Read Sidama_Qullaawa _Maxaafa FULO 30 Bible Online

FULO 30 - Sidama_Qullaawa _Maxaafa bible

FULO 30

¹«Hixaana giirranni uduunnicho waaccote haqqinni seekki.

²Hojjano godowano mitte mitte cigile ikkona; 4 baqo worreenna uurrinsha 2 cigile ikkona; shoolente madderano mitto mitto buuda worrona.

³Iimiidira, shoolenta madderanna shoolunku buudira fila culka xalli; qaccuwateno culku xiyyo wori.

⁴Xiyyote woroonni lamunku midaadira dawaayye wore duhate injaanno gede, 2 culku kasa seekki.

⁵Dawaayyeno waaccote haqqinni seekkite aanaho culka xalli.

⁶Konne uduunnicho, atenni xaadeemmowa Maarote Barcima worroonni Taabooti mule holgi dukkora gobbaanni wori.

⁷Aarooni soodo tuqa caabbiyye worranni uduunnicho feyara maranno woyite, tanni yee su'naanno hixaana wiliishshona.

⁸Hawarro tuqa Aarooni caabbiyye qasanno woyite anera hixaana giirona.

⁹Kunni uduunnichi aana hoolloonni hixaana, shilqote kakkalo, gidu fushshaate shiqishshinoonte; agattote fushshaateno isi aana duntinoonte.

¹⁰Aarooni dirunni mitte hige cubbo diwate seera wonshona; dirunni mitte hige cubbu kakkalo mundee buuddate aana buure ilamate ilama geeshsha keereensona. Kuni ane Kaaliiqira co'onta qoromboonniho» yii.

¹¹Kaaliiqi Musera,

¹²«Ati Israeelete manna kiiratto yannara, mittu mittunku manchi lubbosi woxxannore anera aa hasiisannosi; konne assituro kiirattonsa woyite qoomamu diganannonsa.

¹³Kiirote giddora einohu baalu Qullaawu Mini'ya keenaasinchi garinni, hendoonnire anera fushshaate asse oona.

¹⁴Kiiramannohu 20 diro ikkinosihunna hakkuyi alihu baalu, anera konne fushshaate oona.

¹⁵Lubbo'nera yitine fushshaate uyitinanni woyite, dureessu yinoonniwiinni roorsoonke; buxichuno hakkiinni xeisoonke.

¹⁶Cubbo agursiisate woxe Israeeletewiinni haadhe, Xaadu Dukkani hajara fushshi. Kuni cubbo'ne agureemmo'ne gede, ki'ne anera qaagiissannoha ikkanno» yiisi.

¹⁷Hakkunni gedensaanni Kaaliiqi Musera,

¹⁸«Hayishshi'nanni saane camotenni seekkite aanaho waa worte, kakkallanni darginna Qullaawu Dukkani mereero lekkaame camotenni seekkinoonni shae aana ofoshshiishi.

¹⁹Aarooninna oososi kunni wayinni angansanna lekkansa hayishshidhona.

²⁰Xaadu Dukkana e'anno yannara, kakkallanni dargira martanno yannaranna anera shilqote kakkalo uyitara dagganno yanna baalantera reyitannokki gede wayinni hayishshidhona.

²¹Reyitannokki gede angansanna lekkansa hayishshidhona; kunino insaranna ilamansara hegere seera ikkonsana» yii.

²²Kaaliiqi Musera,

²³«Fila qimame 6 kiilo, fila du'nantanno kaarbe, 3 kiilo tanni yee su'naannoha haqqu omolcho, 3 kiilo hixichonna,

²⁴lee kiilo su'niitanno haphaayyo qixxeessi; konne baalanka Qullaawu Dukkani giddo noo keenaasinchi garinni keente, aanaho 4 litire ejersu zayite ledi;

²⁵kore baalanka shittote gede karsiisse qorombannita buurranni zayite seekki.

²⁶Ane magansi'nannihura Xaadu Dukkanira, Gondooru Taabootira,

²⁷xarapheezzahonna aanasi noo uduunnira, caabbicho worranni darganna ledo uduunnira, hixaana giirranni uduunnichira,

²⁸shilqote kakkalo darganna aanasi worranni uduunnira, hayishshi'nanni saaneranna shaesera tenne zayite buuri.

²⁹Kunni garinni kore baalanka badde qullaawoota assi; konne uduunne kisannohu mannano ikko woluri baalu kuni uduunni qullaawa ikkino daafira gawajjamanno.

³⁰Hakkunni gedensaanni, Aarooninna oososi buurte qeesimmatenni soqqantannoe gede assi.

³¹Israeelete mannirano, ‹Tini qullaawa buurranni zayite ilamate ilamara ane mine soqqantanno qeesera ikkitona.

³²Leellihura baalaho buurroonke; wole tenne labbanno zayiteno seekkidhinoonte; qullaawa ikkitino daafira qorobbe.

³³Tenne gedee zayite seekkannohu woy tenne zayite haa're qeesicha ikkinokki manchira buurannohu, manni'ya ledo dikiiramanno› yiino» yiisi.

³⁴Kaaliiqi Musera, «Mimmito roortannokki gede assite su'niitanno qimamma, su'niitannota cocco'anno haphaayyo, eleellete giddonni fultanno shitto, su'niitanno haphaayyonna tanni yee su'naanno hixaana haadhe,

³⁵shittote gede karsiinsoonni hixaana seekkite, filanna qullaawa ikkanno gede maxine wori.

³⁶Shiima haadhe liiqeessite udulte Xaadu Dukkanira albaanni ate ledo xaadeemmowa giggishshi; konne hixaanano qorombanniha assi.

³⁷Umi'nera kayinni kunni gari hixaanano seekkidhinoonte. Anera qullaawa ikkinota habbinoonte.

³⁸Kunni su'niillira yee hattoo hixaana seekki'rannohu baalu manni'ya ledo dikiiramanno» yii.