Read Sidama_Qullaawa _Maxaafa FULO 17 Bible Online

FULO 17 - Sidama_Qullaawa _Maxaafa bible

FULO 17

¹Israeelete manni baalunku Kaaliiqi hajajonni basetenni base sa"anni Siini yinanni halallinni agure ha're, Refidiimi yinanniwa mare baxxisi'ri; ikkollana hakkiicho anganni wayi dino.

²Kunnira Mannu, «Angeemmo waa uyinke?» yaanni Musera gungumi. Museno, «Ane mayira boroortinannie? Kaaliiqano mayira jiffinanni?» yiinsa.

³Mannu kayinni waa goo're noo daafira, «Ninkenna oosonke, saadankeno hada goo'rotenni shaattonkeraati Gibitsetenni fushshittonkehu?» yaanni Musera gungumi.

⁴Museno, «Kinchunni gante shitaeraatina konne manna hiisso?» yaanni Kaaliiqiwa hige raari.

⁵Kaaliiqi Muse, «Shiima Israeelete geerra anga haadhe, mannaho albaanni sai; Abbayi Waa ganitto siqqono anga haa'ri.

⁶Ani Siina Ilaalira kinchu aana albakkiinni uurreemmo; atino hakkonne kincho ganatto; mannu aganno wayino kinchu giddonni fulanno» yiisi. Muse Israeelete geerri la'anna Kaaliiqi yiinosi gede assi.

⁷Hakko dargira, Maasahinna Meriiba [9] yine su'ma fushshini. Hatto yinoonnihu, «Kaaliiqi ledonke noonso dino?» yitanni Kaaliiqa jiffinohuraatinna abbooshshidhinohuraati.

⁸Amaaleqootu Refidiimi yinanni darga Israeele qassu.

⁹Muse Iyyaasura, «Ani ga'a Maganu siqqo anga haa're mare ilaalu aana uurreemmona, ati shiima manna adhite fulte Amaaleqootu ledo olami» yii.

¹⁰Iyyaasuno Muse yiino gede fule Amaaleqootu ledo olami; Muse, Aarooninna Hoorino gaaru aanira fultu.

¹¹Muse anga gotti assanno kiiro Israeele qeeltu; angasi dirrisanno woyite kayinni Amaaleqootu qeeltunsa.

¹²Musera anga xissitusita, Aarooninna Hoori ofollanno kincho haadhe shiqishshusi; insano ka'aanna kawaa higge arrishsho e'a geeshsha anga irkissusi.

¹³Kunni garinni Iyyaasu Amaaleqoota shakki asse gudi.

¹⁴Kaaliiqi Muse, «Amaaleqootu taraare baattote aaninni co'o asse gudammoraatina, konne coye qaaggote maxaafira borreessi; Iyyaasurano kulisi» yii.

¹⁵Muse kakkalote darga seekke, hakko dargirano, «Kaaliiqi Qeellete Malaate'yaati» yee su'ma fushshi.

¹⁶Qoleno, «Kaaliiqiha qeellete malaate gotti assitine amadde! Kaaliiqi Amaaleqoota hegere geeshsha qasanno» yii.