Read Sidama_Qullaawa _Maxaafa ASTEERI 5 Bible Online

ASTEERI 5 - Sidama_Qullaawa _Maxaafa bible

ASTEERI 5

¹Ita aga agurtuhunni sayikki barra, Asteeri mootimmate uddano uddidhe mootete barcimira albaanni noohura mootete mini xullichira e'e uurritu. Mooteno alba xullote widira hige ayirradu barcimisira ofolle no.

²Moote, mootitte Asteeri gobbaanni uurrite noota afe, baxannose daafira culkunnita siqqichosi ise widira qole akeeki. Iseno shiqqi yite culku siqqicho qacce kissu.

³Mooteno, «Asteeri, mayira dayitta? Maricho hasi'roottaro kulie; gashshooti'ya darate ikkiro nafa eemmohe» yiise.

⁴Asteerino, «Moote'ya ballo, maahoyye yiittoero techo hawarro atera jiloomma jilira Haama ledo dagginanni gede hasi'roomma» yitusi.

⁵Hakkunni gedensaanni moote Haama rahe woshshiishe Asteeri jilira hadhannota kulisi. Kunnira mootenna Haama Asteeri jilira martu.

⁶Woyinete xajje agganni heedheenna moote Asteeri, «Hasi'roottare xa'mie, eemmohena; gashshooti'ya darate ikkiro nafa aammohera qixxaawaho?» yiise.

⁷Asteerino dawarte,

⁸«Baxattoehanna hasi'roommare aattoeha ikkiro, ga'a jileemma jilirano atinna Haama layinkimeeshsho dagginannie gede ayirrinyunni huucci'reemma. Hasi'roomma coye hakkawoyite kuleemmahe» yitu.

⁹Haama jiluwiinni fule ha'ri woyite lowo geeshsha hagiidhenna hisate no. Ikkollana Merdookiyoosi mootete minira e'nanni waalchi mule ofolle nooha afi. Sae ha'ri woyiteno Merdookiyoosi ofollino darginni gotti yiinosikkitanna ayirrisinosikkita afe, lowo geeshsha hanqi.

¹⁰Hanqosi kayinni cince maaxi're ha're minisera iilli. Hakkunni gedensaanni jaallasi minira woshshe galtesi Zereshino ledo ofoltanno gede assi.

¹¹Jirosinna oososi batinye coyi're, mooteno roorre ee mageeshshi geeshsha ayirrisinosironna wole gashshaano baalantenni roore ayirrado ikkinota naaxxanni kulinsa.

¹²Haama lede coyi'ranni, «Hakkiinnino sae mootete galte mootitte Asteeri qixxeessitino jilira mootenna ane agurranna wole mittono diwoshshitino. Ga'ara jiltino jilirano layinkimeeshsho mootete ledo koyissinoe.

¹³Ikkollana hakkonne Ayihudicha Merdookiyoosi mootete mini waalchi mule ofolle nooha afanna anera kuni ayirrinyi baalu ma"assannoe?» yii.

¹⁴Kunnira galtesinna jaallasi baala, «Hojja 50 cigile ikkitannota haqqu dawe qixxeessite ga'a soodo Merdookiyoosi sutatto gede moote xa'ma hasiissannohe. Hakkunni gedensaanni hagiidhitanni jilaho ha'ratto» yitusi. Haamano tenne hedo baxe suntanni dawe qixxeessi.