Read Sidama_Qullaawa _Maxaafa FULO 1 Bible Online

FULO 1 - Sidama_Qullaawa _Maxaafa bible

FULO 1

¹Mininsa manni ledo Gibitsete gobba hadhinori Yaiqoobi ooso:

²Roobeeli, Simiooni, Leewi, Yihuda,

³Yisaakoori, Zaabilooni, Biiniyaami,

⁴Daani, Niftaalemi, Gaadiitinna Aseeriiti.

⁵Yaiqoobi godowa ikkitinori kiironsa lamalaaho.[1] Hatte yannara, Yooseefi Gibitsete Gobbara hee'ranno.

⁶Lowo yanna gedensaanni Yooseefi, roduuwisinna ledonsa ilama baala reyitu.

⁷Ilamansa Israeele kayinni ilante batidhe Gibitsete baatto wo'mitu; kiironsa lowo geeshsha batidhino daafira waajjinannire ikkitu.

⁸Hakkunni gedensaanni, Gibitsete gobbara Yooseefi egenninokkihu haaru moote moohi.

⁹Isino mannisira, «Kuneeti kuri Israeelootu kiiro batidhino; ninkerano wolqissinonke.

¹⁰Olu ka"anno yannara diininkera ha'lite qassannonkekki gede, kiironsa batidhannokki gedenna gobbankenni fulte ba'annokki gede, amme mala kalanqona» yii.

¹¹Yitinonte gede Gibitsootu, wolqate loosinni gadadissannore kaajjadda Gibitsete loosiisaano wortunsa; Ferioonirano, Fitoominna Raamise yinannire gidenna uduunne duunnanni katamma mintanno gede assitu.

¹²Ikkollana, Israeele gadadantu deerrinni kiironsa batidhu; baattote aanano hala'litu; kunninni kainohunni, Gibitsootu Israeeloota lowo geeshsha waajjitunsa.

¹³Mararro nookkiha gadadissanni loosiissunsa.

¹⁴Mittoreno marartannokkiha sabba kadisiissanni, xuube seekkisiissanninna gate loosiissanni caacceessitunsa.

¹⁵Hakkunni gedensaanni, Gibitsete moote Ibiraawootu meento ilshiishannore Siphaaranna Fuha yinannire woshshe,

¹⁶«Ibiraawootu meento ilshiishshinanni yannara, ilamanno qaaqqi labbaaha ikkiro darganko shitine hunne; meyata ikkituro kayinni heedhona agurre» yiinsa.

¹⁷Meentu kayinni Magano waajjino daafira, Gibitsete moote yiino gede assikkinni, labbaa qaaqquulle lubbotenni hee'ranno gede aguri.

¹⁸Kunni daafira, Gibitsete moote ilshiishanno meento woshshe, «Togo mayira assitini? Labbaa qaaqquulle mayira gatissini?» yee xa'minsa.

¹⁹Insano, «Ibiraawootu meenti Gibitsennihu gedeeha di"ikkino; jawaatoota ikkinohura, ninke iillinummokkinni balaxe ilanno daafiraati» yee dawarisi.

²⁰Ilshiishanno meenti Magano waajjino daafira, Maganuno danchare assinsa; mitte mittentera uminsa maate uyinsa; Israeelete mannino hala'li; kiironsano batidhu.

²²Hakkunni gedensaanni Feriooni mannasi baala, «Ibiraawootunniha ilamannoha labbaa qaaqquulle baala massitine Abbayi Wayi giddo tugge; meya qaaqquulli kayinni lubbotenni hee'rona agurre» yee hajaji.