Read Sidama_Qullaawa _Maxaafa FULO 10 Bible Online

FULO 10 - Sidama_Qullaawa _Maxaafa bible

FULO 10

¹Kanchafare Hakkunni gedensaanni Kaaliiqi Muse, «Galagalte Feriooniwa mari; isihanna ledosi gashshaasine wodana dilleessoommohu tenne maalale assammora yeeti;

²ki'neno, tenne maalalenni Gibitsoota asse godo'loommo gara ooso'neranna ooso'ne oosora kultinanni. Kunninni, ki'ne baalunku ani Kaaliiqa ikkoommota affinanni» yiisi.

³Kunnira Muse Aarooni ledo Feriooniwa mare, «Ibiraawootu Magani Kaaliiqi, ‹Anera heeshshi yaattokkihu mamooti geeshshaati? Manni'ya magansi'rannoe gede ha'rona aguri;

⁴giwittoro kayinni, ga'a barrinni gobbakkira kanchafare facci asse agureemmo.

⁵Batinyisinni kainohunni baatto gudise beeshshanno; kaadetewiinni gatino haqqi nafa gatikkinni co'o asse gudanno.

⁶Mootimmakki minna, ledokki gashshaanonna mannikki minna baalate kanchafaru wo'manno; annuwakkinna akaakkakki waro ikke egenninokki qarri ikkanno› yiino» yii. Hakkunni gedensaanni Muse Feriooni albinni fule ha'ri.

⁷Ledosi gashshaano Ferioonira, «Kuni manchi ninke mamooti geeshsha qarrisanno? Maganonsa Kaaliiqa magansi'rate labballu geeshshi hadhona aguri; gobba ba'anni noota diaffanni nootto?» yitusi.

⁸Kunnira, Musenna Aarooni woshshine Feriooniwa shiqinshi; Ferioonino, «Hadhine Kaaliiqa Magano'ne magansidhe; ha'ranno manni kayinni mageeshshaati?» yee xa'minsa.

⁹Muse daware, «Marreemmowa Kaaliiqi ayyaana ayirrisate jila jilleemmo daafira, aja akkala yinikkinni baalunku ha'neemmo; oosonkenna seennenke, ge'reewonke, me"enkenna lalonke baala adhine ha'neemmo» yii.

¹⁰Ferioonino, «Wodani'nera bunshe no; Kaaliiqi halaaleeti! Ooso'nenna meento'ne ha'rara diagureemmo.

¹¹Kaaliiqa magansi'ra hasidhiniro, labballu callu ha'ra dandiitinanni» yii. Hakkunni gedensaanni, Musenna Aarooni Feriooni albinni shorrininsa.

¹²Kaaliiqi Musera, «Kanchafaru dirre, kaadetewiinni gattinota baattote aana noo mu'ro baala gudanno gede Gibitsete gobba aana angakki kayisi» yiisi.

¹³Museno Gibitsete baatto aana siqqosi kayisi; Kaaliiqino hakko barranna hakko hashsha wo'ma soojjaati bubbe kayisi; soodita, bubbe kanchafare haadhe abbitu.

¹⁴Kanchafaruno fule, Gibitsete gobba baala wo'mi; hakkeeshshi kanchafare hakkuyira albaanni anfe diegenninoonni; albillitteno hakkeeshshi kanchafare dianfanni.

¹⁵Gobba baala tunsiise amadino daafira, kaadetewiinni gattinota haqqu aana noo laalonna mu'ro baala mucuqqi asse iti; Gibitsete baattora noo haqqi mittuno gatikkinni shamaricho baala co'o asse gudi.

¹⁶Ferioonino Musenna Aarooni rahotenni woshshiishe, «Ki'nenna Magani'ne Kaaliiqi aana sao assoommo.

¹⁷Xa mitte higginella sao'ya agurtine, tenne goofo aani'yanni hoolannoe gede Magano'ne Kaaliiqa huucce"e» yiinsa.

¹⁸Museno Feriooni albinni fule ha're, Kaaliiqa huucci.

¹⁹Kaaliiqino kanchafare fiite haadhe hadhe Duumu Baari giddo huntannota kaajjado galchimi bubbe kayisi; Gibitsete baattora mittu kanchafarchi nafa digatino.

²⁰Ikkollana, Kaaliiqi Feriooni wodana dilleessino daafira, Israeele hadhara diagurino. Tunsicho

²¹Hakkunni gedensaanni Kaaliiqi Muse, «Gibitsete baatto angatenni amandanni gedeehu beebbu tunsichi amadanno gede, angakki iima qolte kayisi» yii.

²²Museno angasi iima qole kayisi; Gibitsete baatto baala 3 barra beebbu tunsichi amadi.

²³Gibitsootu mimmitonsa affara dandiitinokki daafira, 3 barri geeshsha mininni difultino; Israeele noowa kayinni xawaabbaho.

²⁴Feriooni Muse woshshe, «Hadhine Kaaliiqa magansidhe; meenti'nenna ooso'neno ledo'ne hadhona; ge'reewi'ne, mei'nenna lali'ne kayinni konniicho gatona» yii.

²⁵Museno, «Hatto ikkannoha ikkiro, Maganinke Kaaliiqira kakka'lineemmotanna shilqishi'neemmo saada ati aattonke?

²⁶Horontanni kuni di"ikkanno coyeti; saadanke baala adhine ha'neemmo; mittichu culunqichi nafa digatanno. Maganinke Kaaliiqira kakka'lineemmore saadanke giddonni adhineemmo; hakkiira iillinammo geeshsha kayinni, kakkalleemmo saada hiittootero dianfoommo» yee dawari.

²⁷Kaaliiqi Feriooni wodana dilleessino daafira, manna ha'rara diagurino.

²⁸Kunni daafira Feriooni Muse, «Albi'yanni ho'li! Kunni ka'a ane illera leeltooti! Ille'yara leellootto barra reyatto» yiisi.

²⁹Museno, «Maahoyye yoottonte gede, xaate ate illera dileelleemmo» yiisi.