Read Sidama_Qullaawa _Maxaafa FULO 27 Bible Online

FULO 27 - Sidama_Qullaawa _Maxaafa bible

FULO 27

¹«Seendille 5 cigile, godowa 5 cigilenna hojja 3 cigile ikkannoha kakkallanni darga waaccote haqqinni seekki.

²Shoolente maddera umoho buudda wori; buuddano kakkallanni dargi ledo mitteenni seekkite aanaho camo xalli.

³Buluulo worranni midaanna, buluulo fushshinanniricho, kerra, qarabbanna giira worranni bacceno qixxeessi; baalanka uduunne camotenni seekki.

⁴Buluulo sayisannoha meemmaamo uduunnicho camotenni seekki; hakko uduunnichira shoolente maddera camote kasa wori.

⁵Buluulo sayisanno uduunnicho kakkalote uduunnichira mereeroho goorosira woroonni qolte wori.

⁶Kakkalote uduunnicho dunkanni dawaayye waaccotenni seekkite aanaho camo xalli.

⁷Kakkalote uduunnicho dunkanni yannara, dawaayyu lamenka widoonni hee'ranno gede, kassate giddoonni qolte sayisi.

⁸Ilaalu aana leellishummohente gede, kakkalote uduunnicho seekkite giddoyido fano assi.

⁹«Dukkanaho nafaru hee'rona; wodiidi widoonni mittu ragira fila shalonni seekkinoonnita seendille 100 cigile ikkitanno dukko wori;

¹⁰camotenni seekkinoonniti 20 tuuqqanna 20 lekkuwa heedhosina; tuuqqate dereersuwanna farquwa birrunni seekkinona.

¹¹Aliyye widoonnino hatto assi.

¹²Galchimi widoonni seendille 50 cigile ikkitanno dukkuwara, 10 tuuqqanna 10 lekkuwa heedhonsana.

¹³Nafaru soojjaati ragaanni godowa 25 qaafo ikkona.

¹⁴E'nanniwa mitto widoonni noo dukkuwa godowa 15 cigile assineenna, 3 tuuqqanna 3 lekkuwa heedhonsana.

¹⁵Wole widoonni noo dukkuwano godowa 15 cigile assineenna, 3 tuuqqanna 3 lekkuwa heedhonsana.

¹⁶Nafaru waalchirano bule, xiillittenna duume fila shalonni seesiinse seekkinoonniti 20 cigile dukko heedhosina; dukkoteno, 4 lekka afidhinoti 4 tuuqqa heedhosena.

¹⁷Nafaru qooxeessira noo tuuqqa baalantera birru dereersuwa, birru farquwanna camote lekkuwa heedhonsana.

¹⁸Nafaru hojja 50 qaafo, godowa 25 qaafo ikkona; dukkote hojja 5 cigile ikkitona; tini dukkono fila shalonni seekkinoonnitanna lekkuwaseno camonnita ikkitona.

¹⁹Dukkanu giddo noo uduunni baalu, dukkanunnitinna nafari ciffa baala camotenni seekkinoonnita ikkitona.

²⁰«Caabbichu wo'manka woyite xawanno gede huuncine ximbiimboonnita ejersu zayite haa're abbanno gede Israeelete mannira kuli.

²¹Xaadu Dukkanira Gondooru Taabooti albaanni noo dukkora gobbaanni Aarooninna oososi caabbicho hawarrinni kayise sooda geeshsha ane albaanni xawanno gede assitona; Israeelete mannirano ilamate ilama geeshsha woga ikkonsana.