Read Sidama_Qullaawa _Maxaafa FULO 18 Bible Online

FULO 18 - Sidama_Qullaawa _Maxaafa bible

FULO 18

¹Midiyaami qeesichi Muse balli Yootoori, Maganu Gibitsetenni haa're fushshinsa woyite, Museranna mannisira Israeelete assinonsare baala macciishshe,

²Muse agure ha'rinota galtesi Sephaaranna,

³oososi Gershoominna Aliaazaari haa're abbi. Muse, «Manni gobba manna ikke hee'roommo» yee bayiru beettisira su'ma Gershoomi yee fushshino.

⁴Hattonni, «Anni'ya Magani Kaaliiqi kaa'linoe; Feriooni angannino gatisinoe» yee layinki beettisi su'ma Elieezeeri[10] yiino.

⁵Yootoori Musera, «Ani galtekkinna oosokki danganni hee'noommo» yee balaxe sokka soyino.

⁶Yootoori Muse galte oososi ledo haa're, baxxisi're noowa halallitte gobba Maganu ilaaliwa kae dayi.

⁷Museno fule ballisinni xaade, albasiinni heeshshi yii; hakkiino kae sunqe daae yiisi. Mimmitonsa keere haadhuhu gedensaanni dukkanu giddora e'u.

⁸Muse, Kaaliiqi Israeelete daafira yee Feriooninna Gibitsete manni aana assinore baala kulisi. Qoleno doogote aana xaaddinonsa mitiimmanna hakkiichinnino Kaaliiqi asse gatisinonsa gara hasaawisi.

⁹Yootoori konne coye baala macciishshita lowo geeshsha tashshi yeennasi,

¹⁰«Feriooninna Gibitsootu anganni gatisino'nehu, mannasino borojjimmatenni fushshinohu Kaaliiqi galatamo.

¹¹Gibitsootu aana'ne boo'nitino boo'na lae angansanni gatise fushshino'nena, Kaaliiqi maganna baalanta roorinota xa afummo» yii.

¹²Hakkunni gedensaanni, Yootoori shilqote kakkalonna wole kakkalono Maganoho qixxeessi. Aarooninna Israeelete geerri baalunku Maganu albaanni Yootoori ledo sagale ittara gamba yitu.

¹³Layinki soodo Muse mannaho coye afara ofolli; isino soodonni hawarro geeshsha mannu coye coyi'ranni hosi.

¹⁴Yootoorino Muse assinore lae, «Ati hiikkitanni nootto? Mannu soodonni hawarro geeshsha ate doyisse uurre hosanna callikki coyi'rattohu mayiraati?» yiisi.

¹⁵Muse ballisira daware, «Maganu hedo xa'mi'rate mannu anewa daanno;

¹⁶coyi hee'rannonsa woyiteno anewa dagganno; coyensa afeemmohuno aneeti; Maganu woganna Maganu seerano egensiiseemmonsa» yiisi.

¹⁷Yootoorino, «Kuni assatto coyi doogimalete.

¹⁸Kuni coyi callikkira bati'rannohe daafira, atino mannuno daafurtinanni; konne baala callikki assattora didandaatto.

¹⁹Xa ani amaaleemmohere macciishshi: Maganu ledokki hee'rona, ati mannu daafira Maganu albaanni uurri; coyensano haadhe Maganunniwa shiqqi assi;

²⁰wogasinna seerasino rosiisinsa; heedhanno garanna assitannoreno kulinsa.

²¹Qolteno, mannu giddonni egenno afidhinore, Magano waajjitannore, addaxxinannirenna hanaaqo gibbannore doori; insa giddonnino 1,000 roorricha, 100 roorricha, 50 roorrichanna 10 roorricha assite wori.

²²Insano mannu coyi'ramanno yanna baalantera coye affanno gede assi; atewa qarrisino coye calla haadhe abbitona; shiima coye kayinni insa la'ona; insa kunni garinni beeqqiteenna, atera duhu shotannohe.

²³Togo assittoronna tinino Maganu hedo ikkitannoha ikkiro, atino daafurunni gatatto; mannu baalunkuno coyesi tidhe keerunni minisira higanno» yiisi.

²⁴Museno ballisi coye macciishshe, yiinosire baala assi.

²⁵Israeelete giddonnino egenno afi'rino manna doori; doorantinori: 1,000 roorrootaati, 100 roorrootaati, 50 roorrootaatinna 10 roorrootaati.

²⁶Insano wo'manka woyite mannaho coye affannore ikkitu; qarrisinonsaha Musewa haadhe abbitanni, shiimmaadda coye kayinni insanni guddu.

²⁷Muse Yootoori geegiisseenna galagale gobbasi ha'ri.