu manni qeesichu Yoodahe yiino hajajo wonshitu. Yoodahe Fooliishshote Barrita soqqanshote bado fushshidhino Leewaawoota diha'risino. Kunnira, agarate bado iillitinonsarinna bado fushshidhinori baalu hakkiicho noo daafira, olu hajajaasine ikkanno geeshshi manna afidhu.

⁹Yoodaheno Qullaawa Mine worreenna heedhannore Daawiti amaxxuwanna wonquwa baala 100 roorrootira uyinsa.

¹⁰Bagado anga adhite noore baala kakkalote dargi widoonni Qullaawu Minira albaanni uurrite moote agartanno gede assi.

¹¹Hakkunni gedensaanni Yoodahe Iyoaasi haa're abbe ayirrinyu ba'latto umoho worisi; gashshootu seera amaddino borrono uyisi. Kunni garinni Yoodahenna oososi Iyoaasi buurte moohissusi. Mannuno qoonqo naggi asse, «Moote, seeda diro moohi!» yee lallawi.

¹²Ataaliyano mannu mootete qeexaa'lanna macciishshite, rakke Qullaawu Minira daggu.

¹³Dagganno woyite mootoollate assinanni seeri garinni moote Iyoaasi Qullaawu Mini waalchira noo mokkollichi mule olu hajajaanonna xurumba ufuuffannori dukkisseenna uurre nooha affu. Hatte yannara mannuno hagiidhe ilillisanni no; xurumba ufuuffannorino ufuuffanni no. Faarsaanono hagiidhite muuziiqu uduunninni iibbishshe albissanni no. Ataaliyano hanqite imaanase darte, «Tini ganote! Tini ganote!» yite cancitu.

¹⁴Yoodahe Qullaawu Mini qoqqowi giddo reyitara hasi'rinokki daafira, olu hajajaano woshshe, «Mereerinni fushshitine abbe! Hoolara hedannoha affiniro shiiyye!» yii.

¹⁵Insano ise haadhe massite mootete mini mule, Faradu Waalchooti yinanniwa shitu.

¹⁶Yoodahe umisi, moote Iyoaasinna mannu Kaaliiqi manna ikkate gondooro eanno gede assi.

¹⁷Hakkunni gedensaanni baalunku marte Ba"aali galma diiggu; kakkalote darganna misilla cancantu. Maataani yinanniha Ba"aali qeesichano kakkalote dargira albaanni shitu.

¹⁸Yoodahe qeesootahonna Leewaawootaho Qullaawu Mini hajara annimma uyinsa. Loosinsano Daawiti hajajino gede soqqamatenna, Muse Seeri garinni Kaaliiqira shilqote kakkalo shiqishate. Hakko garinni muuziiqanna ayyaana ayirrinsanni gara qineessano insa loosooti.

¹⁹Qoleno Yoodahe keeraa'minokki manchi Qullaawu Minira eannokki gede hooltanno agaraasine worino.

²⁰Olu hajajaano, gobbate geerri, 100 roorrootinna gobbate manni baalu Yoodahe ledo moote dukkise Qullaawu Mininni mootete minira haa're ha'ri. Aliidi waalchi widoonni qolte eessite ayirradu barcimira ofollanno gede assitu.

²¹Ataaliya shinoonni daafira, katamuno keere ikkeenna mannu baalunku lowo geeshsha hagiidhi.