Read Sidama_Qullaawa _Maxaafa LAYINKI DUDUWO 7 Bible Online

LAYINKI DUDUWO 7 - Sidama_Qullaawa _Maxaafa bible

LAYINKI DUDUWO 7

¹Selemooni huuccattosi gudanni hee'reennanni gordunni giira dirrite shilqote kakkalonna wole kakkalo ittu. Kaaliiqihu ayirrinyu xawaabbino Mine wo'mi.

²Qullaawa Mine Kaaliiqi ayirrinyi wo'mino daafira qeesootu giddora ea didandiitino.

³Israeelete manni gordunni giira dirritannanna Kaaliiqi ayirrinyino Mine guggushshanna afe, alba hige baattote aana gombisame, Kaaliiqira galata aanni, «Isi shaqqadoho baxillisino hegereho» yii.

⁴Hakkunni gedensaanni moote Selemooninna ledosi noohu Israeelete manni baalu Kaaliiqira kakkalo shiqishi.

⁵Selemooni 22,000 boottanna 120,000 ge'reewonna me"e mittimmate kakkalora shiqishi. Kunni garinni moote Selemooninna Israeele baalanti Maganunniha Qullaawa Mine maassiissu.

⁶Qeesootu hendoonninsa darga uurritu. Leewaawootuno insara albaanni uurrite alba moote Daawiti Kaaliiqa galatate qixxeessinoha muuziiqu uduunne gantanni, «Bagamannokkihu baxillisi hegereho» yitanni Kaaliiqa galattu. Qeesootu xurumba ufuuffanno woyite Israeelete manni baalunku uurre no.

⁷Selemooni Qullaawu Minira albaanni noo nafarchira mereeroho noo darga Kaaliiqira baxxinoha assi. Hakkiinni aanche shilqote kakkalo, gidu fushshaatenna mittimmate kakkalora cooma hakkiicho Kaaliiqira shiqishi. Hatto assinohu camotenni seekkisiisinohu kakkalote uduunnichi konne baalankare haa'rannokki daafiraati.

⁸Hakkiicho Qullaawa Mine Selemooninna Israeelete manni baalu 7 barra Daasu Ayyaana ayirrisi. Aliyyeenni Hamaati lawonni kayise wodiidoonni Gibitsete danni geeshshinni lowo manni dayino.

⁹Kakkalote darga maassidhanni 7 barra keeshshite, ayyaana ayirrisate qolte wole 7 barra keeshshite goofimarchu barra maasso guddu.

¹⁰Lamalki aganira lemiina sayikki barra Selemooni manna qae qaesi ha'ranno gede assi. Mannuno Kaaliiqi Israeelete, Daawitiranna Selemoonira assinohura danchu coyi baalunku daafira hagiidhanni ha'ri.

¹¹Selemooni Qullaawa Minenna mootimmate mine hedino garinni mine gude qineessihu gedensaanni,

¹²Kaaliiqi hashsha isira leelle, «Huuccattokki macciishshoommo; konne Mineno kakkalo shiqinshannie gede doodhoommo.

¹³«Xeena ganannokki gede gordo cufeemmo woyite, woy jajja gudanno kanchafare woy manni'yara dhibba soyemmo yannara,

¹⁴su'mi'yanni woshshaminohu manni'ya umonsa shollishe huucci'riro, eegamironna bunshetewiinni gaabbe higiro, gordoho hee're macciishsheemmonsa. Cubbonsano agureemmo; baattonsano hurseemmo.

¹⁵Konne Mine huucci'nanni huuccatto ille'yanni laeemmo; macca'yanni macciishsheemmo.

¹⁶Hegere geeshsha su'ma'ya woshshinanni gede konne Mine doodhe, qullaawa assoommo. Isono wo'manka woyite ille aanaho wore agareemmo.

¹⁷«Atino annikki Daawiti gede ammanamatenni soqqamittoero, seera'yanna woga'ya agadhite hajajo'ya wonshittoro,

¹⁸annikki Daawitira, ‹Sirchikki giddo Israeelete moohannohu dihooganno› yoommo garinni gashshootekki dhaaweemmo.

¹⁹«Atinna mannikki ane hoode ha'ra agurtine seera'yanna hajajo'ya agadha gibbine wole magannara soqqantinironna insa magansidhiniro kayinni,

²⁰Israeele oommonsa baatto aaninni buqqise huneemmo. Su'mi'yara yee qullaawa assoommoha konne mineno agureemmo. Gobba baalate hee'ranno manni haariimannonna qacifatanno gede asseemmo.

²¹Kuni Mini xa lowo geeshsha ayirradoho; hatte yannara kayinni muleenni hige sa"annohu baalu, ‹Kaaliiqi tenne gobbanna konne mine togo mayira assi› yee mimmito xa'manno.

²²Wolu manni qole, ‹Kaaliiqi tenne bao baala abbinonsahu, Gibitsetenni fushshinonsaha akaakkansa Magano Kaaliiqa agurte wole maganna hoode hadhinohuranna insa magansidhinohuraati. Kaaliiqi tenne baala bao abbinonsahu kunniraati› yee dawaranno» yii.