Read Sidama_Qullaawa _Maxaafa FULO 38 Bible Online

FULO 38 - Sidama_Qullaawa _Maxaafa bible

FULO 38

¹Seendille 5 cigile, godowa 5 cigile, hojja 3 cigile ikkinohanna shoolenka raga taalinoha shilqote kakkalo kakkallanni uduunnicho waaccote haqqinni seekki.

²Shoolente maddera buudda wori; buuddano mitteenni seekke, aanaho camo xalli.

³Buluulo worranni midaanna, buluulo fushshinannita, xiltaame saane, qarabbanna giira giirranni uduunne baala camotenni seekki.

⁴Buluulo sayisannoha meemmaamo uduunnicho kakkalote uduunnichira halloho goorote woroonni wori.

⁵Kakkalote uduunnicho duhate dawaayye giddoonni qolle sayinsannita camote kassa shoolente maddera seekki.

⁶Dawaayyeno waaccote haqqinni seekke, camo aanaho xalli.

⁷Kakkalote uduunnicho dunkanni dawaayye lamenka widoonni noo kassa giddoonni qole lulluqqisi. Isono giddoyido fano asse badiraamu haqqinni seekki.

⁸Hayishshi'nanni saanenna shaese camotenni seekki; tenne saane, Dukkanu nafara soqqamanno meenti abbino hincilaallo camonnitenni seekkinoonni.

⁹Kaaliiqi Dukkani nafarira ikkitanno dukkuwa danchu hoccinni seekkino. Dukkote seendillino wodiidi ragaanni 100 cigileeti.

¹⁰Dukko tuunqannita 20 tuuqqa lekkuwansa ledo camotenni seekki; tuuqqate aani qarabbanna daabbuwano birrunni seekki.

¹¹Aliyye widiidi nafarino hakko garinni seekkinoonniho.

¹²Galchimi widoonni seendille 50 cigile ikkitanno dukkuwa no; insarano 10 lekkuwa afidhinoti 10 tuuqqa noonsa. Tuuqqateno birrunni seekkinoonni qarabbanna daabbuwa noonsa.

¹³Soojjaati widoonni noohu albiidi nafari hala'linye 25 qaafooti.

¹⁴Lamunku widiidi xullichi dukkuwa tonaa onte, tonaa onte cigileeti; insarano sase sase tuuqqanna sase sase lekkuwa noonsa.

¹⁶Nafaru gaangaawira noo dukkuwa baalanti danchu hoccinni seekkinoonnite.

¹⁷Tuuqqate lekkuwa camotenni seekkinoonnite; tuuqqate qarabbanna daabbuwa kayinni birrunni seekkinoonnite; tuuqqate umono birrunni seekkinoonni; nafari tuuqqa baalanti birru daabbuwanni xaadinsoonnireeti.

¹⁸Nafaru xullichira noo dukko bulu, xiillichunninna duumu xilatinni qolleno danchu goondoonni hoccinni seekkinoonnite. Iseno nafari dukkuwa gede, seendille 29 cigileeti; hojja 5 cigileeti.

¹⁹Dukkoteno, 4 tuuqqanna 4 camote lekkuwa noose; qarabba, farquwanna daabbuwa birrunni seekkinoonni.

²⁰Dukkanunnitinna qooxeessaho noo ciffa baala camotenni seekkinoonnite.

²¹Kaaliiqi hajajo borreessinoonnita boncoonni kinna worranni darga Qullaawu Dukkani giddo assinannirira kaa'lanno gede, Muse hajajino garinni Leewaawootu roorrichi qeesichu Aarooni beetti Itaamaari widoonni kiirroonniti uduunnu kiiro aante noote:

²²Yihudu ga'renni Hoori beetti Uuri ilinohu Baasilaeeli, Kaaliiqi Musera hajajinore baala assi.

²³Isi ledohu Daani ga'rehu Ahisamaaki beetti Oholiaabi ogeessahonna xiinxallaho; qoleno bulu, xiillichunna duumu xilatinni goodannohonna angatenni boce seekkanno ogeessaati.

²⁴Kaaliiqira uyinoonni culki mitteenni Qullaawu Mini keenaasinchi garinni 1,000 kiilo ikkanno.

²⁵Kiirroonni manni baalunkuwiinni gamba assinoonni birri keenneenna, 3,430 kiilo ikkino.

²⁶Kuni afanshi, kiirroonni manni hasiisanno deerrinni Qullaawu Mini keenaasinchi garinni uyinoho; mannu kiirri woyite, dirinsa lemoonna lemuu aleenni ikkinonsari 603,550 mannaati.

²⁷Sasu kuminna shoolu xibbi kiilo birri Qullaawu Dukkaniranna mittu xibbi dukkuwate lekkuwa goorora ikkino; mitte mitte lekkara 34 kiilo beenkoonni.

²⁸Gatinohu 30 kiilo birrinni, Baasilaeeli tuuqqate daabbuwa, qarabbanna farquwa xallino.

²⁹Qullaawu Dukkanira yine uyinoonni camo 2,425 kiilooti.

³⁰Qullaawu Dukkanira e'nanni waalchira uurrinsanni lekkuwa, kakkalote dargiha meemmaamo uduunnichonna kakkalote dargi uduunne baalanka camotenni seekki.

³¹Nafaru huxxi, e'nanni waalchi lekkuwa, Dukkanunnitinna qooxeessaho noo ciffa baala camotenni seekkino.