Read Sidama_Qullaawa _Maxaafa ASTEERI 9 Bible Online

ASTEERI 9 - Sidama_Qullaawa _Maxaafa bible

ASTEERI 9

¹Adaari aganihu tonaa sayikki barri iilli. Hakku barri, Ayihudete diini umonsa kade uurrate mootete lallawa wonshara agadhe noo barraati. Ikkollana hakku coyi soorrameenna Ayihude insara iimaanni higgino.

²Mootete gashshooti giddo noo katammara Ayihude heedhannowa baala gawajjara hasi'rannohura bala tugate qixxaabbe agartu. Base baalate heedhanno gosa insa waajjitino daafira seyatinonsahu mittuno dino.

³Roorenka gobba gobbate gashshaano, roorrootu, albisootunna mootete lekka ikkitinori Ayihude kaa'litinonsa. Hatto assitinohuno Merdookiyoosi waajjitinohuraati.

⁴Merdookiyoosi mootete gashshooti giddo mootete mine jawa gashshaancho ikkinotanna wolqano lexxinota mannu baalu afi.

⁵Kunni garinni Ayihude diinansa hasidhu gede assitu. Gibbannonsareno bisetenni doddolte shitu.

⁶Dannawu Katamira Suusa nafa 500 manna shite guddu.

⁷Shitino manni giddo Parshandaata, Dalfooni, Asipaata, Paraata, Adaaliya, Ardaata, Parmashita, Arsaayi, Ardaayinna Wayizaata yinanniri diininsa Hamedaata beetti Haama oosono ledo no. Tenne giddoonni kayinni jajjansa disaantino.

¹¹Hakko barra Suusa Katamira shinoonni manni kiiro mageeshshitero mootete kullisi.

¹²Mooteno mootitte Asteerira, «Kuneeti Ayihude Suusa Katami callaho shitino manni tonnu Haama ooso ledo 500 ikkino. Addi addi gobbara shitino manni kiiro kawiinni lowo geeshsha roortanno. Uyinannihena, woliri xa'mi'rattari nooni? Hasi'rattari nooro, eemmohena kulie» yiise.

¹³Asteerino, «Maahoyye yiittoero, Suusa Katamira heedhanno Ayihude ga'ano ledde techo gede assitona fajjinsa. Tonnenka Haama ooso reeshshano massine dawete suntanni gede hajaji» yitu.

¹⁴Moote kunni coyirano hajajo uyi. Konne coyeno Suusa Katamira lende lallambi. Tonnenka Haama ooso reeshshano mannaho leellannowa xawoho massine sunti.

¹⁵Adaari aganira tonaa shoolki barra, Suusa Katamira heedhanno Ayihude layinkimeeshsho gamba yite xaadde ledde 300 manna shitu. Ikkollana xaano ikkiro jajjansa disaantino.

¹⁶Kunni garinni mootete gashshootira gobba baalate heedhanno Ayihude gamba yite qixxaabbe umonsa garigadhitu. Gibbannonsare 75,000 manna shite umonsa diinu anganni gatisidhu. Ikkollana xaano ikkiro diininsa jajja disaantino.

¹⁷Kuni coyi ikkinohu Adaari aganira tonaa sayikki barraati. Suusa Katamira gobbaanni noo Ayihude tonaa shoolki barra mitto mannano shitukkinni hagiidhitanninna ji'litanni hossu.

¹⁸Suusa Katamira heedhanno Ayihude kayinni tonaa sayikkinna tonaa shoolki barra manna shitanni hosse, tonaa ontikki barra shaa agurte ayyaana assidhe hagiidhitanninna ji'litanni hossu.

¹⁹Shiimmaadda katammara heedhanno Ayihude Adaari aganira tonaa shoolki barra hagiirru ayyaana assidhe ittanninna agganni mimmitoho afanshu sagale uyitannohu kunniraati.

²⁰Merdookiyoosi tenne ikkito borreesse Faarisi gobba gashshooti giddo muleno xeertoteno heedhanno Ayihude baalate soyi.

²¹Diru dirunkunni Adaari aganira tonaa shoolkinna tonaa ontikki barra ayyaana assidhe ayirrissanno gede kulinsa.

²²Tini barruwa Ayihude diininsa anganni gatte fooliishsho afidhinote. Dadillunninna yaaddotenni fulte hagiirrenna harshammo afidhinohu kunni aganiraati. Tenne barruwanni ayyaana assidhe hagiidhitanninna ji'litanni, mimmitohono sagale afanshitanninna buxaneteno afansha uyitanni ayirrissanno gede kulinsa.

²³Kunnira Ayihude Merdookiyoosi kulinonsa garinni diru dirunku konne ayyaana ayirrisa roso assidhu.

²⁴Ayihudete diini Agaagi sirchi Hamedaata beetti Haama, albaanni Furiimi yinanni hixa tungeenna Ayihude baala co'o asse gudate ma'lino.

²⁵Asteeri kayinni mootenniwa marteenna, mooteno hajajino hajajo borreessine iillinshanni gede assino. Hatte hajajonni Haama Ayihude gudisiisara hedino hedo umisira higgino. Isinna tonnenti oososino dawete aana sutantino.

²⁶Tini ayirrinsanni barruwa, Furiimi yinannihu kunniraati. Merdookiyoosi soyino sokkanna illensanni affinorinna aanansa ikkino coye garinni,

²⁷Ayihude uminsara, sirchinsaranna Ayihude ikkara hasi'rannohura baalaho soorramannokki seera fushshidhu. Hakkuno diru dirunkunni yinoonni barri iillanno woyite Merdookiyoosi uyino biddishshi garinni konne lamenka barra ayirrisateeti.

²⁸Tenne Furiimi barruwa, Ayihudenniti xaatinna albillittete ilama katammatenna gobba baalate ayirrissanno gede assini. Tenne barruwa ayirrisa agura dihasiissanno. Sirchinsa giddonni tenne ayyaanna qaaggo ba"a dihasiissanno.

²⁹Hakkunni gedensaanni Abihayili beetto mootitte Asteeri Merdookiyoosi ledo kaa'lante Furiimi Ayyaani daafira Merdookiyoosi alba asse soyino sokka ledde kaajjishshe, roorrese leellishshanno hajajo amaddino borro sokku.

³⁰Borrote sokka Ayihude baalate sonkoonnite; affino kayinni Faarisi moote gashshooti giddo nootera 127 gobba baala sonkoonni. Borrote sokkano Ayihude keerenna hobbaate heedhanno gede halchinoonni halcho giddo amaddinote.

³¹Hakkunni aanano albaanni ita aga agure huucci'rate worroonni seera agadhitannonte gede Furiimi barruwano insanna dagganno ilama diru dirunkunni agadhitanno gede kultanno. Tenne hajajono mootitte Asteerinna Merdookiyoosi mitteenni sumuu yite fushshitino.

³²Furiimi seeranna woga lede kaajjishate mootitte Asteeri sokkino sokka baxxinohura xaanxoonni gogira borreessine worri.