Read Sidama_Qullaawa _Maxaafa FULO 12 Bible Online

FULO 12 - Sidama_Qullaawa _Maxaafa bible

FULO 12

¹Kaaliiqi Gibitsete gobbara Museranna Aaroonira coyi'ranni,

²«Kuni agani ki'nera diroho umi agana ikko'ne.

³Israeelete songo baalantera tenne woga rosiisse: Kuni agani eihunni tonnikki barra, mittu mittunku manchi minisi manni daafira, mitto ge'rechu woy meichu wilii'licho fushshona.

⁴Mittu mini manni kiiro aje ite guda hoogiro, ikkanno geeshsha la'neenna mulisi olliichi ledo beeqqona.

⁵Fushshitinanni saada ge'recho woy meicho ikkitara dandiitanno; kayinnilla mitte musono afi'rinokkiha mittu diri wilii'licho ikkona.

⁶Doortine fushshitinihu gedensaanni, aganu eihunni tonaa shoolki barri geeshsha baddine keeshshiishshe. Tonaa shoolki barra arrishsho e'anna, Israeelete manni baalu wilii'licho mine minesi gorri'rona.

⁷Mannuno mittu mittunku maala intanni mini xullichira waalchohonna gafote mundee ga'nona.

⁸Maalano hakko hashshanni du'rinshe qaraaranno darchi ledo shiishinokki timinni intona.

⁹Hakkonne maala, bu'ra woy gafame ittinoonte; umo, lekkanna godowireno wolu maali gede du'rishshine itte.

¹⁰Sooda geeshsha mittoreno gatissinoonte; gatannori hee'riro co'o assitine giirtine hunne.

¹¹Ha'rara kaino manni gede qodhitine, koatteno wodhitine, siqqo'ne anga amaxxitine rakkine itte; kuni ane Kaaliiqa'ne ayirrissinanniha Mararrote Ayyaana ikko'ne.

¹²«Hakko hashshanni ani Gibitsete baatto baalate ha'ramanni, mitto mittonka mannunnihanna saadanniha umiricho baala sheemmo; Gibitsete maganna baala qorichisheemmo. Ani Kaaliiqaati.

¹³Xullichi'nera waalchoho noo mundee, ki'ne heedhinoonni mine ikkinota leellishshanno malaateeti; anino mundee afeemmo woyite agure saeemmo'ne; kunni garinni Gibitsoota qoomamunni ganeemmo yannara, ki'nera mittu qoomamino di"iillanno'ne.

¹⁴Kuni barri, ani Kaaliiqi assoommo'nere qaagginanni gede, ayirrissinannie ayyaana ikko'ne; konne ayyaanano diru dirunkunni ilamate ilama geeshsha ayirrissinanni» yiinsa.

¹⁵Kaaliiqi, «7 barra wo'ma shiishinokki tima calla ittinanni; umi barra shiishinoricho baala mini'nenni hooltinanni; aye manchino hakkuyi lamalunku barri giddo shiishshino sagale itiro, manni'ya ledo dikiiramanno.

¹⁶Umihunna lamalki barrinni magansi'rate gamba yiiyye; hakkunni lamunku barrinni ittinanni sagale calla qishidhe ikkinnina, wole mitto loosono loossinoonte.

¹⁷Ga're'ne baala Gibitsete baattonni haa're fushshoommo barraatina, konne timu ayyaana ayirrisse; konne ayyaanano ilamate ilama geeshsha ayirrisse.

¹⁸Umi aganinni tonaa shoolki barra, hawarronni kayissine lemiina mitikki barri hawarro geeshsha shiishshino sagale ittinoonte.

¹⁹Gobbate mannano ikko wole gobba manni shiishino tima itiro, manni'ya ledo dikiiramannona, 7 barri geeshsha shiishinori mine'ne hee'roonke.

²⁰Heedhiniwano heedhiniro, shiishinokki tima ikkinnina shiishinoha horontanni ittinoonte» yii.

²¹Muse Israeelete manni albisoota baala woshshe, «Mini'ne manni baalu Mararrote Ayyaana ayirrisanno gede mittu mittunku ge'rechu woy meichu wilii'licho doore gorri'rona.

²²Biqo ikkitannota garambichu daro haadhine, saffeho noo mundee giddo wortinanni, waalchi'neranna gafo'nera ganne; sooda geeshsha ayino mininni fuloonke.

²³Kaaliiqi Gibitsoota reyotenni ganara baattonsara ha'ramanni, gafotenna lamunku waalchira mundee afanno woyite agure sa"anno; shaanno sokkaasinchino mini'nera e"e ki'ne shaannokki gede hoolanno.

²⁴Ki'nenna ooso'ne tenne woga ilamate ilama geeshsha diru dirunkunni ayirrisse.

²⁵Kaaliiqi aa'nera hexxo uyino'ne gobba iillitinanni woyiteno, tenne woga wonshitinanni.

²⁶Ooso'ne, ‹Tini woga mayinnite?› yite xa'mitu'nero,

²⁷ki'neno dawartine, ‹Kaaliiqi Gibitsete gobbara minenke agure sae Gibitsoota shaanni ninke gatisinonke daafira, tini Mararrote Ayyaani kakkalo Kaaliiqa ayirrinseemmote› yitine kullensa» yiino. Israeeleno konne coye macciishshite kumbuulte Kaaliiqa magansidhu.

²⁸Kaaliiqi, Musenna Aarooni widoonni qole hajajinonsare baala assitu.

²⁹Hashshu mereerira Kaaliiqi mootimma ragi'rannohu Feriooni beettinni kayise, usuranyu beetti geeshsha Gibitsete baattora nooha labbaaha umo ilaminoha baala qoomi; umo qalantino saadano shii.

³⁰Feriooni, ledosi gashshaanonna Gibitsete manni baalunku hashsha goxxinowiinni ka'u; labbaa beetti reyinokki mini nookki daafira, Gibitsete baatto baalate wi'la kooco ikkitu.

³¹Hakko hashshinni Feriooni Musenna Aarooni woshshiishe, «Ki'nenna Israeelete ilama baala fulle! Gobba'ya agurtine hadhe! Yitininte gede hadhine Kaaliiqa magansidhe!

³²Yitinoonni garinni ge'reewo'ne, me"e'nenna lalo'ne baala adhitine hadhe! Aneno mararannoe gede Kaaliiqa huucce"e» yiinsa.

³³Gibitsootu uminsano reyineemmo yite waajjitinohura, manna gobbansanni rahe fulanno gede mudditu.

³⁴Mannuno liinsoonni gide shiishikkinni gawatete wore imaanunni xaaxe qotinsara duqqi.

³⁵Israeele Muse kulinonsante gede, Gibitsoota culkunna birru irra hattono imaana uyitannonsa gede xa'midhu.

³⁶Kaaliiqino, Gibitsootu Israeele ayirrissannonsa gedenna hasidhinore baalanka uyitannonsa gede assi; kunni garinni Israeele Gibitsete jiro gudhite hadhu.

³⁷Israeelete manni Raamisenni kae, Sukooti iilla geeshsha lekkansanni ha'ri; kiironsano meentonna ooso agurranna 600,000 geeshsha ikkitanno.

³⁸Wolu lowo manni ledo haammata ge'reewo, me"enna lalo adhite hadhu.

³⁹Gibitsetenni fultu yannara, sagale qixxeessi'ratenna shiisheenna tima ga'nate yanna afidhinokki daafira, Gibitsetenni adhite fultinoha liisamino gide tima ga'nitu.

⁴⁰Israeele Gibitsete gobbara heedhinohu 430 dirooti.

⁴¹Shoolu xibbinna sajjuu diri wo'mita, Kaaliiqi manni ga're baala Gibitsete gobba agurte fultino.

⁴²Kaaliiqi mannasi uurre agare Gibitsetenni hashsha fushshino; kunnira, ilamate ilama geeshsha Israeele hakko hashsha diru dirunkunni Kaaliiqa ayirrisate goxxukkinni galtanno.

⁴³Kaaliiqi Musenna Aarooni, «Mararrote Ayyaana ayirrinsanni gari togooti: Mittuno wole gobba manchi Mararrote Ayyaani sagale itoonke;

⁴⁴woxunni hidhitinoonni borojjichi kayinni, balaxe barciminoha ikkiro itona.

⁴⁵Gobbate wosincho ikkinohunna kiranyu itoonke.

⁴⁶Sagale qinshoonni mine ittinannita ikkinnina, haadhine gobbara fushshitinoonte; gorritinoonni saada miqqano hiiqqaqqitinoonte.

⁴⁷Israeelete songo baala konne ayyaana ayirrisso.

⁴⁸Kayinnilla barciminokkihu mittuno itoonke; wole gobba manchi giddo'ne hee'rironna Kaaliiqiha Mararrote Ayyaana ayirrisa hasi'riro, balaxxine minesi noo labballo baala barcimshiishshe. Hakkunni gedensaanni, gobbate beetti gede kiirame Mararrote Ayyaana ledo'ne ayirrisona.

⁴⁹Konne ayyaana ayirrisate uyinoonni seera, ki'neno gobba'nera hee'ranno mannino mittu garinni wonshitinanni» yiinsa.

⁵⁰Israeelete manni, Kaaliiqi Musenna Aarooni widoonni qole uyino hajajo baala wonshi.

⁵¹Hakko barra, Kaaliiqi Israeelete manna ga're ga'rentenni Gibitsete gobbanni haa're fushshi.