Read Sidama_Qullaawa _Maxaafa LAYINKI DUDUWO 35 Bible Online

LAYINKI DUDUWO 35 - Sidama_Qullaawa _Maxaafa bible

LAYINKI DUDUWO 35

¹Iyosiyaasi Yerusaalamete Kaaliiqi ayirrinyira Mararrote Ayyaana ayirrisi. Umi agani eihunni tonaa shoolki barra mannu baalu Mararrote Ayyaana ayirrisate ge'reewu gocca gorri'ri.

²Qeesootaho loossanno looso kule, Qullaawa Mine soqqantanno soqqanshora jawaachishinsa.

³Umonsa Kaaliiqira uyitinorira Israeele baalate rosiisaano ikkitino Leewaawootira, «Qullaawa Gondooru Taaboota Daawiti beetti Selemooni minsiisino Mine worre. Kunni ka'a ki'ne Magani'ne Kaaliiqiranna mannisira Israeelete soqqama agurranna Taaboota dukkine basetenni base sa"a dihasiissanno'ne.

⁴Moote Daawitinna beettisi Selemooni kultino'ne garinni boosaallu boosaallunkunni beehantine Qullaawu Mini soqqanshora darga amadde.

⁵«Ki'ne Leewaawootu, mitto mittonka Israeelete boosaallo kaa'late beehantine qullaawa darga uurre.

⁶Fiixi'ne Israeele Kaaliiqi Muse widoonni qole uyino biddishsha wonshitanno gede umo'ne keereensitine Mararrote Ayyaanira ge'reewu gocca gorre» yii.

⁷Iyosiyaasi Mararrote Ayyaanira shiqishi'ranno gede mannaho umisi lali giddonninna hooffille saadasi giddonni 30,000 ge'reewunna meu wilii'le, qoleno 3,000 woraamma uyino.

⁸Ledosi gashshaanono kakkalote shiqinshanni saada uminsa baxxe mannaho, qeesootahonna Leewaawootaho uyitu. Qullaawu Mini roorrooti: Hiliqiya, Zakkaariyaasinna Yihieeli Mararrote Ayyaanira kakkallanniha 2,600 ge'reewunna meu wilii'le, qolteno 300 woraamma qeesootaho uyitu.

⁹Leewaawootu roorrooti Konaaniyanna roduuwisi: Shemaiyanna Naatinaeeli, qoleno Hashaabiya, Yi"ieelinna Yozaabaadi Leewaawootu Mararrote Ayyaanira kakkaltannoha 5,000 ge'reewunna meu wilii'le, qolteno 500 woraamma uyitu.

¹⁰Mararrote Ayyaana ayirrisate baalankare qixxeessituhu gedensaanni, moote hajajino garinni qeesootunna Leewaawootu darga dargansa amaddu.

¹¹Mararrote Ayyaanira gorrinoonniha ge'reewunna meu wilii'li mundee qeesootu kakkalote darga wixxuhu gedensaanni Leewaawootu dultu.

¹²Kaaliiqi Muse widoonni qole uyino biddishshi garinni, shilqote kakkalora shiqinshoonni saada boosaallu boosaallunkunni kiirroonni mannira beekku. Lalono hatto assitino.

¹³ Leewaawootuno seeru garinni Mararrote Ayyaaniha kakkalote maala du'rishshu. Qullaawa fushshaateno midaanote, kashshotenna afalaalete gaffe rakke mannaho beekku.

¹⁴Hakkunni gedensaanni uminsaranna qeesootaho Aarooni ilamara Mararrote Ayyaani kakkalo qixxeessitu. Konne assitino qeesooti shilqote kakkalonna cooma gudisse shilqishate hashshi geeshsha soqqantanno.

¹⁵Daawiti, Asaafi, Hemaaninna mootete himanaanchi Yidutuni kultino garinni, Asaafi ilama ikkitinori faarsaano, uyinoonninsa darga amaddu. Wolootu Leewaawooti Mararrote Ayyaani kakkalo qixxeessitannonsa daafira, Qullaawu Mini agaraasine dargansa diagurtanno.

¹⁶Moote Iyosiyaasi hajajino garinni Kaaliiqa magansi'rate seera, Mararrote Ayyaana ayirrisanna shilqote kakkalo shiqisha hakko barranni wonshini.

¹⁷ Hakkiicho noo Israeelooti baalu Mararrote Ayyaana ayirrisse, Timu Ayyaanano 7 barra ayirrissu.

¹⁸Himanaanchu Saamueeli yannanni kawa qole Mararrote Ayyaana kunni garinni ayirrinse diegenninoonni. Moote Iyosiyaasi, qeesootu, Leewaawootu, Yihudu, Israeeletenna Yerusaalamete manni xa ayirrissino garinni kunni albaanni noo mootoolla ledo ayirrise diegennino.

¹⁹Konne Ayyaana ayirrinsoonnihu Iyosiyaasi moohihunni tonaa settikki dirooti.

²⁰Moote Iyosiyaasi Qullaawa Mine konne coye baala assihu gedensaanni, Gibitsete moote Nikau Efiraaxisi Wayi mule, Karkemiishi yinanni dargira olantosi adhe dayi. Iyosiyaasino gaaramara fuli.

²¹Nikau kayinni Iyosiyaasira, «Yihudu moote! Anenna ate giwanshiishanno coyi mittuno dino. Ani dayommohu diina'ya qasammoraati ikkinnina ate hase difuloommo. Diina'ya rahe qaseemmo gede Maganu hajajinoe. Maganu ledo'ya noo daafira ittisa hoogittoero danchate. Giwittoro kayinni Maganu hunannohe!» yee sokka soyisi.

²²Iyosiyaasi kayinni isi ledo olamate murci're kai. Maganu Nikau widoonni qole coyi'rinore dimacciishshino. Mootete uddano soorri're wole mancho lawe olamara Megido yinanni xawo fuli.

²³Olu mereero Iyosiyaasi Gibitsete olanto oltino maxxi qasisi. Isino soqqamaanosi, «Jaddote mada madi'roommona olu giddonni haadhine fushshe"e!» yee hajajinsa.

²⁴Insano faradi gaaresi aaninni dirrisse wolete aana worte Yerusaalame haadhe hadhu. Isino hakkiicho reenna mootoollate waammawa madaartusi. Yihudunna Yerusaalamete manni baalu wi'lisi.

²⁵Himanaanchu Ermiyaasino Iyosiyaasira wi'lishshu geewo fushshi. Meentuno labballuno Iyosiyaasi qaage wi'lanno yannara techo geeshsha Ermiyaasi fushshino geewonni wi'lanno. Kuni coyino Israeelete gobbara roso ikki. Tenne geewo Israeelete qurto amadino maxaafi giddo borreessineenna no.

²⁶Iyosiyaasi assinohu wolu coyi baalu, Kaaliiqira noosi baxillinna seerisira hajajamino gari,

²⁷kaimunni goofimarchu geeshsha nooti dhaggesi gattukkinni Israeeletenna Yihudu mootoolla dhagge amadino maxaafira borreessineenna no.