Read Sidama_Qullaawa _Maxaafa LAYINKI DUDUWO 34 Bible Online

LAYINKI DUDUWO 34 - Sidama_Qullaawa _Maxaafa bible

LAYINKI DUDUWO 34

¹Iyosiyaasi moohinohu 8 dirisinniiti. Yerusaalame teesso assi're Yihuda 31 diro gashshino.

²Isi Kaaliiqi baxanno coye assino. Ka'a kawa higikkinni albi annisi Daawiti ha'rino doogo ha'rino.

³Iyosiyaasi moohihunni settikki diro, anjenni hee're albi annisiha moote Daawiti Magano Kaaliiqa magansi'ra hanafi. Shoolu diri gedensaanni daga magansidhanno darguwa, Asheera mokkollonna wole misilla baala Yerusaalametenninna Yihudunni guda hanafi.

⁴Isi hajajino manni Ba"aaliha kakkalote darganna mulensa noota hixaana giirranni uduunne gudi. Asheera mokkollonna wole maganna baala cancante buko assite hatte magannara kakkalanno manni moogga aana fincitu.

⁵Iyosiyaasi dagate qeesooti miqqa baala insa magansidhannowa kakkalote darga masse giiri. Kunni garinni Yihudunna Yerusaalame galagalte seeru garinni keeraa'mitanno gede assino.

⁶Aliyyeenni Niftaalemi geeshsha Minaase, Efireeminna Simiooni katamma, qoleno qooxeessaho noo qachuwara hattonni assino.

⁷Aliyye Israeele giddo noota kaphu magannata kakkalote darguwanna Asheera mokkollo baala cancani; kaphu magannano cancane buko assino; hixaana giirrannihanna kakkalote uduunne huni. Hakkunni gedensaanni Yerusaalame higi.

⁸Iyosiyaasi moohihunni tonaa settikki diro, daga magansidhanno magansi'ra hune, gobbanna Qullaawa Mine keereensihu gedensaanni, Qullaawa Mine gatamartanno gede Atsaaliya beetto Saafaani, Yerusaalame gashshe nooha Maiseyanna borreessaancho Iyoahaazi beetto Yoaahi soyi.

⁹Agaraasine ikkitino Leewaawooti Qullaawu Minira gamba assitino woxe baala qeesootu qarira Hiliqiyara uyini. Woxuno Efireeminni, Minaasenni, wolu Israeelete manniwiinni, Yihudunni, Biiniyaaminninna Yerusaalamete manniwiinni gamba assitinoho.

¹⁰Qolteno woxe Qullaawa Mine gatamarate annimma uyinoonnirira 3 mannira uyitu. Annimma uyinirino,

¹¹Yihudu mootoolla, to'ara worte agurtino minna minate ikkitanno kinnanna haqqe hirtanno gede, haqqunni mintannoriranna kinchunni mintannorira uyitu.

¹²Haqqunnirinna kinnanniri loosonsa ammanamatenni loosse guddu. Loosonsa annimmatenni towattinori Meraari boosaallinni Yahaatinna Abidiyu, Qehaati boosaallinni Zakkaariyaasiitinna Meshulaami yinanni Leewaawootaati. (Leewaawootu baalunku muuziiqu uduunninni faarsate ogimma afidhinoreeti.)

¹³Gamisu Leewaawooti uduunne guratenna addi addi looso loosate worroonni manna annimmatenni towattannoreeti. Gattino Leewaawooti kayinni borreessaasinetenna agaraasinete.

¹⁴Gamba assinoonni woxe maanxoonni mininni fushshinanni hee'neenna, qeesichu Hiliqiya Kaaliiqi Musera uyinoha Seeru Maxaafa afi.

¹⁵Isino, «Seeru Maxaafa kawiichinni Qullaawu Mininni afoommo» yee borreessaanchu Saafaanira uyi.

¹⁶Saafaanino maxaafa haa're mootenniwa masse, «Kune hajajoottonkere baala wonshinoommo.

¹⁷Qullaawa Mine noo woxe haa'ne loosanno manniranna loosiissannorira uyinoommo» yii.

¹⁸Qoleno, «Hiliqiya konne maxaafano haa're anera uyino» yii. Maxaafano mootete nabbawisi.

¹⁹Moote Seeru Maxaafa nabbawanna macciishshe, dadillunni uddanosi dari.

²⁰Hakkunni gedensaanni Hiliqiyara, Saafaani beetti Ahiqaamira, Mikaya beetti Abidoonira, mootete mini borreessaanchira Saafaaniranna mootete soqqamaanchira Asayara,

²¹«Martine ane daafira, Israeeletenna Yihudaho gatino manni daafira Kaaliiqa xa'me. Kunni maxaafi giddo noo coyeno seekkitine buuxxe. Akaakkanke Kaaliiqira hajajama gibbino daafiranna kunni maxaafi giddo kulloonni coyeno wonsha hoogginohura Kaaliiqi hanqinonke» yiinsa.

²²Hiliqiyanna ledosi noo manni moote hajajinonsa garinni Yerusaalamete haaro minnoonni minnara heedhannotewa Hulda yinanni himanaanchowa marte sonkoonni coye xa'mituse. Ayiddaannise Shaluumi Harihaasi beetti beetti Tiqiwa ilinoho. Isino Qullaawu Mini uddannara annimma uyinoonnisiho. Insano himanaanchote coye seekkite kultuse.

²³Himanaanchono, «Ki'ne anewa soyi mootera martine,

²⁴‹Ani Kaaliiqi Yihudu mootera nabbambi maxaafi giddo noo rumonni Yerusaalamenna giddose noo manna baala qorichisheemmo.

²⁵Insa ane agurte wole magannara kakkaltino. Angansanni seekkidhino magannanni ane hanqissinoe. Yerusaalamete hanqoommohu hanqi'ya buwannota ikkinnina diqiidanno.

²⁶Mootete daafirano ikkiro, Israeelete Magani Kaaliiqi: Ati hakko maxaafira kulloonni coye macciishshootto.

²⁷Ani Yerusaalamenna giddose noo manna qorichisheemmo gara macciishshitto yannara, umokki shollishshe dadillunni uddanokki darte wi'litanni aagintaawootto. Kunnira huuccattokki macciishshoommo.

²⁸Ati lubbotenni nootto geeshsha Yerusaalame diqorichisheemmo; ati qarra afittokkinni reyatto gede asseemmohe› yiino yitine kullesi» yitunsa. Mannuno tenne sokka haa're moote Iyosiyaasiwa higi.

²⁹Moote Iyosiyaasi Yihudunnihanna Yerusaalamete geerra baala woshshe gamba assi.

³⁰Insano mootete ledo qeesoota, Leewaawootanna wole manna dureeyyenna buxane baala hoodete adhite Qullaawu Minira hadhu. Mooteno Qullaawu Mininni anfi maxaafa gudise mannaho nabbawi.

³¹Iyosiyaasino kae mootete heelliicho mule uurre, wo'mu wodanisinninna wo'ma hedosinni Kaaliiqi yiino gede ikkate hajajosi, wogasinna wodhosi agadhatenni maxaafu giddo borreessinoonni coye wonshate gondooro ei.

³²Hakkunni gedensaanni, Biiniyaaminna Yerusaalamete manni baalu gondooro agadhanno gede xaarsiisi. Kunni garinni Yerusaalamete manni akaakkansa Magani ledo eino gondooro baala wonshi.

³³Moote Iyosiyaasi Israeelete gobbara noota tiyyi'nanni maganna baala gude, mannu Maganinsa Kaaliiqira soqqamanno gede assi. Isi yannara mannu akaakkansa Magani Kaaliiqiwiinni difafino.