Read Sidama_Qullaawa _Maxaafa NEHIMIYA 8 Bible Online

NEHIMIYA 8 - Sidama_Qullaawa _Maxaafa bible

NEHIMIYA 8

¹Israeelete manni lamalki aganira katammansara darga amada gudi. Hakko aganira umi barra Yerusaalamete Wayi Waalcho yinanni xawira mannu baalunku mitteenni gamba yii. Hakkunni gedensaanni Maganu Muse widoonni Israeelete mannira uyino seera amadino maxaafa abbannonsa gede qeesichu Izirara kultu.

²Kunnira hakko barranni, Izira wodancha dandaanno manni meya labbaahu, aju akkali gatikkinni wo'munku gamba yee noowa Seeru Maxaafa haa're abbi.

³Hakko xawira Izira huxxu waalchi mule uurre soodinni barri geeshsha Seeru Maxaafa naggi yitino qoonqonni nabbawi. Mannu baalunku lowo geeshsha diinaggaawe macciishshi.

⁴Izira tenne hajora yine haqqunni seekkinoonni tullichi aana fule uurri. Isi ledo qiniitesiinni uurrino manni Matiitiya, Shemai, Anaya, Ooriyo, Hiliqiyanna Maiseya ikkitanna, gurasiinni uurritinori qolte Pedaya, Mishaeeli, Malkiya, Hashuumi, Hashibadana, Zakkaariyaasiitinna Meshulaamiiti.

⁵Izira mannuwiinni luphi yitino tullo aana uurri yannara, wo'munku buuxe iso lai. Seeru Maxaafa fanita, mannu baalunku ofollinowiinni kae uurri.

⁶Izira, «Jawu Magani Kaaliiqi galatamo!» yii. Mannu baalunku anga iima qole kayise, «Hamii'ni! Hamii'ni!» yee dawari. Baattote aana gombisame albunni uulla kisanni Maganoho kumbuuli.

⁷Hakkunni gedensaanni, mannu kae noo darga uurri. Kunninni aanchine su'mansa borreessinoonni Leewaawootino Seeru Maxaafi tiro mannaho xawissu. Insano Iyyaasu, Baani, Sherebiya, Yamiini, Aquubi, Shabatayi, Hoodiya, Maiseya, Qeliixa, Azaariya, Yozaabaadi, Hanaaniitinna Pelayaati.

⁸Insano mannu buuxanno gede assite Maganunniha Seeru Maxaafa nabbabbe tirte kultu.

⁹Mannuno seera nabbambanna macciishshe wi'li. Kunnira, gobba gashshinohu Nehimiya seeru rosiisaanchi qeesichu Izira, Seeru Maxaafi tiro xawissanno Leewaawooti ledo mannaho, «Kuni barri Magani'ne Kaaliiqira Qullaawa barraati. Kunnira, dadillanna wi'la dihasiissanno'ne» yitu.

¹⁰Isino, «Xa mini mini'nera hadhine noo'neta dancha sagalenna ago buxanete ledo beeqqitine ittinanninna agginanni hagiidhe. Techo Maganinke Kaaliiqira baxxinoha qullaawa barra ikkino daafira dadillitinoonte. Kaaliiqi hagiirri wolqa'neeti» yiinsa.

¹¹Leewaawootuno, «Kuni Qullaawa barraatina dadillitinoonte» yite manna baalanka jawaachishshu.

¹²Kunnira, mannu baalu mini minisira ha're itanninna aganni lowo geeshsha hagiidhi; noonsa sagale hoogginorirano iillishshu. Konne assitinohuno, nabbamboonninsa qaali tiro seekkite buuxxinohuraati.

¹³Layinki soodo boosaallu boosaallu roorrooti, qeesootunna Leewaawootu ledo mitteenni Seeru Maxaafa rosiisannonsa gede Izirawa daggu.

¹⁴Rosu yannara, Muse widoonni qole Kaaliiqi uyinonsa seeri, Daasu Ayyaana ayirrissanno woyite, Israeelete manni harancho yanna foolishshi'rate qansoonni daasira hee'ra hasiissannonsata buuxi.

¹⁵ Kunni daafira, kunninni aante noo biddishshuwa baala Yerusaalamete, wole katammaranna qachuwate tuqissu. Biddishshuno, «Gaarrate aanira fultine, daraame haqqe sinna: Ejedhennita, uddonnita, saattunnitanna wole haqqe sinna murtine Seeru Maxaafira borreessinoonni biddishshi garinni daase qasse!» yaannoho.

¹⁶Kunnira, mannu fule sinna mure haa're abbi. Mittu mittu minisi aana, nafarasi, Qullaawu Mini nafara, Wayi Waalchiranna Efireemi nafara daassa qasi.

¹⁷Qafadotenni hige dayino manni baalu daase qasi're gali. Konne coye assate Newe beetti Iyyaasu yanna kawa tini umite. Wo'munku Daasu Ayyaana lowo hagiirrinni ayirrissu.

¹⁸Ayyaana ayirrisa hananfinkunni kayise gundi barri geeshsha, Izira barru baala Maganu seeri maxaafinni mitto mitto gafa nabbawinsa. Ayyaanano 7 barra ayirrissu. Settikki barra seeru yaanno garinni magansi'rate gamba yitu.