Read Sidama_Qullaawa _Maxaafa FULO 37 Bible Online

FULO 37 - Sidama_Qullaawa _Maxaafa bible

FULO 37

¹Baasilaeeli waaccote haqqinni seekkino Taabooti, seendille 2 cigilenna darate, godowa 1 cigilenna darate, hojja 1 cigilenna darate ikkanno.

²Giddoonninna gobbaanni culka xalle, laayyote culku xiyyo wori.

³Shoolente maddera noo lekkuwara lame lame kassa ka'aanninna kawaanni wori.

⁴Dawaayye waaccote haqqinni seekke, culka aanaho xalle,

⁵Taaboota duhate kaa'litanno gede, dawaayye midaadoho noo kassa giddoonni qole sayisi.

⁶Filu culkunni seendille 2 cigilenna darate, godowa 1 cigilenna darate ikkinoha maarote barcima seekki.

⁷Lame kirubeeli misileno daashshinoonni culkinni seekke, maarote barcimira lamenka widoonni wori.

⁸Mitte kirubeeli misile mitto widoonni, layinkita mitto widoonni wore, maarote barcimi ledo xaadise seekki.

⁹Kirubeeli misilla qoolla ale qolte diriirsite maarote barcima guggushshite mimmitoho alba higge uurritino.

¹⁰Qoleno, waaccote haqqinni seendille 2 cigile, godowa 1 cigile, hojja 1 cigilenna darate ikkino xarapheezza seekki;

¹¹fila culka aanaho xalle, laayyote culku xiyyo wori.

¹²Laayyote, godowa mereeri angichi geeshsha ikkitanno gooro wori; goorote laayyora culku xiyyo wori.

¹³Shoole culku kassa, shoole lekkuwa noowa shoole maddera wori.

¹⁴Xarapheezza dunkanni dawaayyi giddoonni qolle sayinsanni kassa, goorote gamba yite no.

¹⁵Dawaayyeno waaccote haqqinni seekke aanaho culka xalli.

¹⁶Xarapheezzu aana worranniha addi addi uduunne: Woyinete xajje worranni saanna, xiltuwa, xiltaame saannanna maaqquwa filu culkinni seekki.

¹⁷Caabbicho worranni uduunnicho filu culkinni seekki; lekkanna sinna daashshinoonni culkinni seekki; seesu daraaro, guntuwasinna gobbayidi qoolla mitteenni seekki.

¹⁸Mitto widoonni 3, wole widoonni qole 3 asse, mitteenni 6 sinna wori.

¹⁹Leenti sinna mitte mittenti guntuwanna qoola afi'rinore ikkanna, kookennite gedeeta sase sase seesu daraaro aanaho seekkinoonnireeti.

²⁰Caabbicho worranni uduunnichi aanano, 4 kookennita labbanno daraaro, guntuwunna gobbayidi qooli ledo seekkinoonni.

²¹Sase sasente sinna hunda mittu mittu guntuwi seekkame no.

²²Guntubbanna sinna daashshinoonni culkinni caabbicho worranni uduunnichi ledo mitto assine seekkinoonnite.

²³Lamalanta caabbiyyete sinna, caabbicho worranni uduunnichonna heqo dhaambanni qarawa filu culkinni seekki.

²⁴Caabbicho worranni uduunnichonna ledosi uduunne baala seekkinoonni culki mitto gimboola (35 kiilo) ikkino.

²⁵Hixaana giirranni uduunnicho waaccote haqqinni seekki; seendille 1 cigileeti; godowa 1 cigileeti; hojja 2 cigileeti. Shoolente madde buuddano mitteenni seekkino.

²⁶Iimiidira, midaadohonna buuddate culka xalli; laayyoteno culku xiyyo wori.

²⁷Xiyyote woroonni guraanninna qiniiteenni lamenka widoonni, hixaana giirranni uduunnicho dunkanni dawaayye giddoonni qolle sayinsanniha culku kasa wori.

²⁸Dawaayyeno waaccote haqqinni seekke aanaho culka xalli.

²⁹Qullaawa buurranni zayitenna tanni yee su'naanno hixaana shittote gede asse karsiise seekki.