Read Sidama_Qullaawa _Maxaafa ASTEERI 4 Bible Online

ASTEERI 4 - Sidama_Qullaawa _Maxaafa bible

ASTEERI 4

¹Merdookiyoosi konne assinoonni coye baala macciishshe dadillunni uddanosi dari; hakkunni gedensaanni xiddu uddano uddi're umisi aanano buluulo giggishshi're qoonqosi naggi asse heqqifate wi'lanni katamu giddo ka'anna kawa ha'ranni raataawi.

²Xiddu uddano uddi're ayeno mootete minira ea dandaannokki daafira, isino mootete mini xullo mare giddora ea didandiino.

³Mootete lallawu iillino gobba baalate heedhanno Ayihudooti raarte wi'litu; itanna aga agurte raarte wi'litu. Lowo mannino xiddu uddano uddi're buluulu aana ofolli.

⁴Asteerira soqqamanno meentinna agartannose mureeyye Merdookiyoosi ikkinore kulteennase lowo geeshsha dadillitu. Merdookiyoosira xiddu uddano soorri'ranno gede wole uddano sokkusi. Isi kayinni adha giwi.

⁵Hakkunni gedensaanni Asteeri mootete mureeyye giddonni moote isera soqqamanno gede worinoha Hataaki yinanniha woshshite Merdookiyoosi maikkinoro buuxe daanno gede sokku.

⁶Hataakino mootete minira e'nanni waalchi mule katamu gudumaalira noohuwa Merdookiyoosiwa mari.

⁷Merdookiyoosino ikkino coye baala gudise kulisi. Haama Ayihude shine gundiha ikkiro mootete miinji minira abbate hedino woxi deerrano kulisi.

⁸Ayihudete manna gudate Suusa Katamira lallamboonni lallawi affino Hataakira uyi. Tenne lallawu affino masse Asteerira ee, ikkino coye baala xawise kulannose gedenna mootenniwa e'e gosase daafira eegantanno gede kulara Hataaki huucci'ri.

⁹Hataakino Merdookiyoosi yiinore baala mare Asteerira kuli.

¹⁰Asteerino,

¹¹«Labbaahano ikko meyati, ayino woshshinikkinni mootete mini giddora eannoha ikkiro shinanni. Seeru konne ikkanna, mootete amaalaasinenni kayise wolu manni geeshsha konne coyeno afinokkihu mittuno dino. Seeru garinni hakkiira eanno woyite moote culku siqqicho isi widira qole akeekinohu callu reyotenni gatanno. Hakkunni aana, ani mootenniwa mare higummankunni sajjuu barri sainoe» yite dawarte Hataaki Merdookiyoosiwa sokku.

¹²Merdookiyoosino Asteeri sokka macciishshihu gedensaanni,

¹³«Ati mootete mine hee'ratta daafira, wolootu Ayihudootitenni woyyitanno kaayyo afi'roottaha lawoonkehe!

¹⁴Togoo yannara lashshi assite sammi yiittaro, Ayihudete kaa'lo wolu darginni daggukkinni digattanno; insano gattanno. Atinna annikki mini manni kayinni gooffinanni. Ikkollana mayi afino, ati mootete galte ikkoottahu tenne qarru yannara gatisattankera ikkinoha ikkara dandaanno» yee soyi.

¹⁵Asteerino Merdookiyoosira,

¹⁶«Hadhe Suusa Katamira noo Ayihude mittowa gamba assiteenna, ita aga agurtine ane daafira huucce; sase barranna sase hashsha mittoreno afooho wodhitinoonte. Aninna soqqamannoe meentino kunni garinni keeshshineemmo. Hakkunni gedensaanni seerunni hoolloonniha ikkiro nafa mootenniwa e"eemma. Togo asse reyummarono reyo» yite sokku.

¹⁷Merdookiyoosino kae ha're, Asteeri yitinosire baala assi.