Read Sidama_Qullaawa _Maxaafa LAYINKI DUDUWO 24 Bible Online

LAYINKI DUDUWO 24 - Sidama_Qullaawa _Maxaafa bible

LAYINKI DUDUWO 24

¹Iyoaasi moohinohu 7 dirisinniiti. Yerusaalame teesso assi're 40 diro gashshino. Amasi Tsiibiya Bersaabehi Katamira ilantinote.

²Qeesichu Yoodahe lubbotenni noo geeshsha, Iyoaasi Kaaliiqi baxanno coye assanni hee'rino.

³Yoodahe Iyoaasira 2 galte doorinosi; insano labballonna seenne ilinosi.

⁴Iyoaasi moohihunni shiima yanna gedensaanni, Kaaliiqi Mine gatamarara kai.

⁵Qeesenna Leewaawoota gamba asse, «Yihudu katamma martine Israeelete manniwiinni Magani'ne Mini gatamarshi dirunnihura rakkine woxe gamba asse» yee hajaji. Leewaawootu kayinni lashshi assite keeshshitu.

⁶Kunnira moote qeesootu roorricha Yoodahe woshshe, «Kaaliiqi soqqamaanchi Musenna Israeelete songo, Leewaawootu Kaaliiqi Dukkani hajora ikkanno woxe Yihudunninna Yerusaalametenni gamba assitanno gede kulino coye mayira wonshiisha giwitto?» yiisi.

⁷Hatte yannara hattenne busha mancho Ataaliya ooso Qullaawa Mine hunte doofarsite agurtino. Qullaawu Mini uduunneno Ba"aali magansi'rate hajora qiniite assidhino.

⁸Moote Iyoaasi Leewaawoota, woxe worranni saaxine seekkite Qullaawu Minira e'nanni waalchira wortanno gede hajaji.

⁹Insano Israeelete manni halallitte gobbara hee'reenna Maganu soqqamaanchi Muse hajajino garinni fushsho haadhe abbitanno gede Yihudahonna Yerusaalamete lallabbe kultu.

¹⁰Mannunna roorrootu baalu konne coye baxxino daafira, hagiidhite woxe haadhe abbite saaxinete wonshitu.

¹¹Leewaawootu barru barrunkunni saaxine haadhe roorrootunniwa massitu. Mootete mini borreessaanchinna qeesootu roorrichi woxe giddonni haadhe saaxine massite dargaho wortu. Kunni garinni lowo woxe gamba assitu.

¹²Mootenna qeesichu Yoodahe woxe Qullaawa Mine gatamarate annimma uyinoonni mannira uyitu. Insano woxe Qullaawa Mine kincho boccannorira, mine mintannoriranna siwiilanna camo tuntannorira baattu.

¹³Gatamartara worroonniri looso lowo geeshsha jawaattenna quwa ledde loossino. Kunnira Qullaawa Mine albihu garinni seekkite roore jawaachishshu.

¹⁴Mine gatamarreenna gatino woxe massite mootetenna Yoodahera uyitu. Insano hakko woxinni Qullaawu Minira ikkitanno gabattanna addi addiha culkunna birru uduunne hirtu. Yoodahe lubbotenni noo yanna baalantera, Qullaawa Mine shilqote kakkalo kakkallanni keeshshinoonni.

¹⁵Yoodahe lowo geeshsha geedhe 130 diro ikkeennasi reyi.

¹⁶Isono Israeelete mannira, Maganohonna Qullaawu Mini daafira assino galatira Daawiti Katamira nootera mootoollate waammara madaarroonnisi.

¹⁷Yoodahe reyihu gedensaanni, Yihudu roorrooti Iyoaasiwa dagge ayirrinyunni assansara hasidhinore xa'midhu. Isino yitinota macciishshinsa.

¹⁸Kunnira akaakkansa Magani Kaaliiqi Mine magansi'ra agurte, Asheera mokkolloranna misillate kumbuultu. Assitino sao Yihudunna Yerusaalamete mannira Kaaliiqi hanqo abbitu.

¹⁹Kaaliiqino mannu isiwa higanno gede qaagiissitannota himanaano soyino; himanaanono farcidhino. Insa kayinni dimacciishshitino.

²⁰Hakkunni gedensaanni Maganu Ayyaani qeesichu Yoodahe beetti Zakkaariyaasi aanira dayi. Isino mannu albaanni uurre, «Kaaliiqi, ‹Hajajo'ya mayira sa'ini? Umi'ne aana bao mayira abbidhinanni?› yiino'ne. Ki'ne iso agurtinoonni daafira isino ki'ne agurino'ne» yiinsa.

²¹Insa kayinni isira gano gantu. Moote hajajeenna Zakkaariyaasi Qullaawu Mini nafara kinnatenni gante shitu.

²²Iyoaasi Zakkaariyaasi anni Yoodahe assinosi galata hawe beettosi shii. Zakkaariyaasi reyanni hee're, «Assittoe beebbara Kaaliiqi yoohe» yiino.

²³Hakko dirinni birrate aganira Sooriyu olanto gaadde Yihudanna Yerusaalame dagge gashshaano baala shite guddu; lowo jajja gudhite Demaasiqo adhite hadhu.

²⁴Sooriyu olanto kiiro shiimate. Yihudu manni akaakkansa Magano Kaaliiqa agurino daafira, Kaaliiqi lowota Yihudu olanto qeelantanno gede assino. Iyoaasino hakko garinni qorichishino.

²⁵Sooriyootu jaddote mada madiissite hadhuhu gedensaanni, ledosi gashshaano Yoodahe beetti rabbara iso daallasisira goxinowa hee'reenna shitino. Daawiti Katamira madaartinosita ikkinnina mootoollate waammawa dimassitinosi.

²⁶Isira gano gantinori, Amoonitte iltinohu Shimiaati beetti Zabaadinna Moaabitte Shemiriiti iltinohu Yihozabaadiiti.

²⁷Iyoaasi ooso dhagge, isira kulloonnihu lowo himaninna Qullaawa Mine gatamarino gari mootoollate dhagge amadino maxaafira borreessame no. Isi darga beettisi Amesiyaasi moohino.