Read Sidama_Qullaawa _Maxaafa LAYINKI DUDUWO 36 Bible Online

LAYINKI DUDUWO 36 - Sidama_Qullaawa _Maxaafa bible

LAYINKI DUDUWO 36

¹Yihudu manni Iyosiyaasi beetto Iyoahaazi doore annisi darga Yerusaalamete moohanno gede assisi.

²Iyoahaazi moohinohu 23 dirisinniiti. Yerusaalame teesso assi're 3 agana gashshino.

³Gibitsete moote Nikau Iyoahaazi mootimmasi aaninni dirrisisi. Yihudu mannino 3,400 kiilo birranna 34 kiilo ikkanno culka gabbaranno gede assi.

⁴ Nikau Iyoahaazi rodoo Eeliyaaqeemi Yihudahonna Yerusaalamete moohisiisi. Su'masino soorre Iyoaaqeemi yii. Iyoahaazi kayinni usuranya asse Gibitse haa're ha'ri.

⁵Iyoaaqeemi moohinohu 25 dirisinniiti. Yerusaalame teesso assi're 11 diro gashshino. Isino Maganisi Kaaliiqi giwanno coye assino.

⁶Baabilooni moote Nabukadanatsoori Yihuda horri. Iyoaaqeemino qafade camote cagaagenni usure Baabilooni gobba haa're ha'ri.

⁷Qoleno Qullaawu Mini uduunne gure haa're ha're masse Baabilooni mootimmasi mine wodhi.

⁸Iyoaaqeemi assinohu wolu coyi baalu, loosino battenna bunshe gattukkinni Israeeletenna Yihudu mootoolla dhagge amadino maxaafira borreessineenna no. Beettisi Yoakiini isi darga amade moohi.

⁹Yoakiini moohinohu 18 dirisinniiti. Yerusaalame teesso assi're 3 agananna 10 barra gashshino. Isino Kaaliiqi giwanno coye assino.

¹⁰ Badheessu agani dayita, moote Nabukadanatsoori Yoakiini usuranya asse Baabilooni haa're ha'ri; Qullaawu Miniha ayirrado uduunneno adhe ha'ri. Hakkunni gedensaanni Yoakiini wosiila[10] Sedeqiyaasi Yihudahonna Yerusaalamete moohisi.

¹¹Sedeqiyaasi moohinohu 21 dirisinniiti. Yerusaalame teesso assi're 11 diro gashshino.

¹²Isino Kaaliiqi giwanno coye assino. Himanaanchu Ermiyaasi Kaaliiqi sokka kulisi yannara shaqqillunni dimacciishshino.

¹³ Moote Nabukadanatsoori ammanamannosi gede Maganu su'minni xaarsiisi'rinohu Sedeqiyaasi aanasi kai. Mokkookke wodana kaajje Israeelete Magani Kaaliiqiwano higa giwi.

¹⁴Qeesootu roorrootinna mannu kaphu maganna magansi'ratenni qooxeessinsara noo gosaha busha ha'ruma hadhanni Kaaliiqira ammanama gibbu. Kaaliiqi keereensinoha Qullaawa Mineno batteessitu.

¹⁵Akaakkansa Magani Kaaliiqi mannanna Qullaawa Mine mararino daafira, himanaano soye marro marro hige qorophisiisa diagurino.

¹⁶Israeelete manni kayinni soyino manna qacifatino; himanaano oso'lanni qaalesino lashshi asse agurino. Kunninni kainohunni gatte affannokkihu Kaaliiqihu lowo hanqi aanansa dirrino.

¹⁷ Kunnira Baabilooni moote gawajjannonsa gede haa're abbi. Baabilooni mooteno Qullaawa Mine noore nafa agurikkinni Yihudunnita aja ooso baala shee gudi. Maganu sayise uyinosi daafira aju akkali, meya labbaahu gatikkinni baalanka mararikkinni gudino.

¹⁸Baabilooni moote Nabukadanatsoori Qullaawu Miniha, mootennihanna ledosi gashshaanoha uduunnu mine soqe noore gudise gobbasi adhe ha'ri.

¹⁹Qullaawa Mine, Yerusaalamete Katama, mootete minna jajjunku ledo giiri; katamunniha kinchu huxxano diigi.

²⁰Bagaduwiinni gattinore baala qafade Baabilooni haa're ha'ri. Hakku mannino Faarisi gashshooti geeshsha, Baabilooni gobbara borojje ikke Nabukadanatsooriranna sirchisira soqqamanni hee'rino.

²¹ Kaaliiqi himanaanchu Ermiyaasi widoonni qole coyi'rino garinni, Fooliishshote Barra ayirrisa gibbino daafira baatto 70 diro hoxxe ikkite, fooliishshidhanno yanna afidhanno.

²²Kaaliiqi himanaanchu Ermiyaasi widoonni qole kulino himani Faarisi moote Qiroosi gashshootira umi diro wo'mino. Kaaliiqi Qiroosi gashshootisi baalunkura lallawa fushshe borrote sokkanni iillishe naggi yitino qoonqonni mannaho xawisanno gede assi.

²³Lallawuno, «Tini Faarisi moote Qiroosi hajajooti. Gordu Magani Kaaliiqi baatto baalate gashshaancho assinoe. Yihudaho Yerusaalamete Katamira isira Qullaawa Mine minammora annimma uyinoe. Kunnira Maganu manni baalunku Yerusaalame hadhe! Magani'ne Kaaliiqi ledo'ne hee'ro!» yaannoho.