Read Sidama_Qullaawa _Maxaafa LAYINKI DUDUWO 31 Bible Online

LAYINKI DUDUWO 31 - Sidama_Qullaawa _Maxaafa bible

LAYINKI DUDUWO 31

¹Ayyaana ayirrisse ka'uhu gedensaanni, mannu wo'munku Yihudu katamma baala ha're kaphu magannata sooddiyye cancani. Asheera mokkollono hiiqqaqqi. Kakkalonsahanna daga magansidhanno gaarra diigi. Yihudu, Biiniyaami, Efireeminna Minaase gobbara noore kakkalote tulluwa baalano diigi. Hakkunni gedensaanni qae qaensa ha'ri.

²Hiziqiyaasi qeesootanna Leewaawoota umi uminsa looso loossanno gede gaamo gaamo asse wori. Gamisu shilqonnitanna mittimmate kakkalo shiqishshanno; gamisu qolte Qullaawa Mine soqqantanno gede assinoonni. Gattinori qolte Qullaawu Mini waalchuwara Magano guwissanni galattanno.

³Moote Hiziqiyaasi wo'manka woyite soodonna hawarro shiqinshannitera shilqote kakkalora, Fooliishshote Barranna Aganu Leellanno Ayyaanira kakkallanni kakkaloranna Kaaliiqi seerira kulloonni ayyaanna baala ayirrisate ge'reewosinna lalosi uyino.

⁴Qoleno qeesootunna Leewaawootu yannansa gudisse uyite Kaaliiqi Seerira kulloonni coye wonshitanno gede, Yerusaalamete manni insara hasiisannore baala aanno gede hajaji.

⁵ Israeelete manni Hiziqiyaasi yiino coye macciishshanni hee'renni gidunni, haaro woyinete xajjenni, ejersu zayitenni, malawunninna wolu jajji giddonni umiha baala hagiidhanni halashshe abbe uyi. Noonsa jajji baalunku giddonni tonnunni mitte angano abbe uyi.

⁶Yihudu katammara hee'rannohu Ayihudete manni baalu lalonna ge'reewo tonnunni mitte anga uyi. Qolteno Maganinsa Kaaliiqira baddino afansha baala abbite duuntu.

⁷Afansha abba hanaffinohu sayikki aganiraati. Hakkiinni kayisse lamalki agani geeshsha abbite duuntu.

⁸Moote Hiziqiyaasinna ledosi gashshaano dagge duunnoonni afansha la'e, Kaaliiqanna mannasi galattu.

⁹Hiziqiyaasino mannu gamba assino afanshire qeesootanna Leewaawoota xa'mi.

¹⁰Saadooqi ilama ikkinohu qeesootu roorrichi Azaariyaasi, «Mannu Kaaliiqi Minira afansha abba hanafinkunni ikke gatanno geeshshi jajja afi'noommo. Kaaliiqi mannasi maassi'rino daafira kageeshshi jajji gatinonke» yii.

¹¹Hiziqiyaasi Qullaawa Mine gide duunnanniwa qixxeessitanno gede hajaji; mannuno yiino gede assi.

¹²Qoleno mannu afansha, tonnunni mittonna qullaawa afansha baala ammanamatenni abbe eessi. Konaaniya yinanni Leewaawichi annimmatenni uduunne agaranno. Rodiisi Shimi"i qole layinki agaraasinchooti.

¹³Yihieeli, Azaaziya, Nahaati, Asaheeli, Yarimooti, Yozaabaadi, Eelieeli, Yusimaakiya, Mahaatinna Beenayaasi yinanniri tonnu Leewaawooti, moote Hiziqiyaasinna Maganu minira annimma uyinoonnihu Azaariyaasi hajajino garinni Konaaniyanna rodoosi Shimi"i towattanni soqqantannoreeti.

¹⁴Soojjaati waalchi agaraanchira Leewaawichaho Yimina beettira Qorera, banxe Kaaliiqira uyinoonni afansha baala gamba assatenna qeesootahonna Leewaawootaho beehate annimma uyinisi.

¹⁵Ammanamatenni Qorera kaa'litannori Edeni, Miniyaamiini, Iyyaasu, Shemaiya, Amaariyanna Shakaaniya wole qeesootu heedhanno katamma marte, fiixansa ikkitino Leewaawootira loosi loosinsa garinni sagale taashshite beekkunsa.

¹⁶Qolteno barru barrunkunni worroonninsa garinni addi addi looso loossara Qullaawa Mine e'annorira su'minsa ilamate kiiro giddo noorira 30[9] diririranna hakkuyi alirira hatto assite beekkunsa.

¹⁷Qeesootaho looso boosaalli boosaallinsa garinni beenkoonni. Lemuu dirirenna hakkunni ali Leewaawoota qolle loosinsa garinni worroonni.

¹⁸Hakko qeesootinna Leewaawootu umonsa keereensidhe aye soqqanshorano qixxaabbe agara hasiissannonsa daafira, meentinsa, oosonsanna insa anga noo manni baalu mitteenni kiirame no.

¹⁹Hiziqiyaasi qole Yihudu katammara saada allaa'linanni gobbara heedhanno qeesootiranna su'mansa ilamate kiiro taje giddo borreessinoonnirira Aarooni sircho ikkitino labballira sagale beehanno manna worino.

²⁰Moote Hiziqiyaasi Yihudu gobba baalate dancha, taalonna Magano Kaaliiqa hagiirsiisanno coye assino.

²¹Qullaawa Mine loosino looso baalanna Maganu seeranna hajajosi agadhatenni Maganisira wo'mu wodaninni soqqamino daafira assi'rinori qiniinosi.