Read Sidama_Qullaawa _Maxaafa LAYINKI DUDUWO 6 Bible Online

LAYINKI DUDUWO 6 - Sidama_Qullaawa _Maxaafa bible

LAYINKI DUDUWO 6

¹Hatte yannara Selemooni, «Kaaliiqa! Ati, ‹Kolishshu gomichi giddo hee'reemmo› yootto.

²Xa kayinni ani hegere geeshsha hee'rattoha ayirrado mine minoommohe» yii.

³Israeele baalanti hakkiicho uurrite no. Moote Selemoonino alba insa widira hige, Maganu maassi'rannonsa gede huuccanni,

⁴«Anni'ya Daawitira coyi'rino qaale wonshinohu, Israeelete Magani Kaaliiqi galatamo.

⁵‹Manna'ya Gibitsetenni fushshummo barrinni kayise, su'ma'ya ayirrinsanniha Qullaawa Mine minnanniewa Israeelete baatto baalate giddonni mitto katamano didoodhoommo. Manna'ya Israeele gashshannoha mitto manchono didoodhoommo.

⁶Xa kayinni su'ma'ya ayirrinsanniwa ikkanno gede Yerusaalame, manna'ya Israeele gashshatto gedeno ate Daawiti doodhoommo› yiino» yii.

⁷Hakkiinni aanche Selemooni, «Anni'ya Daawiti Israeelete Magani Kaaliiqira Qullaawa Mine minara hedino.

⁸Kaaliiqi kayinni, ‹Su'ma'ya ayirrinsanni mine minate hedakki danchate;

⁹ikkollana anera mine ati diminattoe. Iloottohu, ate umikki beetti minannoe› yiinosi.

¹⁰«Kuneeti Kaaliiqi coyi'rino coye wonshino; anino Kaaliiqi yiino garinni anni'ya Daawiti darga amade moohoommo. Israeelete Magani Kaaliiqi su'ma ayirrinsanniha Qullaawa Mine minoommo.

¹¹Kaaliiqi Israeelete manni ledo eino gondoorita bocame kinna giddo noo Taabootano hakkiicho woroommo» yii.

¹²Hakkunni gedensaanni Selemooni Israeelete manni baalu noowa kakkalote dargira albaanni huuccattote angasi diriirse uurri.

¹³Selemooni hakkuyira albaanni seendille 5 cigile, hala'linye 5 cigile, hojja 3 cigile ikkannoha dirima camotenni seekkisiise nafaru mereero uurrisino. Isino manna baalaho leellannowa dirimu aana guluphe angasi iima qole gotti asse,

¹⁴«Israeelete Magano Kaaliiqa! Ati callu Maganoho. Gordohono baattoteno ate gedeehu wolu dino. Ati mannikki ledo eootto gondooro agaratto. Co'o yiino wodaninni doogokki hadhannore bagamannokki baxillikkinni baxattonsa.

¹⁵Soqqamaanchikkira Anni'ya Daawitira coyi'rootto coye disoorrootto. Yootto coyi baalu kune techo wo'mino.

¹⁶«Israeelete Magano Kaaliiqa! Xaano soqqamaanchikkira anni'ya Daawitira, ‹Oosokkino atente gede ane albaanni seeri'ya garinni qorophotenni heedhuro, wo'manka woyite sirchikki giddonni ane albaanni Israeelete moohannohu dihooganno› yootto coye wonshi!

¹⁷Xaano Israeelete Magano Kaaliiqa! Soqqamaanchikki Daawitira coyi'rootto coye baala wonshi.

¹⁸«Magano'ya, ati kayinni baattote aana mannu ledo hee'rattoni? Gordunna gordoho aleenni noo gordi nafa haa'rahera didandaanno. Ani minoommohe mini maminni ikkannoheyya?

¹⁹Ikkirono Kaaliiqa Magano'ya, ane soqqamaanchikki huuccattonna eegama'ya lai. Albakkiinni hee're woxarateemmotanna huucci'reemmo huuccatto macciishshie.

²⁰‹Su'ma'ya woshshinanniwaati› yoottowa kunni Qullaawu Mini widira barrano hashshano lai. Ani soqqamaanchikkino kunni Mini widira hige huucci'reemmo huuccatto macciishshie.

²¹Ani soqqamaanchikkinna mannikki Israeeleno alba kunni mini widira hinge huucci'neemmo huuccatto macciishshinke. Gordoho noottowa heedhe macciishshite, saonkeno agurinke.

²²«Mitto mancho wolu aana sao assino yine haa'ne Qullaawa Mine noohuwa kakkalote dargira abbineenna xaare keeraawiro,

²³iima gordoho heedhe macciishshite yaattore yii. Sao assinohu saosi garinni qorichishamanno gede, keeraanchuno keeraa'manno gede assi.

²⁴«Mannikki Israeele sao assite ate hanqisseenna diininsa qeelannonsa woyite, gaabbite ate su'ma woshshitanni eeganturo, kunni Minira dagge saonsa agurattonsa gede umonsa shollishshe huuccidhuhero,

²⁵ati iima gordoho heedhe huuccattonsa macciishshi. Mannikki cubbono agurte, galagalchite insaranna akaakkansara ootto gobba qolinsa.

²⁶«Mannikki sao asseenna xeena ho'lattonsa yannara, insano saonsa agurte albansa kunni Mini widira higge umonsa shollishshe huuccidhuhero,

²⁷ati iima gordoho heedhe macciishshi. Soqqamaanokkiha Israeelete manni cubbo agurinsa. Halaalaancho heeshsho heedhanno gede rosiisinsa. Hakkunni gedensaanni iqqa assite oottonsa baattora xeena gani.

²⁸«Baattote aana hude woy dhibbu daanno woyite, qoleno qorru, shammenna kanchafaru, woy sixu uwanno yannara, woy manna diinu gawajjanno yannara, woy mitte goofonna dhiwanu daanno yannara,

²⁹huuccidhanno huuccatto macciishshinsa. Israeelete manni giddonni ayino lowo geeshsha yaade angasi kayise Qullaawu Mini widira hige huucci'riro,

³⁰gordoho noottowa heedhe macciishshite cubbonsa aguri. Mannu wodanira noo hedo gudisse afoottohu ate callaati. Kunnira mittu mittunkura loosi loosisi garinni uyi.

³¹Kunni garinni mannikki akaakkansara ootto baattora hee'ranno yanna baalantera ate waajjitannorenna doogokki hadhannore ikkitanno.

³²«Wole gobba manchi ate duduwonna mannakki jawaata angakkinninna wolqaataame cigilekkinni assite fushshootto gara macciishshe, magansi'raheranna huucci'rahera kunni minira daanno yannara,

³³gordoho noottowa heedhe huuccattosi macciishshi. Baattote aana hee'ranno manni baalu ate egenne hajajamannohe gede huuccattosi macciishshite hasi'rinore wonshisi. Hatte yannara mannikki Israeelete gede wole gosano kuni ani minoommo Mini ate magansi'nanniha ikkinota affanno.

³⁴«Mannakki diininsa ledo olamara soyatto yannara, heedhuwano heedhe alba kawa doodhootto katamiwanna ani minoommohe Mini widira higge huuccidhanno woyite,

³⁵huuccattonsanna eegamansa gordoho heedhe macciishshite heddinore wonshinsa.

³⁶«So'rannokkihu nookki daafira, mannikki cubbo looseenna hanqite diininsa qeelenna qafade wole xeerto gobba woy mulira haa're ha'rannonsa gede assatto.

³⁷Qafadante noo gobbara heedhe, ‹Cubbo loonsoommo; sao assinoommo; bunshoommo› yite gaabbite aagintaabburo,

³⁸qafadante noowa diininsa gobbara heedhe wo'mu wodaninninna wo'ma lubbonni galagalte aagintaabbe higge akaakkansara ootto baattowa, ati doorootto katamiwanna ani atera minoommo Mini widira higge huuccidhuro,

³⁹iima gordoho heedhe huuccattonsa macciishshite mararinsa. Mannikki cubbo baala aguri.

⁴⁰«Magano'ya ballo xaano, konne darga huucci'neemmo huuccatto illekki la'o; maccakkino macciishshito.

⁴¹Kaaliiqa Magano! Ka'e wolqakki malaate ikkinohu Taabootikki ledo fooliishshi'rattowa amo. Kaaliiqa Magano! Qeesootikki assitannori baalu qinoonsa; mannikkino shaqqillikkinni hagiidho.

⁴² Kaaliiqa Magano! Buurootto moote agurtootisi; soqqamaanchokki Daawiti baxootto baxille qaagi» yii.