Read Sidama_Qullaawa _Maxaafa NEHIMIYA 4 Bible Online

NEHIMIYA 4 - Sidama_Qullaawa _Maxaafa bible

NEHIMIYA 4

¹Ninke Ayihude huxxu looso hananfoommota Sanbalaaxi macciishshe, lowo geeshsha aarami; hifatame xonankera kai.

²Jaallasinna Samaariyu gaaddo albaanni, «Kuri dhukiweelootu Ayihude ma"assitara heddino? Katama galagalchite mintara heddinoni? Kakkalo shiqishatenni looso mittu barrinni guddara dandiitannoha lawannonsani? Huxxaho ikkitanno kinna giirante duunantinote giddonni fushshate dandiita ikka?» yaanni qacifatinsa.

³Mulesi uurre noohu Amoonichu Xobbiyano lede, «Insa mayi huxxa huxxa dandiitanno? Insa huxxi yeedaala nafa giddituro diigamannoho» yaanni coyi'ri.

⁴Anino, «Magano'ya ballo, qacifattannonke gara lai! Tini xononsa uminsara higgo! Jajjinsa baalu adhameenna, insano qafadante manni gobba hadho!

⁵Bushu loosinsa daafira maartootinsa. Diigaminoha huxxinanna xontinonkena, cubbonsa habbooti» yee huucci'rummo.

⁶Ninkeno huxxa uurrinsummokkinni, mannu jawaate huxxanna looso hallo iillinshummo.

⁷Sanbalaaxinna Xobbiya, hattono Arabete, Amooninna Ashidoodi manni galagalchine huxxinanni hee'noommohu Yerusaalamete huxxi goofanni nootanna faro baala beebbanni noota macciishshite, lowo geeshsha aarantu.

⁸Kunnira, mitteenni kaa'lante Yerusaalame qasatenna gawajjate gano gantu.

⁹Ninke kayinni sammi yine Maganonke huucci'noommo. Insa gargarate hashshanna barra uurrite agartanno agaraasineno wodhinummo.

¹⁰Tenne yannara Yihudu manni dadillunni, «Dunkanni loosi daafursinke; hoollanniti diigantino kinna lowote; konne huxxa huxxine guda dandiinammo ikka?» yaanni geewi.

¹¹Diinnanke ninke aana bala tugge shitankeranna loosonke uurrissara dagganno woyite anfeemmonsakkiha lawinonsa.

¹²Kayinnilla, diinnanke mereero heedhanno Ayihudooti tonne higge ninkewa dagganni diinnanke gano gantanni noonke gara kulte qorophisiissinonke.

¹³Kunnira, manninke mereerinni bise, amaxxonna maxxa amadino manna boosaallu boosaallunkunni gamba asse, loosu goofinokki darga baalaho huxxaho badheenni qiishidhanno gede assoommo.

¹⁴Mannu yaadinota afoommohura, insanna albisootansa, woloota roorroota baala, «Diinanke waajjitinoonte; lowo geeshsha jawunna waajjishanno Magani noonketa qaagginanni, fiixi'ne, ooso'ne, meenti'ne, mini'nenna jajji'ne daafira olamme» yuummonsa.

¹⁵Gantinonke gano macciishshinoommotanna Maganuno hedonsa wo'mitannokki gede assinota diinnanke affu. Hakkunni gedensaanni, ninke baalunku huxxa huxxate hingummo.

¹⁶Hattenne yannanni kayise, manni'ya giddonni, gamisu huxxa huxxitu. Gattinori kayinni, olu bagado: Amaxxo amaxxite, wonqo wonqidhe, maxxa quxidhe, agartanno gede assoommo. Albisootinkeno mannaho wo'ma kaa'lo uyitanni,

¹⁷huxxitannore baala kaa'litunsa. Wole agurranna, dukkannorino mitte anganni loossanni, te'e anganni olu bagado amaxxite gargadhate qixxaabbe no.

¹⁸Mittu mittunku bisesi hallisira qodhe hee're huxxanni no; buudu xurumba ufuufe malaatisannohuno muli'yanni dibaxxino.

¹⁹Manna, albisootanna gashshaano, «Huxxu loosi bati'ranna lowo geeshsha hala'lado ikkinohura, mimmitinkewiinni xeerti'rankenni ku'u ku'uyi ledo xaadara didandaanno.

²⁰Xurumbu luulo macciishshitinanni yannara, anewa gamba yiiyye. Maganinke ninke daafira gaaramannonke» yuummonsa.

²¹Kunnira, barra baala soodinni hashsha beeddahe fulta geeshsha, gamu loossanna, gamu olu uduunne qodhite uurrite agartanni no.

²²Hattenne yannara mannaho, «Hashsha katama agarate, barra loosonke yaaddo nookkiha loosa dandiineemmo gede, ki'neno kaa'litanno'nerino hashsha hashsha Yerusaalamete keeshshe» yuummonsa.

²³Anino fiixi'yano, soqqamaano'yano ledo'ya noo agaraasine baalunku, hashsha nafa uddanonke difushshi'noommo. Kunni garinni olu bagadinkeno angankenni diho'lino.