Read Sidama_Qullaawa _Maxaafa IZIRA 8 Bible Online

IZIRA 8 - Sidama_Qullaawa _Maxaafa bible

IZIRA 8

¹Moote Arxekisiisi gashshooti yannara, Izira ledo Baabilooninni higginori boosaallu boosaallu sooreeyye,

²Finihaasi boosaallinni, Gershoomi, Itaamiiri boosaallinni Daanieeli, Daawiti boosaallinni

³Shakaaniya beetti Haxuushi;

⁴Paariooshi boosaallinni Zakkaariyaasinna ledosi 150 labballi kiirantino. Pohaati-Moaabi boosaallinni Zeraiya beetti Elihoenaayi 200 labballi ledo;

⁵Zaatu boosaallinni Yehizieeli beetti Shakaaniya 300 labballi ledo;

⁶Adiini boosaallinni Yoonaataani beetti Abeedi 50 labballi ledo;

⁷Elaami boosaallinni Ataaliya beetti Yishaiya 70 labballi ledo;

⁸Shefaaxiya boosaallinni Mikaaeeli beetti Zebaadiya 80 labballi ledo;

⁹Iyoaabi boosaallinni Yihieeli beetti Abidiyu 218 labballi ledo;

¹⁰Baani boosaallinni Yosifiya beetti Sheloomiiti 160 labballi ledo;

¹¹Beebayi boosaallinni Beebayi beetti Zakkaariyaasi 28 labballi ledo;

¹²Azigaadi boosaallinni Haqaxaani beetti Yohanaani 110 labballi ledo;

¹³Gede'nite dagginori Adoniqaami boosaallinni Eelifeleexi, Yiueelinna Shemaiya, 60 labballi ledo;

¹⁴Bigiwayi boosaallinni Utayinna Zakuuri, 70 labballi ledo daggino.

¹⁵Ani Izira Ahawa Katama hige ha'ranno wayi mule manna gamba assoommo. Hakkiicho 3 barra keeshshinoommo. Gamba yiino manni giddo qeesoota agurranna mitto Leewaawichano diafoommo.

¹⁶Kunnira, Elieezeeri, Arieeli, Shemaiya, Elinaataani, Yariibi, Elinaataani, Naataani, Zakkaariyaasinna Meshulaami yinannire honse sooreeyye, hattono, Yoyariibinna Elinaataani yinannire 2 rosiisaano anewa dagganno gede woshshiishoommo.

¹⁷Insano Kasifiya yinanni katama gashshe noohuwa Iddowa soommo. Maganinke Mine Yerusaalamete soqqamanno manna sokkannonke gede Kasifiyaho noorira Iddoranna miillasira soommo.

¹⁸Dancha Maganinke anga ledonke noo daafira, Mahiili boosaallinni Israeeli beetti Leewi beetto Sherebiya yinanniha egennaamo mancho, oososinna fiixasi ikkitinori ledo mitteenni 18 manna haadhe abbitunke.

¹⁹Hattono Meraari boosaallinni Hashebiyanna Yishaiya, oosonsanna fiixinsa ledo mitteenni 20 manna haadhe abbitunke.

²⁰Hakkuyi aanano, Daawitinna ledosi gashshaano Leewaawoota kaa'litanno gede wortinore Qullaawu Mini soqqamaano 220 manna abbitu. Kuri baalunku su'mi borreessame no.

²¹Ninkenna oosonke, hattono jajjanke baala agarannonke gedenna ha'neemmo doogo keere assannonke gede, Ahawa Wayi mule Maganinke albaanni umonke shollinshe itanna aga agurre huucci'neemmo gede lallawummo.

²²«Dancha Maganinke anga addaxxitannosiri baalu ledo no. Iso agurtannori aana kayinni hanqisi dirranno» yine mootete kulloommo daafira, doogote diinuwiinni agartannonke gaaddonna faradaano xa'mi'rate saalfatoommo.

²³Kunni daafira, ita aga agurre agarannonke gede Maganonke huucci'noommo. Isino huuccattonke macciishshinonke.

²⁴Anino qara ikkitinori giddonni 12 qeesoota, insaa ledono Sherebiya, Hashebiyanna wole 10 manna doore fushshoommo.

²⁵Moote, amaalaasinesi, roorrootunna hakkiicho noo Israeelooti Maganinke minira uyitinoha birrunnihanna culku uduunne baala keene qeesootaho oommo.

²⁶22,000 kiilo birra, 70 kiilo keenannoha 100 birru uduunne, 3,400 kiilo culka,

²⁷culkunni seekkinoonniri 20 xiltuwa 8 kiilonna 400 giraame ikkitanno. Culkunni seekkinoonni xiltuwa ledo taalo waaga fushshitannoti 2 fila camonni seekkinoonni xiltuwa keene oommo.

²⁸Anino, «Ki'nenna kuni uduunni qullaawootaho; birrunna culkuno annuwa'ne Magani Kaaliiqira banxe shiqinshoonniho.

²⁹Yerusaalamete Kaaliiqi Mini giddo umo ikkitino qeesooti, Leewaawootunna Israeelete mini sooreeyye baalate albaanni keentina geeshsha seekkitine agarre» yoommonsa.

³⁰Hakkunni gedensaanni, qeesootunna Leewaawootu Yerusaalame Maganinke Minira massinara keennoonni birra, culkanna qullaawa uduunne haadhu.

³¹Ninkeno umi aganira tonaa layinki barra Yerusaalame ha'rate Ahawa Wayi mulinni ka'nummo. Maganinke anga ledonke noonte gede, isino diinnankenna doogote gaa'lite agartannonkeriwiinni gatisinke.

³²Yerusaalameno iilline, 3 barra fooliishshi'noommo.

³³Shoolki barra birra, culkanna qullaawa uduunne Maganinke mine keenne Ooriyo beettira qeesichu Merimootira uyinummo. Isi ledo Finihaasi beetti Aliaazaari, Leewaawichu Iyyaasu beetti Yozaabaadinna Binuwi beetti Noaadiya no.

³⁴Baalankare kiirre keenni. Kiirroonnihanna keennoonniha baalanka hakko barranni borreessini.

³⁵Hakkunni gedensaanni, qafadotewiinni higgino Israeele baalanti 12 middo, 96 ge'reewu gocca, 77 aja ge'reewu gocca, Israeelete Maganira shilqote kakkalo assite shiqishshu. Cubbo agursiisate 12 meu gocca shiqishshu. Kuni baalunku Kaaliiqira shilqote kakkalora shiqinshoonniho.

³⁶Moote uyino taje, mootete lekka ikkitinoriranna Efiraaxisi Awuraajji Galchimihura heedhanno gashshaanora uyitu. Insano manna irkissu; Maganu Mini soqqanshono kaa'litu.