Read Sidama_Qullaawa _Maxaafa LAYINKI DUDUWO 26 Bible Online

LAYINKI DUDUWO 26 - Sidama_Qullaawa _Maxaafa bible

LAYINKI DUDUWO 26

¹Hakkunni gedensaanni Yihudu manni 16 diriha Ooziya annisi Amesiyaasi darga moohisi.

²Amesiyaasi reyihu gedensaanni, Elaati amade galagalche tantane Yihudu ledo xaadisinohu isooti.

³Ooziya 16 dirinni moohe, Yerusaalame teesso assi're 52 diro gashshino. Amasi su'mi Yikooliyaati. Ise ilantinohu Yerusaalameteeti.

⁴Isino annisi Amesiyaasi gede Kaaliiqi baxanno coye assino.

⁵Zakkaariyaasi lubbotenni noo geeshsha, Kaaliiqa waajjanno gede amaalinosi daafira ammaname hee'rino. Ammanamatenni soqqami deerrinni Maganuno maassi'rinosi.

⁶Ooziya Filisxeeme qase Gaati, Yaminiyanna Ashidoodi katamma huxxa diige, Ashidoodi mulenna wole Filisxeemete gashshooti giddo qiishote katamma mi'ni.

⁷Maganu Filisxeemoota, Gurba"aali yinanniwa heedhanno Arabootanna Meunoota qeelanno gede kaa'linosi.

⁸Amoonootuno Ooziyara giwire uyitusi. Wolqaataamo ikkino daafira, duduwisi Gibitsete geeshsha hasaawami.

⁹Ooziya Maddete Waalchira, Lagichu Waalchiranna kinchu huxxi eraminowa qotote shae seekkatenni Yerusaalamete qiishono kaajjishi.

¹⁰Lowo saada noosi daafira, galchimi gaarra hundanna xawoho katamaho gobbaanni qotote shae seekki'rino; wayinnitano lowo bu'a u'mino. Baatto loosi'ra baxanno daafira, gaarrate hundanna shaqqado baattora loosannohunna woyine kaasanno manni noosi.

¹¹Ooziyara olaho qixxaabbe gaamantinoti lowo olanto noosi; olantote kiirono mootete borreessaano Yi"ieelinna Maiseya amaddanno. Hanaaniya mootete mini gashshaano ledoho.

¹²Olanto hajajjannori boosaallu boosaallu annuwa mitteenni 2,600 mannaati.

¹³Insa mootete mini diini ledo gaarantannore jawaata 307,500 bagadaano afidhino urde hajajjanno.

¹⁴Ooziyano olantosi baalantera wonqo, urde, umunnita siwiilu gullee, bagadu qasannokki gede hooltannota gagasu uddano, worbichonna maxxa, corqaayyenna corqaayyetenni ollanni kinna qixxeessino.

¹⁵Yerusaalameteno, angate ogimma rossinori shaetenna katamu huxxi madde aaninni maxxanna jajjabba kinna olate kaa'lanno uduunne seekkitanno gede assi. Isino Maganu kaa'linosi daafira lowo geeshsha jawaati; maccaha ikkasino base baalate duduwantu.

¹⁶Ooziya jawaante afi'rihu gedensaanni hajajamannokkiha ikkino. Hajajama giwasino uwanno gede assitinosi. Hixaana giirranni uduunnichi aana hixaana giirara Qullaawu Minira eatenni Kaaliiqa Maganosi seyatino.

¹⁷Qeesichu Azaariyaasinna mitte giddori 80 qeesooti hoodesi Qullaawu Minira e'e,

¹⁸«Ooziya! Kaaliiqira hixaana giira ate looso di"ikkitino. Konne coye assitara baxxitinore qeesoota Aarooni ooso calla worroonni. Kunnira kawiichinni Qullaawu Darginni fuli. Maganoho Kaaliiqira dihajajamootto; isino dimaassi'rannohe» yitusi.

¹⁹Hixaana giirranni uduunnichi mule kashilo worroonni baccicho anga haa're hixaana giirara uurre noohu Ooziya qeesootaho hanqi. Hakkawoyintenni taraawannohu gogu dhibbi albisi aana leelli.

²⁰Azaariyaasinna wolootu qeesooti albisira fulinore affe, Qullaawu Mininni rahe fulanno gede assitu. Isino Kaaliiqi hanqinosita afe fulate muddami.

²¹Moote Ooziya reya geeshsha taraawannohu gogu dhibbi aanisinni diho'lino. Lagaawino daafira, addi mine hee'rino; Qullaawu Minirano eannokki gede assinoonni. Beettisi Iyoaataami isi darga amade gobba gashshino.

²²Ooziya gashshe hee'ri yannara assinorenna wole coye baala Amootsi beetti himanaanchu Isayaasi borreessino.

²³Ooziyano reenna, mootoollate waamma mule madaarroonnisi. Mootoollate waamma giddo madaara hoongoonnihu taraawannohu gogu dhibbi noosi daafiraati. Beettisi Iyoaataami isi darga amade moohino.