Read Sidama_Qullaawa _Maxaafa FULO 6 Bible Online

FULO 6 - Sidama_Qullaawa _Maxaafa bible

FULO 6

¹Kaaliiqino Musera, «Feriooni asseemmota la"attona agari; manna'ya baxikkinni aguranno; iso giddeesse, manna'ya gobbasinni rahe ha'risanno gede asseemmo» yiisi.

²Maganu Musera, «Ani Kaaliiqaati.

³Wo'manka Dandeemmo Magano ikka'yanni Abirihaamira, Yisihaaqiranna Yaiqoobira leelloommo; ‹Kaaliiqa›[6] yinannihunni qullaawu su'mi'yanni kayinni dileelloommonsa.

⁴Manni gobba manni gede ikkite heedhinota Kana"aani gobba ragisiiseemmonsa gede hexxo oommonsa.

⁵Qoleno Gibitsootu borojjimmatenni qarrisseennansa raartino raare macciishshoommo; oommonsa hexxono qaagoommo.

⁶Kunnira Israeelete, ‹Ani Kaaliiqaati; Gibitsootu abbitino'ne shetto borojjimmannitewiinni gatise fushsheemmo'ne; anga'ya kayise bati'rino qarra insa aana dirriseemmo; ki'neno wode fushsheemmo'ne.

⁷Umi'ya manna assi'reemmo'ne; anino Magano'ne ikkeemmo; Gibitsete borojjimma giddonni fushsheemmo'ne yannara, ani Kaaliiqi Magano'ne ikkoommota affinanni.

⁸Abirihaamira, Yisihaaqiranna Yaiqoobira ragisiisammora xaaroommo baatto haa're masseemmo'ne; umi'nera iqqa asse eemmo'ne; ani Kaaliiqaati› yiino yite kulinsa» yii.

⁹Museno konne coye Israeelete kulinsa; insa kayinni borojjimmate gadadi hiiqqinonsa daafira, yiinota dimacciishshitino.

¹⁰Kaaliiqi qole Musera,

¹¹«Israeelete manna gobbasinni ha'rissanno gede, marte Gibitsete mootera kulisi» yii.

¹²Muse kayinni, «Israeelete manni nafa yoommota dimacciishshinoena, Feriooni macciishshannoe? Afittonte gede ani coye biifisi're diafeemmoho» yee dawari.

¹³Kunni garinni, Kaaliiqi Musenna Aarooni, «Israeele Gibitsetenni haadhine fushshitinanni gede hajajoommota Israeeletenna Gibitsete mootera kullensa» yiino.

¹⁴Bayiru Yaiqoobi beetti Roobeelira Hanooki, Faalu, Hetsirooninna Kariimi yinanniri 4 labballi ooso noosi. Insano su'mi su'minsa garinni Roobeeli ga're annuwaati.

¹⁵Simioonira Yimueeli, Yamiini, Ohaadi, Yakiini, Tsohaarinna Kana"aanitte iltinosihu Shauuli yinannihu ledo 6 labballi ooso noosi. Insano su'mi su'minsa garinni Simiooni ga're annuwaati.

¹⁶Leewira Gershooni, Qehaatinna Meraari yinanniri 3 labballi ooso noosi; insano su'mi su'minsa garinni Leewi ga're annuwaati; Leewi 137 diro hee'rino.

¹⁷Gershoonira Libinanna Shimi"i yinanniri mininsara umo ikkitinori 2 labballi ooso noosi.

¹⁸Qehaatira Amiraami, Yitsihaari, Kebirooninna Uzieeli yinanniri 4 labballi ooso noosi; Qehaati 133 diro hee'rino.

¹⁹Meraarira Mahilinna Muushi yinanniri 2 labballi ooso noosi; ilamansa garinni kurino Leewi sirchooti.

²⁰Amiraami Yokebiidi yinannita annisi rodoo adhino; iseno Aarooninna Muse iltu. Amiraami 137 diro hee'rino.

²¹Yitsihaarira Qorahi, Nefeeginna Ziikiri yinanniri 3 labballi ooso noosi.

²²Uzieelirano Mishaeeli, Eltsafaaninna Sitiri yinanniri 3 labballi ooso noosi.

²³Aarooni Ne"esooni rodoo Aminaadaabi beetto Elisheba adhi; iseno Naadaabi, Abihu, Aliaazaarinna Itaamaari yinannire iltu.

²⁴Qorahira Asiiri, Elqaananna Abiyaasaafi yinanni ooso noosi; insa Qorahi sirchooti.

²⁵Aarooni beetti Aliaazaari Putieeli beetto adhino; iseno Finihaasi yinanniha iltusi; kuri baalunku Leewi ga'rera annuwatenna umiidireeti.

²⁶Kaaliiqi, «Israeelete manna ga're ga'rensa garinni Gibitsete gobbanni haadhine fushshe» yiinonsari Aarooninna Muse insaati.

²⁷«Israeelete manna ha'rona aguri» yite Gibitsete moote ledo hasaabbinorino insaati.

²⁸Muse Gibitsete gobbara hee'reenna Kaaliiqi,

²⁹«Ani Kaaliiqaati; kuleemmohere baala Gibitsete mootera Ferioonira kuli» yiisi.

³⁰Muse kayinni daware, «Ani coye biifisi're diafeemmohona, Feriooni macciishshannoeni?» yii.