Read Sidama_Qullaawa _Maxaafa NEHIMIYA 5 Bible Online

NEHIMIYA 5 - Sidama_Qullaawa _Maxaafa bible

NEHIMIYA 5

¹Shiima yanna gedensaanni, mannu giddonni lowo meentinna labballu hajajjannore fiixansa Ayihudoota abbooshshidhu.

²Insa giddonni mitu mitu, «Lowo ooso noonke daafira, lubbotenni hee'rate sagale hasi'neemmo» yitu.

³Wolootu qolte, «Amaddinonke hudenni ganteemmo gede, sagale afi'rate yine gatenke, woyinete kaashshonkenna minenke baala amadisiinsoommo» yitu.

⁴Wolootuno qolte, «Gatinkeranna woyinete kaashshinkera gashshootu xa'mannonke giwire aate, woxe liqii'noommo.

⁵Ayihudootu fiixinke ledo sirchinke mittoho. Ninke ooso insatewiinni baxxitinori nooni? Ikkollana, woxeho yine oosonke borojjimmate hira gidde ikkitinonke; seenninke giddonni gamu borojjimmate hirame kaino. Gatinkenna woyinete kaashshinke adhameenna la"annonkehu nookkire hexxo hoongoommore ikkinoommo» yitu.

⁶Anino abbooshshansa macciishshe lowo geeshsha hanqummo.

⁷Konne coye wodani'yanni malummohu gedensaanni, albisootanna roorroota, «Ki'ne umi'ne manniwiinni qallo hiitto adhitinanni? «Mitiimma tirranni doogo hasate manna mitteenni gamba asse,

⁸wole gosara hirantino Ayihudoota fiixanke uminke woxxineemmo gede hende, dandaamannonkere baala assinoommo. Ki'ne kayinni, qoltine umi'ne roduuwa Ayihudoota fiixa'ne borojjimmate hidhitinoonni. Ki'newiinnino hatto assine woxxinammora hasidhinoonni?» yee rufummonsa. Insano dawartannore hoogge sammi yitu.

⁹Ani kayinni lede, «Ki'ne assitinoonni coyi gara di"ikkino! Magano waajjanna taalo coye assa hasiissanno'ne. Hatto assitinoommero, diinnanke wole gosa so'ronke affe diqacifattannonke.

¹⁰Mannu anewiinni woxeno ikko gide liqii'ranno gede fajjoommonsa; fiixi'yanna soqqamaano'yano liqiissitannonsa. ‹Kunni ka'a, liqiidhinoonniha uuyyenke› yine yaa'na heedhoonke.

¹¹Woxeno ikko gide woy woyinenna zayiteno ikkituro liqiissitinoonnire baala agurrensa. Baattonsa, woyinete kaashshonna zayitete haqqe kaansanni gatenna minensa baala xaanni qollensa» yoommo.

¹²Albisootuno, «Yoottonke gede assineemmo; adhinoommoha jajjansa baala qolleemmo. Liqiidhinoreno, ‹Uuyyenke› yine diyaa'nineemmonsa» yite dawartue. Anino qeesoota woshshe, albisootu yitinore wonshate albansaanni xaartanno gede assoommo.

¹³Qodho'ya tire giddo noore baala giggishshe, «Ki'ne giddonni ayino tenne xaaro diigiro, Maganu togo assosi! Minesinna jajjasi haa're hoole mulla anganni gatisosi!» yoommonsa. Hakkiicho noo manni baalu mitto afoo ikke, «Eewanni hatto assosi» yee Kaaliiqa galati. Albisootuno e'ino xaaro wonshitu.

¹⁴Arxekisiisi moohihunni lemiikki dirinni kayise, sajjiina lame diro ikkasi geeshsha, ani Yihuda gashshummo diri tonaa lamunku giddo ayidde'yano ikko ani umi'ya, gobba gashshino mannira maltino sagale di"intoommo.

¹⁵Anera albaanni manna gashshara worroonnihu baalu, mannu aana lowo duha ikke barru baala sagaletenna agattote ikkannoha shoyilloo birra baatisiisino. Gashshaanote soqqamaano nafa manna gadadissino. Ani kayinni, Magano waajjeemmo daafira kunni duuchunku coyinni dikarsamoommo.

¹⁶Nooe wolqa baala Yerusaalamete huxxa huxxate oommota ikkinnina, umi'yara mittoreno gamba diassi'roommo. Soqqamaano'ya baala konne looso kaa'litinoe.

¹⁷Qarqaru gobbuwanni anewa dayino manna agurranna, barra baala ledo'ya ittanno Ayihudootinna albisootinsa mitteenni 150 mannaati.

¹⁸Barru baala 1 hando, 6 hardino ge'reewonna lowo lukkuwa gorre shiqishoommonsa. Tonnu barrinni mitte hige woyinete xajje koyisoommonsa. Ikkollana, mannu aana duunnoonniha ayirrado duha hoolatenni gashshaannira malino muishsha dihasi'roommo.

¹⁹Magano'ya ballo, kunni mannira assoommo danchumma baala la'e qaagie.