Read Sidama_Qullaawa _Maxaafa FULO 19 Bible Online

FULO 19 - Sidama_Qullaawa _Maxaafa bible

FULO 19

¹Israeele Gibitsetenni fultuhunni sayikki aganira umi barra Siina Ilaali mule noo halalla iillitu.

²Hakkiira dagginohu Refidiiminni ka'eeti; hakkiira iillituhu gedensaanni ilaalaho albaanni baxxisidhu.

³Museno Maganu ledo xaadara ilaalu iimira fuli; Kaaliiqino ilaalu iima hee're woshshe, «Yaiqoobi sirchira Israeelete:

⁴Gibitse assummotanna, ki'neno caacurresi qoolunni hanqafe duqqanno allamurchi gede asse abboommo'neta affinoonni.

⁵Xaano anera hajajantinironna gondooro'ya agadhitiniro, baatto baalate aana noo manniwiinni baxxitine ki'ne ane manna ikkitinanni;

⁶anera qullaawoota ikkitine gashshooti'yara qeesimmatenni soqqantinannie yii. Konneno Israeelete manni baalaho kulatto» yiisi.

⁷Muse ilaalu aaninni dirre geerra woshshe gamba asse, Kaaliiqi yiinosire baala kulinsa.

⁸Mannuno mitto afoo ikke, «Kaaliiqi hajajinoha baala assineemmo» yee dawari. Museno mannu coy'rino coye Kaaliiqira egensiisi.

⁹Kaaliiqi Musera, «Mannu ate ledo hasaawanna macciishshanno gedenna wo'manka woyite yaatto coye baala ammananno gede tunsino gomichi giddo hee're atewa dayemmo» yiisi. Museno mannu yiinota Kaaliiqira kuli.

¹⁰Kaaliiqi Musera, «Mannunniwa marte techonna ga'a keeraa'mitanno gedenna imaanansano hayishshidhanno gede kulinsa.

¹¹Sayikki barra mannu wo'munku la"anna Siina Ilaali aanira dirreemmo daafira qixxaawona.

¹²Mannaho sa"annokki gede danna worte, ilaalu iimira giddannokki gedenna mulira nafa shiqqi yaannokki gede kuli; ilaala kisannohu reyanno.

¹³Ilaala kisannoha mannano ikko moyicho kinnatenni ganne woy bagadunni qanse shino ikkinnina ayino angatenni kisoonke. Ilaalu iimira fula dandiinannihu, buudu xurumba ufuunfanni woyite callaati» yiisi.

¹⁴Muse ilaalu iiminni dirre, mannu keeraa'mannonna imaana hayishshi'ranno gede kulinsa.

¹⁵Qoleno, «Sayikki barrira qixxaabbe; meyatenniwano shiqqi yitinoonte» yiinsa.

¹⁶Sayikki barra beleqonna banqo tunsino gomichonna lowoha buudu xurumbi luulo macciishshini; qachaho noo manni baalunku waajje huxi'ri.

¹⁷Muse manna Maganu ledo xaadisate noo qachinni haa're fushshe, ilaalu lekkaalloonni masse uurrisi.

¹⁸Kaaliiqi giiratenni dirrino daafira, Siina Ilaala wiliile guggushshitu; ilaalu aaninni ka'anno wiliile boosonni fultannota labbanno; ilaaluno gudisame huxi'ri.

¹⁹Buudu xurumbi luuli lowo geeshsha bati'ranno woyite Muse coyi'ri; Maganuno belequnni dawarisi.

²⁰Kaaliiqi Siina Ilaali aanira dirre, Muse ilaalu umi aanira maranno gede woshshisi; Museno kae mari.

²¹Kaaliiqi Musera, «Dirrite, ane la"ara danna qaafe sae lowo manni goofannokki gede kulinsa.

²²Anewa shiqqanno qeese nafa, gudeemmonsakki gede insanaa keereensidhona» yiisi.

²³Muse Kaaliiqira, « ‹Ilaalu gaangaawira danna wortine anera baxxinoha asse"e› yoottonke daafira, mannu ilaalu aanira digiddanno» yii.

²⁴Kaaliiqi, «Dirrite Aarooni haadhe amo; qeesootunna mannu kayinni reyannona worroonni danna saoonke; giwe sairo kayinni gudeemmonsa» yiisi.

²⁵Museno dirre konne coye mannaho kuli.