Read Sidama_Qullaawa _Maxaafa LAYINKI DUDUWO 32 Bible Online

LAYINKI DUDUWO 32 - Sidama_Qullaawa _Maxaafa bible

LAYINKI DUDUWO 32

¹Moote Hiziqiyaasi ammanamatenni Kaaliiqira hajajame lowo coye assihu gedensaanni, Asoori moote Senaakireemi Yihuda horri. Qiinshoonni katamma doyisse amadihu gedensaannino olantosi kinchu huxxa dhoosse e'anno gede hajaji.

²Hiziqiyaasi Senaakireemi Yerusaalame qasara hedinota afe,

³ledosi gashshaanonna roorrootu ledo ma'le katamaho gobbaanni noota bu'anna lolahanno waa cufisiisara kai; insano kaa'litusi.

⁴Kunni garinni, Asoorootu dagge waa afidhannokki gede assate, lowo manni gamba yee bu'anna lolahanni noo waa cufi.

⁵Moote Hiziqiyaasi kinchu huxxa lede kaajjishe iimaanni agarranni sha'a seekki. Gobbaanni qole wole huxxa lede huxxe katama seekke goli. Albi Yerusaalamera soojjaatoonni taashshinoonni darga nooha kinchu huxxano haaroonsi. Qoleno lowoha olu bagadonna wonquwa seekki.

⁶Katamu manna baala olu hajajaano towattanno gede assi. Insano manna katamu huxxi waalchi mule noo xawira gamba assitanno gede hajaje:

⁷«Jawaattinoonnirenna mitte giddore ikke! Asoori mootenna ledosi noota lowo olanto la'ine waajjitinoonte! Wolqa ba'inoonte! Ninke ledo noo wolqa isitenni roorete.

⁸Isi ledo noo wolqa mannunnite. Ninke ledo hee're olamannohunna kaa'lannonkehu kayinni Maganinke Kaaliiqaati» yii. Mannuno mootensa coyi'rino coyinni jawaati.

⁹Shiima yanna gedensaanni Senaakireemi olantosi ledo Lakiishi Katamira qiishi're hee're, Hiziqiyaasiranna ledosi Yerusaalamete noohura Yihudu manni baalaho,

¹⁰«Ani Asoori moote Senaakireemi doyisse hee'reenna Yerusaalamete Katamira keeshsha hasidhinoonnihu aye hexxitineeti?

¹¹Hiziqiyaasi, ‹Maganinke Kaaliiqi Asoori moote anganni gatisannonke› yaanni hudenna goo'ro guddanno'ne gede asse so'risiisa'neraati.

¹²Kunni albaannino Kaaliiqa magansi'nannita qullaawa darguwa diige, Yihudunna Yerusaalamete manni mitto darga calla kakka'lannonna hixaana giidhanno gede assinohuno Hiziqiyaasiiti.

¹³Aninna akaakka'ya kunni albaanni wole gosa assinoommota diaffinoonni? Wole gosa maganna mannansa Asoori moote anganni gatisse egentinoni?

¹⁴Ninke gundoommo maganna giddonni gobbasi gatisinohu mittu maganino nooni? Ki'ne magani anga'yanni hiitto asse gatisanno'ne'ya?

¹⁵Kunnira Hiziqiyaasi hatto yaanni dogoonke'ne; so'risiisoonke'ne. Isi yaannore horonta ammantinoonte! Aye maganino mannasi Asoori moote anganni mitte higeno gatise diegennino. Ki'ne maganino gatise afannokkiti xawoho» yitanno sokka soyi.

¹⁶Asoori gashshaanono Maganu Kaaliiqinna soqqamaanchisi Hiziqiyaasi aana hakkiinni sainoha busha coye coyidhino.

¹⁷Asoori moote, «Wole gosa maganna mannansa anga'yanni gatisse diegentino. Hiziqiyaasi maganino mannasi anga'yanni gatise diafanno» yitannota borrote sokka soye Israeelete Magano Kaaliiqa qussi.

¹⁸Asoori gashshaano kinchu huxxi iima noorira Yerusaalamete mannira Ibiraawootu afiinni qoonqonsa naggi assite coyidhu. Konne assitinohuno manna waajjishiishshe wolqa hunte katama amaddara yiteeti.

¹⁹Mannu angatenni seekkinota wole gobba maganna seyattanno garinni, Yerusaalamete Maganirano seyatte coyidhu.

²⁰Hakkunni gedensaanni moote Hiziqiyaasinna Amootsi beetti himanaanchu Isayaasi kaa'lannonsa gede Magano huuccidhu.

²¹Kaaliiqino sokkaasincho soye Asoori olantonna olu hajajaano gudanno gede assi. Asoori mooteno sholle galagale gobbasi higi. Mitto barra maganosi magansi'ranno darga hee'reenna ilino ooso bisetenni shitusi.

²²Kaaliiqi kunni garinni Hiziqiyaasinna Yerusaalamete manna Asoori moote Senaakireeminna wolu diini anganni gatisinsa. Qooxeessinsara heedhanno gosa ledono keere heedhanno gede assinsa.

²³Lowo manni Kaaliiqira fushshaate, moote Hiziqiyaasira qole afansha haa're Yerusaalame dayi. Hatte yannanni kayise mannu baalu Hiziqiyaasi lowo geeshsha ayirrisisi.

²⁴Hatte yannaranni Hiziqiyaasi dhiwame reyote rahe Kaaliiqa huucci'ri. Isino huuccattosi macciishshe, hursannosita dhaggete malaatinni kulisi.

²⁵Hiziqiyaasi kayinni wodanisira boo'na wo'mite noo daafira, Kaaliiqi assinosi danchummara galata diqolino. Kunninni kainohunni Kaaliiqi hanqi isi, Yihudunna Yerusaalamete manni aana dirri.

²⁶Ikkollana Hiziqiyaasinna Yerusaalamete manni umonsa shollishsheenna, Hiziqiyaasi reyi barri geeshsha Kaaliiqi manna diqorichishino.

²⁷Hiziqiyaasi lowo geeshsha duroo'mi; mannu baaluno ayirrisisi. Isino birra, culka, dilqa kincho, shiilla, wonqonna wole ayirrado uduunne worranni minna mi'ni.

²⁸Qoleno gide, haaro woyinenna ejersu zayite worrannita uduunnu minna, laloho hoowe, ge'reewoho goo'raana seekki'ri.

²⁹Hakkiinnino sae Maganu lalonna ge'reewo, qoleno wole lowo jiro uyinosi daafira, jirosi wodhannota lowo katamma mi'ni.

³⁰Kincho kurkure aleenni noohu Giyooni Xashshi galchimaanni hige lolahe Yerusaalame eanno gede assinohuno Hiziqiyaasiiti. Isira assino coyi baalu qiniinosi.

³¹Ikkollana Baabilooninni sonkoonni manni dhaggete malaati gobbasihu daafira xa'mara dayi yannara, Maganu wodanisi giddo noore fonqole afara yee facci asse agurinosi.

³²Hiziqiyaasi assinohu wolu coyi baalunna Kaaliiqira aamamino gari Amootsi beetti Isayaasi ajuuja amadino maxaafira, qoleno Yihudunna Israeelete mootoolla dhagge amaddino maxaaffara borreessame no.

³³Hiziqiyaasino reenna aleenni nootera Daawiti ilama waammara madaarroonnisi. Yihudunna Yerusaalamete manni baalu fule lowo ayirrinyinni madaarinosi. Beettisi Minaase isi darga moohino.