Read Sidama_Qullaawa _Maxaafa LAYINKI DUDUWO 25 Bible Online

LAYINKI DUDUWO 25 - Sidama_Qullaawa _Maxaafa bible

LAYINKI DUDUWO 25

¹Amesiyaasi moohinohu 25 dirisinniiti. Yerusaalame teesso assi're 29 diro gashshino. Amasi Yihoadaani Yerusaalamete Katamira ilantinote.

²Amesiyaasi roore anga Kaaliiqi baxanno coye assino. Ikkollana diwo'mu wodaninniiti.

³Gashshootesi jawaachishi'rihu gedensaanni, annasi shitino gashshaano baala rabbisi.

⁴Ikkollana Kaaliiqi Muse widoonni qole, «Annuwa oosonsa cubbi daafira, oosonsano annuwate cubbira yine shinoonke; mittu mittunku umisi cubbi callunni reyanno» yiino daafira oosonsa dishiino.

⁵Amesiyaasi Yihudunna Biiniyaami manna gamba asse, boosaallu boosaallunni gaame kumunna xibbu roorroota worinonsa. Kunni garinni gaammoonnihu lemuunna hakkuyi ali diri mannaati. Kiironsa 300,000 mannaati. Insano olaho iillitinoreeti; bagadonna wonqo amandanni garano egentinoreeti.

⁶Qoleno 3,400 kiilo ikkanno birra ee 100,000 Israeelete olanto wodhi.

⁷Ikkollana mittu himanaanchi Amesiyaasiwa daye, «Kaaliiqi aliyye Israeele giddo mittu ledo nafa dinona, insa anga adhite gaadoho fultooti!

⁸Ati insa hexxite gaadattoha ikkirono, qeellanninna qeelammanni gede assannohu Magano ikkino daafira, hadhe wo'mu wodaninni olamittoro nafa, diinikkira sayise aannohe» yiisi.

⁹Amesiyaasino himanaanchoho, «Hatto ikkina, balaxe oommo birri hiikkannoyya?» yee xa'mi. Maganu manchino, «Kaaliiqi hakkiinni roore aahera dandaanno» yee dawarisi.

¹⁰Amesiyaasino kirunni abbi'rino olanto qae qaensa hadhanno gede assi. Insano Yihudu mannira lowo geeshsha hanqite qae qaensa hadhu.

¹¹Hakkunni gedensaanni Amesiyaasi goontetenni wo'me olantosi hoode adhe Maxinete Lagicha ha'ri. Hakkiicho olantosi Edoomootu aana ola fante 10,000 olanto shitu.

¹²Wole 10,000 olantono qafaddu; qafaddinoreno massite kinchu aaninni eela qolte tuggu. Baalunku boonu giddo noo kinna aana ubbe reyite gooffu.

¹³Hakko mereero Amesiyaasi gaadoho ledosi hadhannokki gede hoolino olanto Samaariyunni Beetihorooni mereero noota Yihudu katamma qasse 3,000 manna shitu; lowo jajjano adhitu.

¹⁴Amesiyaasi Edoomoota gude higi yannara, magannansa adhe dayino. Insano maganna assi're uurrisi're magansi'ri; hixaanano giirinsa.

¹⁵Kaaliiqi hanqino Amesiyaasi aana buwi. Kunnira himanaancho soye, «Mannansa ate anganni nafa gatisa dandiitinokki magannara mayira kumbuulitto?» yee xa'misi.

¹⁶Himanaanchu coyi're gudikkinni Amesiyaasi, «Ate mootete amaalaancho mamoote assinummohe? Xa sammi diyaatto? Giwittoro sheemmohe?» yiisi. Himanaanchuno shiima yanna taxxi yiihu gedensaanni, «Konne coye assakkiranna ane amaale adha giwakkira Maganu hunahera kainota afoommo» yii.

¹⁷Hakkunni gedensaanni Amesiyaasi ledosi gashshaano ledo ma'le, Israeelete mootewa Iyu beetti Iyoahaazi ilinohuwa Yoaasiwa manna soye, «Hanni amo albaanni xaande olammona» yee olaho kakkayisisi.

¹⁸Yoaasi kayinni Amesiyaasira, «Mitte higge Libaanoosi Ilaali aana noo qu'muudo hakkiicho noo daguchowa, ‹Beetti'yara beettokki uyie› yite sokka soqqitino. Ikkollana mittu moyichi hakkaanni hige sa"anni hattenne qu'muudo kade tattayisi.

¹⁹Amesiyaasi, Edoomoota qeelootto daafira boo'nootto; gabbi yite mine ofollittoro woyyannohe. Umikkiranna Yihudu mannira bao abbanno coye mayira hasi'ratto?» yiisi.

²⁰Amesiyaasi Yoaasi amaale miteno diyiino. Edoomootu maganna magansi'rasinni, qeelamanno gede hasi'rino daafira Maganu wore agurinosi.

²¹Kunnira Israeelete moote Yoaasi Yihudu moote Amesiyaasi qasara gaadi. Lamunku Yihudaho Beetesaamisi Katamira olaho xaaddu.

²²Yihudu olanto qeelante, xooqqe qae qaensa higgu.

²³Yoaasino Amesiyaasi qafade Yerusaalame haa're ha'ri. Efireemi waalchi maddenni kayise maddete waalchi geeshsha 200 qaafo ikkanno geeshshiwa Yerusaalamete huxxa diigi.

²⁴Qullaawa Mine nooha culkanna birra baala, Abidaara ilama ikkitinori agartannoha Qullaawu Mini uduunnenna mootete mini jajja tajete amandoonni manni ledo mitteenni adhe Samaariya higi.

²⁵Israeelete moote Yoaasi reyihu gedensaanni, Yihudu moote Amesiyaasi 15 diro hee'rino.

²⁶Amesiyaasi assinohu hanafotenni kayise goofimarchu geeshsha noohu wolu coyi baalu Yihudunna Israeelete mootoolla dhagge ledo borreessame no.

²⁷Amesiyaasi Kaaliiqa aguranni hee'reennanni, Yerusaalamete iso shaate gano ganneenna, Lakiishi yinanniwa xooqino. Ikkollana baarigaarrasi hakkiichi geeshsha manna sokke shiishiishshinosi.

²⁸Reeshshasino farashshoho hogobbe Yerusaalame abbite Daawiti Katamira mootoollate waammawa madaartino.