Read Sidama_Qullaawa _Maxaafa FULO 16 Bible Online

FULO 16 - Sidama_Qullaawa _Maxaafa bible

FULO 16

¹Israeele Eliiminni ka'e hadhu; Gibitsete gobbanni fultuhunni layinki aganira tonaa ontikki barra Eliiminna Siina ilaalla mereero noohuwa Siini yinanni halalla martu.

²Israeele baalanti halalla Museranna Aaroonira gunguntanni,

³«Ninke baalanka hudetenni guddinankera halallira fushshitininke? Maalu midaano mule ofollinoommoro nafa, sagale inte duumbeemmo. Kaaliiqi mayira Gibitsete gobbara hee'neennanni shee guda giwinke!» yitu.

⁴Kaaliiqi Musera, «Hajajo'ya agadhitannoronna hooggannoro afate iiminni sagale dirriseemmona, mannu barru barrunkunni fule hakko barrira ikkitannota calla gamba assi'rona.

⁵Leelki barra kayinni, wolu barrinni roorse 2 anga gamba assi'rona» yiisi.

⁶Kunnira, Musenna Aarooni Israeelete manni baalunkura, «Gibitsete gobbanni fushshino'nehu Kaaliiqa ikkinota techo hashsha affinanni;

⁷soodanno woyiteno Kaaliiqi ayirrinye leellishanno xawaabba la'inanni; ninke isi yiinore calla assineemmore ikkinoommo daafira, gunguntinoonnihu isiraati ikkinnina dininkeraati» yitunsa.

⁸Museno daware, «Kaaliiqira mageeshshi geeshsha gunguntinoonniro macciishshino; kunnira hawarro maala, soodono sagale hasidhini geeshsha itisanno'ne; aanno'nehu Kaaliiqaatina, ninke assine anfeemmori dino; gunguntinoonnihuno dininkeraatina Kaaliiqiraati» yii.

⁹Muse Aaroonira, «Israeelete manni baalaho, ‹Gunguntinoonnita afinona Kaaliiqiwa shiqqi yiiyye› yite kulinsa» yii.

¹⁰Aarooni Israeelete manni baalunkura coyi'ranni hee'reenna, insano alba halallitte gobba widira higge shawwu yitu; Kaaliiqi ayirrinye leellishanno xawaabbino gomichu aana leelli.

¹¹Kaaliiqino Musera,

¹²«Israeelete manni gunguminoeta macciishshoommona, ‹Hawarro maala ittinanni; soodanno woyiteno hasidhini sagale duubbinanni; ani Magano'ne Kaaliiqa ikkoommotano affinanni yiino› yite kulinsa» yiisi.

¹³Hawarro heeyyahe dagge qacha wo'mitu; soodanno woyiteno qacha baalaho loju uwe no.

¹⁴Uwino loji giggilihu gedensaanni, baattote aana tattayinsoonni waasi gede ikke leelli.

¹⁵Israeelete manni afe egenninokkire ikkino daafira insa insanaa, «Kuni maati?» yite xa'mitu. Museno, «Tini Kaaliiqi ittinara uyino'ne sagaleeti.

¹⁶Mitti mitti'ne ikkanno'ne geeshshiha gamba assidhe; mine'ne noo manni kiironni mittu mittunkura shiimu saffi wo'ma gamba assidhe» yiinsa.

¹⁷Israeelete manni, mitu shiima mitu lowoha gamba assi'ri.

¹⁸Saffunni bikkitanno woyite, lowoha gamba assi'rinohura wo'me digatino; shiima gamba assi'rinohurano dixeino; baalunku gamba assidhinohu hasiisannonsa geeshshiha ikki.

¹⁹Museno, «Tenne sagale ayino ga'ara gashshi'roonke» yiinsa.

²⁰Mitu mitu manni kayinni, Muse yiinota giwe layinki soodora gashshi'ri; gashshidhinorihu da'muule bowi; Museno hanqinsa.

²¹Mannu baalunku hakko barrira ikkannoha gute gute fule gamba assi'ri; gatinohu arrishsho iibbitu yannara shiile goofi.

²²Leelki barra 2 anga assite 2 saffe ikkitanno sagale gamba assidhu. Albisootinsano tenne dagge Musera kultusi.

²³Isino daware, «Ga'a barri Kaaliiqira aamaminohonna Fooliishshote Barraati.[7] Ga'nitinanni tima techo ga'ne; gafidhinannireno techonni gafidhe; gatinoha beekkine ga'ara gashshidhe» yiinsa.

²⁴Muse hajajinte gede gatinoha ga'ara gashshidhu; gashshidhinohuno dibowino; diinoda'muulino.

²⁵Muse, «Techo Kaaliiqi Fooliishshootina itte; techo sagale gobba diafidhinanni.

²⁶Kunni daafira, leyunku barrinni gamba assidhe; lamalki barri kayinni, Fooliishshote Barra ikkinohura sagale diheedhanno» yii.

²⁷Lamalki barra mitu mitu manni gamba assi'rara fuli; kayinnilla mittoreno diafi'rino.

²⁸Kaaliiqi Musera, «Hajajo'yanna seera'ya macciishshitinannikkihu mamooti geeshshaati?

²⁹Fooliishshote Barra oommo'neta affe; kunni daafira, leelki barra 2 barrira ikkitanno sagale oommo'ne; lamalki barra, ayino noowiinni kae hajamoonke» yii.

³⁰Kunnira, mannu lamalki barra fooliishshi'ri.

³¹Israeele hattenne sagale Menna yitu. Kunirichi, waajjo manii'ra guma lawanno; coommillisino malawu qaso gedeeho.

³²Museno, «Kaaliiqi hajajino coyi konneeti: Gibitsete gobbanni fushshummo'ne yannara halallitte gobbara heedhineenna itisoommo'ne sagale dagganno ilama la'anno gede, mitto saffe wo'ma haadhe maaxi» yii.

³³Museno Aaroonira, «Dagganno ilama la'anno gede, mitto saffe wo'manno menna haadhe gambayichu giddo Maganu albaanni wori» yii.

³⁴Kaaliiqi Muse hajajinosi garinni, maanxe worranni gede Aarooni masse Gondooru Taabootira[8] albaanni wori.

³⁵Israeelete manni, hee'ranno gobba Kana"aanita mare iilla geeshsha, 40 diro wo'ma tenne sagale itanni hee'rino.

³⁶Mittu saffi gimboolaho tonnikki anga ikkanno.