Read Sidama_Qullaawa _Maxaafa ASTEERI 6 Bible Online

ASTEERI 6 - Sidama_Qullaawa _Maxaafa bible

ASTEERI 6

¹Hakko hashsha mootete goxano gibbeennasi mootimmate mini dhagge borreessinoonni taje haa'ne abbine nabbambannisi gede hajaji.

²Nabbamboonni taje giddonni mitte, mootete mine agartannori Gebetanna Taara yinanni mureeyye moote shitara gantino gano Merdookiyoosi afe gatisino gara kultannote.

³Mooteno, «Ikkina konne assihura Merdookiyoosira ayirrinyenna roorre uyinisini?» yee xa'mi. Mootete soqqamaanono, «Isira mittoreno assinoonnisiri dino» yite dawartu.

⁴Mooteno, «Mootimmate mine ledo'ya gashshaasine giddonni ayi no?» yee xa'mi. Hatte yannara Haama qixxeessino dawe aana Merdookiyoosi sutate moote xa'mi'rara mootete mini nafarira daye no.

⁵Mootete soqqamaanono, «Kuneeti Haama ate ledo xaadara agadhe no» yitu. Mooteno, «Maahoyyena, eanno gede asse» yii.

⁶Haama minira eita moote, «Lowo ayirrinye aammosira hasi'roommohu mittu manchi no. Kunni manchira ma"assummosiro woyyannoha lawannohe?» yee xa'misi. Haama wodanisinni, «Moote konne ayirrinye ane ka'a woleho ayera aanno?» yee hedi.

⁷Kunnira mootete, «Kunni manchira ati uddi'rattota mootimmate uddano abbinannisi gede assi; ati gulufatto farashsho abbine umoho ayirrinyu ba'latto worranni gede hajaji.

⁹Gashshootikki ayirraddi giddonni mitto woshshite mootimmate uddano uddisiise, farashsho gulufisiise, massage albaanni ha'ranni katamu gudumaale haa're ha'ranno gede assi. Lamunku hadhanno woyite massage noo ayirradi, ‹Moote ayirrisara hasi'rannohura togo assinanni!› yaanni lallawo» yii.

¹⁰Mooteno Haama, «Maahoyyena xa rakke ka'e, mootimmate uddanonna farashsho haadhe konne coye baala mootete mini xullora noohura Ayihudichu Merdookiyoosira assisi. Yiitto coyi giddonni mittuno gatoonke» yiisi.

¹¹Kunnira Haama mootimmate uddanonna farashsho haa're, Merdookiyoosira uddano uddisiise, farashshono gulufisiisisi. Merdookiyoosi farashsho gulufihu gedensaanni Haama massage albaanni ha'ranni, «Moote ayirrisara hasi'rinohura togo assinanni!» yaanni lallawi.

¹²Hakkunni gedensaanni Merdookiyoosi galagale mootete mini waalchiwa higi. Haama kayinni saalfate umo guggu'le rahe minisira ha'ri.

¹³Mare iillihu gedensaanni galtesiranna jaallasira iillinosi coye baalanka kulinsa. Galtesinna egennaammu jaallasi, «Kuneeti angakkinni gashshootekki Merdookiyoosira aate mule nootto. Isi Ayihudicha ikkinka woyite assite afattosiri dino; halaaleho isilla qeelannohe» yitusi.

¹⁴Konne coye hasaabbanni heedheenna mootete mini mureeyye dagge Haama rakke Asteeri jilira haadhe hadhu.