Read Sidama_Qullaawa _Maxaafa LAYINKI DUDUWO 33 Bible Online

LAYINKI DUDUWO 33 - Sidama_Qullaawa _Maxaafa bible

LAYINKI DUDUWO 33

¹Minaase moohinohu 12 dirisinniiti. Yerusaalame teesso assi're 52 diro gashshino.

²Isi, Israeele gobba amaddu waro Kaaliiqi fushshe huninota tiyyi'nannita dagate woga amade Kaaliiqi giwanno coye assino.

³Annisi Hiziqiyaasi diige huninoha daga magansidhanno darga galagalche seekkino. Ba"aali maganirano kakkallanni darga seekke, Asheera maganorano mokkollo uurrisino; beeddaheno magansi'rino.

⁴ Kaaliiqi, hegerera magansi'nannisi gede doodhino darga Yerusaalamete Qullaawa Mine daganniha kakkalote darga seekkino.

⁵Lamunku Qullaawu Mini nafarchira beeddahe magansi'rate yee kakkalote darga seekki.

⁶Ilino oosono Hinoomi Lagichira shilqote kakkalo asse shiqishi. Qoleno kiilanninna hellee la"anni qaallooletenninna ekera coyishshiishshannori ledo ma'lino. Kunni garinni Kaaliiqa hanqissannota lowo bunshe loosino.

⁷Qullaawa Mine kaphu magani misile worino. Kuni Qullaawu Mini Maganu Daawitiranna beettisi Selemoonira, «Kuni Yerusaalamete noohu Qullaawu Mini ane magansi'nannie gede tonaa lamente Israeelete ga're gobba giddonni doodhoommo dargaati.

⁸Israeelete manni Muse widoonni qole oommo seera, woganna wodho baala seekke agadhiro, akaakkansara oommo gobbanni galagalte fulte hadhanno gede diasseemmonsa» yee coyi'rino.

⁹Minaase kayinni Yihudunna Yerusaalamete manni, Kaaliiqi Israeelete albinni shorre huni gosa assitinohunni roore bunshe loosanno gede assino.

¹⁰Kaaliiqi Minaasenna mannasi qorophisiisino. Insa kayinni dimacciishshitino.

¹¹Kunnira Kaaliiqi Asoori olanto Yihuda horritanno gede assi. Olantono Minaase qafadde sanosira qoroora gante camote cagaagenni usurte Baabilooni haadhe hadhu.

¹²Minaase shetto batidhusita, lowo geeshsha umosi shollishe Maganisi Kaaliiqiwa hige kaa'lannosi gede huucci'ri.

¹³Kaaliiqino woxaratino gara lae galagale Yerusaalame hige gashshanno gede assisi. Minaaseno Kaaliiqi Magano ikkinota lede buuxi.

¹⁴Hakkunni gedensaanni Minaase Daawiti Katamira soojjaatoonni noohura gobbayidi huxxira hojja iima qole ledi. Kuni huxxi Giyooni Xashshira galchimiidinni kae, aliyyeenni Qulxu'mu Waalchi geeshsha iillanno. Qoleno katamu mule nooha Oofeeli Gaarano giddo amadanno. Minaase lede qiinshoonnitera Yihudu katamma baalate mitto mitto olu hajajaancho worino.

¹⁵Minaase wole gosa magannanna isi abbe worinota kaphu magani misile Qullaawu Mininni fushshe huni. Qoleno Qullaawa Mine noo gaariranna Yerusaalamete noota kakkalote darguwa baala diigino. Konne baala hoole katamaho gobbaanni fushshe hunino.

¹⁶Kaaliiqiha kakkalote darga haaroonse, mittimmannihanna galatu fushshaate shiqishi. Yihudu manna baala Israeelete Magano Kaaliiqa magansi'ranno gede hajaji.

¹⁷Mannu wole gaarrara magansi'ra agura hoogiro nafa, kakkalo kayinni Maganinsa Kaaliiqira calla shiqishino.

¹⁸Minaase assinohu wolu coyi baalu, Maganosi huucci'rino huuccatto, himanaano Israeelete Magani Kaaliiqi su'minni kultinosi sokkano Israeelete mootoolla dhagge amadino maxaafira borreessante no.

¹⁹Minaase Kaaliiqa huucci'rino huuccatto, Kaaliiqi qolinosi dawaro, aagintaawara albaanni loosino cubbi, loosinoti addi addi bunshe, isi seekkinoti dagate maganna magansi'nanni darguwanna Asheera mokkollonna magansi'ranno maganna baala himanaanote dhagge amaddino maxaaffara borreessante no.

²⁰Minaaseno reenna mootimmasi mine madaarrisi. Beettisi Amooni isi darga amade moohi.

²¹Amooni moohinohu 22 dirisinniiti. Yerusaalame teesso assi're Yihuda 2 diro gashshino.

²²Annisi Minaase gede isino Kaaliiqi giwanno coye assino; annisi magansi'rino maganna baala magansi'rino; insarano kakkalo shiqishino.

²³Annisi gede gaabbe umosi shollishe Kaaliiqiwa higara dihasi'rino. Annisihunni roorino cubbo loosino.

²⁴Amooni, ledosi gashshaano gano gante mootimmasi mine shitinosi.

²⁵Yihudu mannino Amooni shiture shee, beettosi Iyosiyaasi isi darga moohisino.