Read Sidama_Qullaawa _Maxaafa ASTEERI 2 Bible Online

ASTEERI 2 - Sidama_Qullaawa _Maxaafa bible

ASTEERI 2

¹Shiima yanna gedensaanni mootete hanqi qiideenna, mootitte Asxiini assitino coyenna isera yinoonni yoo daafira wodanisinni mali.

²Hakkunni gedensaanni isira gamba yitino amaalaasine, «Atera xuma seenne hansohena.

³Gashshootikki giddo noo gobba baalate manna worteenna, xuma seenne doorte abbite Suusa Katamira meentikki hee'rannowa wortona. Insano abbine kunni minira murricha assootto mureessi Hegayi anga worre, xumille lexxanno gede assinona.

⁴Insa giddonni roorsite baxattota doodhite Asxiini darga amadde mootitte ikkitanno gede assi» yitusi. Mooteno kuni mali dancha ikkino daafira, yinoonni gede assi.

⁵Hakkiicho Suusa Katamira Merdookiyoosi yinannihu mittu Ayihudichi no. Isi Biiniyaami ga're giddo ila Yaiiriho; Yaiiri Shimi"iho; Shimi"i Qiisiho.

⁶Merdookiyoosi, Baabilooni moote Nabukadanatsoori Yihudu moote Yoakiini wolu lowo manni ledo Yerusaalametenni qafade abbi waro ledo no.

⁷Ibiraawootu afiinni Hadaase yinannita wosiilisi beetto Asteeri isi anga lophitino. Ise dana xumate; albano xawadote. Annisenna amase reyiteenna Merdookiyoosi ha're ilasi gede asse lossinose.

⁸Moote lallawa fushshi yannara, Suusa Katama haa'ne massinoonni seenni giddo mitte Asteeriiti. Ise haa'ne mootete minira massine doorroonni meenti hee'rannowa Hegayi anga heedhanno gede assinoonni.

⁹Asteeri Hegayi hagiirsiissinosi; ikkitoseno baxissusi. Isino keeshshikkinni dancha sagale uyinannise gedenna xixxiimbanna biinfille lexxitanno gede assi. Doorroonni meenti hee'rannowa woyyino darga ee, mootete miniha soqqamannoseha 7 meento ledose wori.

¹⁰Merdookiyoosi balaxe kulinose garinni Asteeri gobbasenna ilamase kultukkinni maaxxe keeshshitino.

¹¹Merdookiyoosi Asteeri ikkite keeshshitino garanna xaano hiitto ikkite nooro afara yee, barru baala doorroonni meenti hee'ranno qaera ka'anna kawa ha'ramanno.

¹²Meento mitto diro wo'ma biifinsanna keeshshino. Hakkuno uurrinsha suwe manninate biifanno gede umiha 6 agana kaarbetenninna zayitetenni xixxiimbanni; layinkihu 6 aganirano balisaami yinannitenni su'niitanno shittonni xixxiimbanni. Hakkunni gedensaanni mitte mittenti bado badotenni moote Arxekisiisiwa eanno gede assinanni.

¹³Dooramino meenti hee'ranno mininni fule mootete minira eanno woyite, hasi'rinore anga adhe ha'ranno.

¹⁴Mitte mittenta, hashsha mootete ledo galteenna soodo doorroonni meenti hee'rannowa wolu minira haa'ne massinanni. Hakkiicho mootenniha irkote meento agarannohu mureessu Sha"ashigaazi anga massine worranni. Moote baxe su'mase woshshe galagalte isiwa martanno gede xa'ma hoogiro layinkimeeshsho isiwa dishiqqanno.

¹⁵Kunni garinni Asteerirano mootenniwa martanno yanna iillituse. Wosiilise beetti Merdookiyoosi ilasi gede asse lossinoti Abihayili beetto Asteeri illete baxissannote. Iserano mootenniwa eate bado iillituseta, doorroonni meenti hee'ranno minira roorricha ikkinohu Hegayi kulinosere ikkinnina wolere adhite dihadhino.

¹⁶Arxekisiisi moohihunni lamalki diro Tebeti yinannihura tonnikki aganira Asteeri haa'ne mootete minira massini.

¹⁷Moote ise wolu seenni baalunkunni roorse baxise; wolootunni roore baxinosenna naadinose daafira, mootimmannita ayirrinyu ba'latto umise aana wore Asxiini darga mootitte assise.

¹⁸Hakkunni gedensaanni moote, Asteeri ayirrinyira yee lowo jila jile ledosi gashshaanonna roorroota baala woshshi. Gashshootisi giddo noo gobba baalate ayyaana ayirrinsanni gede[2] lallawi. Mootete afanshano beehi.

¹⁹Hatte yannara Merdookiyoosira mootimmate qaera roorre uyineennasi no.

²⁰Merdookiyoosi qorophisiisinose garinni Asteeri Ayihuditte ikkase xaa geeshsha dikultino. Anje isi anga heedhe hajajantinosinte gede, kunni coyirano hajajantusi.

²¹Merdookiyoosi mootete qaera loosanni noo yannara, mootete minira waalchuwa agartannori Gebetanna Taara yinanni mureeyye moote Arxekisiisi shaate gano gantino.

²²Merdookiyoosi tenne gano macciishshe Asteerira kuli. Asteerino Merdookiyoosi afoo ikkite maaxxe mootete kultu.

²³Qorranni woyite kuni coyi adda ikkinota buunxi. Kunnira lamenka gano ganture dawete aana sunte shini. Mooteno konne coye mootimmate mini dhagge amaddino taje giddo borreessine worranni gede hajaji.