Read Sidama_Qullaawa _Maxaafa ASTEERI 1 Bible Online

ASTEERI 1 - Sidama_Qullaawa _Maxaafa bible

ASTEERI 1

¹Faarisi moote Arxekisiisi[1] dannawu katama Suusa teesso assi're Hindetenni kayise Itiyophiyu geeshsha 127 gobba gashshino.

³Isi moohihunni sayikki diro amaalaasinesiranna ledosi gashshaano baalate lowo jila jilino. Hakko jilira Faarisinna Medooni gobbari olu hajajaano, awuraajjunna woradu gashshaasine baala daggino

⁴Moote jiro batidhinoha ayirradonna gaamaara mootete mine 6 agana wo'ma leellishinsa.

⁵Hakkunni gedensaanni moote Arxekisiisi dannawu katamira Suusaho heedhannorira dureeyyeteno, buxaneteno lede wole jila jili. Mootete mini qaera caalu haqqe giddo jilloonnihu kuni jili mitte lamala wo'ma keeshshino.

⁶Hakkonne caa'linanni darga waajjonna bule dukkonni biifinsoonni. Tenne dukko xiillitte heqonni usurre birrunni seekkinoonni qalawatera giddoonni qolle sayinsoonni siibba, calallaqu kinchi tuuqqa aana rarraansoonni. Culkunninna birrunni seekkinoonniti harammaadda daallassa waajjunna duumu, baqqalunna bulu daninni ille qaphi assannohunni calallaqu kinchinni biifinsoonni darga dirreenna no.

⁷Angannireno mimmito lawannokkihunni addi addi suudinni seekkinoonnihura culku finiinchira worre beenkanni. Mooteno mootete minita woyinete xajje mannaho hasi'ri garinni uyinanni gede assi.

⁸Moote mannu rosino garinni hasi'ri geeshsha aganno gede soqqamaanosi hajaje agurino.

⁹Tenne giddo, mootete galte mootitte Asxiinino mootete mine hee'ranno meentira wole jila jiltino.

¹⁰Ji'la hananfihunni lamalki barra moote Arxekisiisi woyinete xajje age duuwe hee're, Mehumaani, Biizita, Harboona Biigita, Abagita, Zetaarinna Karkaasi yinannire lamalanta mureeyye woshshe,

¹¹«Mootitte Asxiini mootimmate mini imaana uddidhe ayirrinyu ba'latto umoho wodhite kawiira dagganno gede asse» yee hajajinsa. Moote hatto assinohu, mootitte Asxiini lowo geeshsha xuma ikkitino daafira ledosi gashshaanoranna wosina baalaho leellishara hasi'reeti.

¹²Ikkollana mootitte Asxiini kulloonniseta mootete sokka macciishshite isiwa didaggino. Kuni coyi moote lowo geeshsha hanqisisi.

¹³Seerunna budu hajara, hayyoole mala xa'ma mootete roso ikkitinohura, hatte yannara ma"assa hasiisannoro mala uyitannosi gede amaalaasinesi woshshiishi.

¹⁴Wo'manka woyite moote amaaltannori Karsheena, Shetaari, Adimaata, Terseesi, Mereesi, Maarsenanna Memukaani yinanniri lamalunku, gashshootisi giddo qara darga amadde, Faarisinna Medooni gobba gashshitanno jajjabbaati.

¹⁵Moote tenne amaalaasine, «Ani moote Arxekisiisi mootitte Asxiini dagganno gede soqqamaano'ya soyenna daa gibbino. Kunnira, ise assitino coyi daafira seeru mayaanno?» yee xa'minsa.

¹⁶Hakkunni gedensaanni amaalaasinesi giddonni mittu Memukaani yinannihu, «Halaale coyi'niro, mootitte Asxiini moote calla ikkikkinni ledosi gashshaano, roorrootanna hakkiino sa'e gashshootisi giddo nooha labbaaha baala shollishshino.

¹⁷Kunni ka'a gashshootisi giddo noo meenti baalu, mootitte Asxiini assitinota macciishshiro ayiddaannansa mishe, ‹Moote Arxekisiisi galte mootitte Asxiini nafa, isi woshsheenna mara digibbino!› yaanno.

¹⁸Faarisinna Medooni gashshootira noo gashshaano meenti konne mootitte assitino shollinye macciishshiro techonni arrishsho e'ukkinni galtensara fenjeejjanno; gobba baalate noo meentino galtensa ayirrisa aguranno. Labballuno meentinsa ledo giwamaraati.

¹⁹Moote, maahoyye yiittonkero, mootitte Asxiini kunni ka'a atewa daggara fajjinannisekkita egensiisanno lallawa fushshi. Konne coyeno Faarisinna Medooni seeri garinni soorramannokki gede assine berreessinona hajaji. Asxiini mootimma hoolte isewiinni woyyitannotera uyi.

²⁰Ati fushshatto lallawi ayirrado mootimmakki gashshooti baalu giddo faajjete kulamanno woyite, dureessunnita ikkito buxichu galte baala ayiddaannase ayirrissanno» yii.

²¹Mootenna ledosi gashshaano baala tenne hedo hagiidhite baxxu. Mooteno Memukaani abbino mala haa're hakkawoyintenni yiino gede assi.

²²Kunnira moote, «Mittu mittunku ayiddaannira minesi coyi're gashshate roorre heedhosi» yitanno hajajo addi addi afiinninna addi addi borronni qixxeessine gashshootisi gobba baala iillinshanni gede assi.