Read Sidama_Qullaawa _Maxaafa FULO 3 Bible Online

FULO 3 - Sidama_Qullaawa _Maxaafa bible

FULO 3

¹Muse Midiyaamichu ballisi Yootoori ge'reewonna me"e allaalanni hee'ri; mitto barra, tenne saada haa're halalli qacce Korebi[5] yinanni Ilaali Maganunnihuwa dayi.

²Hakko hee'reenna, Kaaliiqi sokkaasinchi buwanni noo citi giddo hee're leellisi; Museno giira cita ittanni heedheennanni giiraminokkita afe,

³«Kuni maala'linanni coyeti; citu hiitto ikke giirama hoogino ikka? Konne coye hanni shiqqi yee laeemmo» yee hedi.

⁴Kaaliiqi Muse la"ara shiqqi yiinota afihu gedensaanni citu giddo hee're, «Muse! Muse!» yee woshshisi. Isino, «Yee!» yii.

⁵Maganuno, «Anewa shiqqi yitooti! Uurrootto dargi qullaawa ikkino daafira, lekkakkinni koattekki fushshi.

⁶Ani akaakkakki Abirihaami, Yisihaaqinna Yaiqoobi Maganooti» yiisi. Museno Magano la"a waajjino daafira alba diphi.

⁷Hakkunni gedensaanni Kaaliiqi, «Manni'ya Gibitsete gobbara qarrame noo gara laoommo; gadadissannori anganni fushshannoha hasidhe raartino raare macciishshoommo; iillinonsa qarrano afe,

⁸Gibitsootu anganni gatisammonsara dirroommo. Gibitsetenni fushshe Kana"aanootu, Hitootu, Amooraawootu, Ferizootu, Hiwootunna Iyaabuusootu heedhannota adonna malawu wo'minota hala'ladonna shaqqado baatto eemmonsa.

⁹Manni'ya Israeelete raare seekke macciishshoommo; Gibitsootu assitanni noonsa beebba laoommo.

¹⁰Xa manna'ya Gibitsetenni fushshatto gede, Gibitsete mootewa soyemmohena amo» yiisi.

¹¹Muse kayinni Maganoho, «Feriooniwa mare Israeelete manna Gibitsetenni fushshate ani hiitto ikke dandeemmo?» yii.

¹²Maganuno daware, «Ani ledokki hee're kaa'leemmohe; Israeele Gibitsetenni fushshatto yannara, kunni ilaalira magansidhinannie; kunino ani soommoheta egensiisate malaate ikkannohe» yiisi.

¹³Museno, «Ani Israeelete manniwa mare, ‹Akaakka'ne Magani ki'newa soyinoe› yeenna, insano qolte, ‹Su'misi ayeti› yite xa'mituero mayee dawaronsa?» yii.

¹⁴Maganuno qole, «Ani noommohonna hee'reemmo Maganooti; kunnira atino, ‹Soyinoehu su'mi, «ANI ANEETI» yiino yite kulinsa› yii.

¹⁵Akaakka'ne Abirihaami, Yisihaaqinna Yaiqoobi Magani ani Kaaliiqi soommoheta Israeelete mannira kulinsa; hegere geeshsha su'mi'ya konneeti; dagganno ilama baala kunni su'minni woshshitannoe.

¹⁶Xa marte, Israeelete roorroota gamba assi; akaakka'ne Abirihaami, Yisihaaqinna Yaiqoobi Magani Kaaliiqi atera leelloommota kulinsa; insawano dirre Gibitsootu assitinonsa beebba laoommota kulinsa.

¹⁷Gibitsete gobba qarrinni fushshe Kana"aanootu, Hitootu, Amooraawootu, Ferizootu, Hiwootunna Iyaabuusootu heedhannota adonna malawu wo'mino baatto eemmo'ne yee coyi'roommo.

¹⁸«Manni'ya roorrootino coyi'rattore macciishshitanno; atinna Israeelete roorrooti Gibitsete mootewa martine, ‹Ibiraawootu Magani Kaaliiqi ninke ledo xaadino; kunnira, Maganinke Kaaliiqira kakkallammora 3 barri doogo halallitte gobba ha'neemmona fajjinke› yiiyyesi.

¹⁹Ikkollana ani giddeessummokkinni fajjanno'nekkita afoommo.

²⁰Kunnira, ani anga'ya kayise maala'linanni garinni Gibitse ganeemmo; hakkunni gedensaanni hadhinara aguranno'ne.

²¹«Fultinanni yannara Gibitsootu albaanni gaacheena eemmo'ne daafira, mulla anganni dihadhinanni.

²²Meenti'neno minensanna olliinsara noo meenti Gibitsennihuwiinni imaana, culka, birranna woleno seesu uduunne aannonsa gede xa'mi'rona; adhinoreno oosonsara labballohonna seenneho uddisiisi'ranno; kunni garinni Gibitsoota mulqitine fultinanni» yii.