Read Sidama_Qullaawa _Maxaafa FULO 28 Bible Online

FULO 28 - Sidama_Qullaawa _Maxaafa bible

FULO 28

¹«Rodookki Aarooninna oososi Naadaabi, Abihu, Aliaazaarinna Itaamaari Israeelete manni giddonni badde qeese ikkitannoe gede atewa shiqqi assi.

²Rodiikki Aaroonira gaamaarretenna biinfilleho ikkannosi gede qeesimmate imaana qixxeessisi.

³Aarooni anera baxxe qeesimmatenni soqqamannoe woyite uddi'ranno imaana gantanno gede, imaana ganate ogimma oommonsare woshshi.

⁴Rodiikki Aarooninna oososi uddidhe qeesimmatenni soqqantannoe gede, gagasu kiise, gagasu uddano, hiito, qamise, muraamurritte shamisenna xaaxi'nanni koffiya qixxeessinonsana.

⁵Imaana gantanno ogeeyyeno bule, xiillitte, duumenna culkaame heqonni seesiisse seekkitona.

⁶«Gagasu uddanono bule, xiillitte, duumenna culkaame heqonni seesiisse seekkitona.

⁷Lamenka widiido xaade, lamunku qotira hosanno hoccono worrona.

⁸Aanaanni qodhinanni gede bule, xiillitte, duumenna culkaame heqonni gannoonnita gagasu uddano ledo amadisiinsona.

⁹Lame dilqa kincho haadhe tonaa lamunku Yaiqoobi ooso su'ma aanaho borreessi;

¹⁰ilamansa garinni, 6 su'ma mittu kinchi aana, gatinoha 6 su'ma layinki kinchi aana borreessi.

¹¹Seesiisanno ogeessi gede assite, tonaa lamunku Yaiqoobi ooso su'ma lamunku kinchi aana borreessi; kinnate aanano culku migira seekki.

¹²Israeelete mannira qaaggote ikkanno gede, lamenka kincho gagasu uddano aana noohura lamunku qoti kasira usuri. Kunni garinni ani Kaaliiqi manni'ya su'ma qaageemmo gede Aarooni qotisira duhe uurranno.

¹³Lame culku migira ledde kasu aana seekki;

¹⁴sissillaminoha 2 filu culki meqeerraasincho kasu ledo xaadisi.

¹⁵«Maganu hedo xa'mine anfannita gagasu kiise seekki; iseno gagasu uddano gede bule, xiillitte, duumenna culkaame heqonni seesiisse seekki.

¹⁶Hojjano godowano mitte mitte taakko assine taashshine errona.

¹⁷Dilqa kincho 4 dira assite wori; umi dirira duumo dilqa, baqqala dilqanna daama xawado dilqa wori;

¹⁸layinki dirira haanja xoxxorraamo dilqa, bule dilqanna hincilaallaamo dilqa wori;

¹⁹sayikki dirira duumo dilqa, daama xoxxorraamonna xiillicha dilqa wori;

²⁰shoolki dirira bule dilqa, burcuqqaamonna haanja dilqa wori; baalunku gaangaawira culku xiyyo wori.

²¹Tonaa lamente Yaiqoobi ooso su'minni seekkine bonce borreessinoonniti 12 dilqu kinna malaate ikkite heedhona.

²²Gagasu kiisera filu culkinni sissilline seekkinoonni meqeerraasincho wori.

²³Lame culku cuue seekkite, gagasu kiisera lamenka widoonni wori.

²⁴Sissillinoonnire lamenka culku meqeerraasine, gagasu kiise widoonni noo cuu'a lamente giddora eessi.

²⁵Lamunku meqeerraasinchi birxe lamunku migiri ledo amadisiisse gagasu uddano kasi albiidihu ledo xaadisi.

²⁶Lame culku kasa seekkite, gagasu uddanora aante noo kiise gagasunnite ledo xaadisi.

²⁷Ledde 2 culku kasa seekkite, gagasu uddanora albaanni qotu aanaanni hige dirrinohu gagasu uddano kasi ledo amadisiisse, seesiinse goondoonni hiito ledo xaadisi.

²⁸Gagasu kiise lollongitannokki gede, aanase noo kassa gagasu uddano aana noote ledo xaadisse bulu heqichinni usuri.

²⁹Aaroonino Qullaawu Minira eanno woyite, ane Kaaliiqi albaanni qaagantanni heedhanno gede tonaa lamente Israeelete ga're su'muwa borreessinoonnita tenne gagasu kiise wodanisi aana duhona.

³⁰Aarooni Kaaliiqiwa eanno woyite, Uriiminna Tumiimi yinannire gagasisi kiisera worteenna, ani Kaaliiqi Israeelete qoleemmo dawaro egensiisate wodanisi aana duhona.

³¹«Gagasu uddanora giddoonni uddi'nanni qamise dana gudisse bule ikkitona.

³²Aleenni goowa worre, dadhantannokki gede goowu laayyo hiiqqine gombona.

³³Woriidi handaarira qaccetenni qaccete geeshsha bule, xiillittenna duume shalonni shaffo seekkite, mereeroho culku bilbilla qaamo qaamo assite wori.

³⁴Culku bilbilanna shaffo qaamo qaamo worranni, qamisete handaarira qaccetenni qaccete geeshsha dirrona.

³⁵Aarooni qeesimmatenni soqqamanno woyite tenne qamise uddi'rona; ani noommowa Qullaawu Dargira eannonna fulanno woyite qilleette macciishshantanno daafira reyotenni gatanno.

³⁶«Filu culkinni migira seekkite, «Kaaliiqira baxxinoho» yite borreessi.

³⁷Konne migirano, xaanxoonni koffiyira albaanni bulu heqichinni rarraasi.

³⁸Aarooni albi aana worteenna, Israeelete manni afansha shiqishanno yannara sao assiro, saonsara Aarooni xa'mameenna, ani afanshansa adheemmo gede kuni malaati albisi aana hee'rona.

³⁹«Shamise, umoho xaaxi'nanni koffiyanna hallo usudhinanni uddano dancha heqonni goonde seekkinona.

⁴⁰«Aarooni oosora gaamaarretenna seesaho ikkannonsa gede shamissa, seeda koffiyanna hallo usudhinanni uddano seekkinsa.

⁴¹Hakkunni gedensaanni, rodiikki Aarooniranna oososira uddisiisi; qeesimmatenni soqqantannoe gede buurte, qineessite qullaawoota assi.

⁴²Teedinsa leellannokki gede hunda iillitino luko gowisiisinsa.

⁴³Sao ikkeennansa reyitannokki gede, Qullaawa Mine soqqantara kakkallanni dargira martanno woyite konne imaana uddidhona; kunino Aarooniranna ilamasi baalantera woga ikkonsana.