Read Sidama_Qullaawa _Maxaafa FULO 22 Bible Online

FULO 22 - Sidama_Qullaawa _Maxaafa bible

FULO 22

¹«Mittu manchi booto woy ge'recho moore gorriro woy hiriro, bootu darga 5 bootta, ge'rechote darga 4 ge'reewo baatona.

²Mooraanchu mine umanna anfe shiniro, shii manchi dixa'mamanno;

³barra mooranna afe shiiro kayinni xa'mamanno. Aye mooraanchino moorinore qolona. Moorinore qola hoogiro, hakko darga umisi borojjimmatenni soqqamona.

⁴Moorino saada angasi amandiro kayinni, moorinoricho 2 anga asse qolona.

⁵«Ayee manchino manni jajjira woy woyinete kaashshira saada qole aguriro, itamino jajjira seyinoha umisi jajja riqiwona.

⁶«Mittu manchi gatesi qasino giira ishinu aanaanni higge sa'e wolu gate ataachinoonniha woy uurre noo gide itturo, giira qasino manchi itamino jajja riqiwona.

⁷«Mittu manchi wolu manchiwa wodhino woxe woy jajja mooraanchu adhironna adhino mooraanchino leelliro, hakko mooraanchi mooraminohu darga 2 anga asse qolona.

⁸Mooraanchu leella hoogiro kayinni, jajja maaxara uyinoonni manchi, magansi'nanniwa shiqe jajja isi umisi adhinokkita xaare egensiisona.

⁹Bootu, harrichu, ge'rechu, imaanu woy wolurichi baeenna 2 manni coyi'rame, ‹Kuni aneho› yitanni mimmitinsawa moromamanturo, magansi'nanniwa martona. Maganu, ‹Sayisino!› yaannosihu ku'unnira 2 anga asse oona.

¹⁰«Mittu manchi jaalisiwa harricho, booto, ge'recho, woy wole saada wodhiro, hatte saadano reyituro, gawajjanturo woy anfikkinni adhanturo,

¹¹wodhinoonni manchi kayinni adhinokkita ane albaanni xaare egensiisona. Saadate annino xaaro macciishshe agurona. Ku'u manchino ba'ino saada riqiwoonke.

¹²Saada wodhinoonnihu anganni adhantinoha ikkiro kayinni, wodhinoonni manchi annaho saadasi riqiwona.

¹³Saada moyichu itinoha ikkiro, cage abbe leellishona; itantino saada kayinni riqiwoonke.

¹⁴«Mittu manchi woluwiinni argi'riro saada annu mule nookkiha gawajjanturo woy reyituro, saadate annino ledo nookkiha ikkiro argi'rinohu annaho qole riqiwona.

¹⁵Argi'noonnirichi bai yannara annu ledo nooha ikkiro kayinni riqiwoonke. Kiraho uyinoha ikkirono adhino kirinni gatona.

¹⁶«Mittu manchi mitte huucci'noonnikki beetto xagare macca huniro, mii'ne adhe galtesi assi'rona.

¹⁷Beettote anni adhannota giwiro kayinni, seemo beettora miinnanni geeshshi woxe annisera oona.

¹⁸«Bittanno mancho lubbotenni heedhannokki gede shinona.

¹⁹«Saadate ledo siimu xaadooshshe assannoha shinona.

²⁰«Ane Kaaliiqi ka'a wolu maganira kakkalannohu lubbotenni hee'roonke.

²¹Ki'ne umi'ne Gibitsete gobbara heedhinoonni yannara, manni gobba manna ikkitine heedhinoonni daafira, manni gobba manna okkitinoonte.

²²Gunnootanna buxo gadadissinoonte.

²³Qarrissineennansa anewa higge raarturo, ani raarensa macciishshe kaa'leemmonsa;

²⁴ki'nerano lowo geeshsha hanqe, bagadunni gooffinanni gede asseemmo'ne; meenti'ne gunnoota, ooso'neno anniweeloota ikkitanno.

²⁵«Manni'ya giddonni ledo'ne hee'ranno buxichira liqiissitiniro, qallo adhitinoonte.

²⁶Mittu manchi imaanasi amadisiisi'nero, arrishsho e'ukkinni qollesi.

²⁷Woliri noosikki daafira, diphe galannore diafi'rino; anewa hige raariro, ani marareemmoha ikkoommo daafira raaresi macciishsheemmo.

²⁸«Magano xontinoonte; gashshanno'neha runtinoonte.

²⁹Gidunniha, woyinennihanna ejersu zayite laalcho anera aa habbinoonte. Ooso'ne giddonnino bayira beetto anera uuyye"e.

³⁰Lali'nenna ge'reewi'ne giddonnino umo qalaminoha anera uyitinannie. Qalaminohu 7 barra amasi ledo keeshsheenna settikki barra abbitine uyitinannie.

³¹Ki'ne anera qullaawa manna ikkitinoonnie daafira, moyichu shiino saada maala woshshaho uuyye ikkinnina ittinoonte.