Read Sidama_Qullaawa _Maxaafa FULO 40 Bible Online

FULO 40 - Sidama_Qullaawa _Maxaafa bible

FULO 40

¹Hakkunni gedensaanni Kaaliiqi Musera,

²«Xaadu Dukkana umi agani eihunni umi barra qasi.

³Tonnenta hajajo amadinoha Gondooru Taabootano Dukkanu giddo worte, dukkotenni goli.

⁴Xarapheezza giddora eessite uduunne aanaho diri; caabbicho worranni uduunnichono eessite caabbiyye base basensara wori.

⁵Hixaana giirranniha culku uduunnicho holgi dukkora gobbaanni Taabootaho albaanni uurrisi; dukkono Dukkanu xullichira suti.

⁶«Shilqote kakkalo kakkallanni uduunnichono Dukkanu xullichira albaanni wori.

⁷Hayishshi'nanni saane Dukkanunna kakkalote uduunnichi mereero worte waa wonshi.

⁸Dukkanu gaangaawira nafara worte, e'nanni xullichira dukko wori.

⁹«Hakkunni gedensaanni, buurranni zayite haadhe, Dukkanahonna giddosi noo uduunni baalaho buurte, qullaawoota assi; insano qullaawoota ikkannona.

¹⁰Shilqote kakkalo uduunnichonna ledo noore baala buurte, qullaawoota assi; qullaawoota ikkannona.

¹¹Hayishshi'nanni saanenna shaeseno kunni garinni buurte, qullaawa assi.

¹²Aarooninna oososi Qullaawu Dukkani xullichira abbite seeru garinni bisonsa hayishshi.

¹³Aaroonira qullaawa imaana uddisiisse qeesimmatenni soqqamannoe gede zayite buurte anera qullaawa assi.

¹⁴Oososino abbite shamise uddisiisinsa.

¹⁵Qeese ikkite soqqantannoe gede annansa buuritto gede assite insano buuri; tini qeesimmate buurama ilamate ilamara woga ikkitanno» yiisi.

¹⁶Museno wo'manka coye Kaaliiqi hajajinosi gede assi.

¹⁷Hakkunni garinni, Israeele Gibitsetenni fultuhunni layinki diro, umi agani eihunni umi barra, Qullaawa Dukkana qasi.

¹⁸Muse Qullaawa Dukkana qasi yannara, lekkuwa wore, waalchuwanna tuuqqa uurrise, waawanna waawansi.

¹⁹Kaaliiqi Muse hajajino garinni, guggushshinanniha Qullaawu Dukkani aana diriirse, gobbayidihano aanaho diwi.

²⁰Muse boncoonni kinna masse Taabootu giddo wori; dawaayyeno Taabootu kassa giddora eesse wori; maarote barcimano Taabootu aana wori.

²¹Taabootano Qullaawu Dukkani giddora eessi. Kunni garinni Kaaliiqi Muse hajajino gede Taaboota dukko goltu.

²²Xarapheezzano Qullaawu Dukkani giddo holgi dukkora gobbaanni aliyye ragaanni wori;

²³Kaaliiqi Muse hajajino garinni, Kaaliiqiha qullaawa timano aanaho wori.

²⁴Caabbicho worranni uduunnichono Dukkanu giddo xarapheezzaho alba qole, Dukkanaho wodiidi ragaanni wori.

²⁵Kaaliiqi hajajino garinni, caabbiyye albasiinni qasi.

²⁶Culkunniha kakkalote uduunnicho Qullaawu Dukkani giddo dukkote albaanni wore,

²⁷Kaaliiqi hajajino garinni, aanaho tanni yee su'naanno hixaana giiri.

²⁸Qullaawa Dukkana e'nanni xullichira dukko wori.

²⁹Kaaliiqi hajajinosi garinni Muse, shilqote kakkalo kakkallanni uduunnicho, Qullaawu Dukkanira albaanni e'nanniwa wore, shilqonnihanna gidu fushshaate shiqishi.

³⁰Hayishshi'nanni saane Dukkanunna kakkalote uduunnichi mereero wore, waa wonshi.

³¹Hakkunni wayinni Muse, Aarooninna oososi angansanna lekkansa hayishshidhu.

³²Kaaliiqi hajajino garinni, Dukkanu giddora e'anno woyitenna kakkalote uduunnichiwa shiqqanno yanna baalantera hayishshidhanno.

³³Qullaawu Dukkaninna kakkalote uduunnichi gaangaawira nafara wori; xullichohono dukko wori. Kunni garinni Muse looso baalanka gudi.

³⁴Hakkunni gedensaanni, Qullaawa Dukkana gomichu guggushshi; Kaaliiqi ayirrinyino Dukkana wo'mi.

³⁵Dukkana gomichu guggushshinohuranna giddosino Kaaliiqi ayirrinyi wo'mino daafira, Muse Dukkanu giddora ea didandiino.

³⁶Israeele noowiinni ka'e ha'ra dandiitannohu gomichu Dukkanu aaninni ho'lanno woyiteeti.

³⁷Gomichu kae ho'la geeshsha kayinni, noowiinni dika'anno.

³⁸Halallitte doogo hadhu yanna baalantera, Israeele Kaaliiqi ayirrinyi barra Dukkana guggushshanna, hashsha gomichu giddo giira bubbanna la'ino.