Read Sidama_Qullaawa _Maxaafa IYYOOBI 14 Bible Online

IYYOOBI 14 - Sidama_Qullaawa _Maxaafa bible

IYYOOBI 14

¹«Mannu heeshsho haranchote; iseno qarru wo'minote.

²Mannu rahe lophe daraarchu gede giggilanno; caalu gedeno rahe sa"anno.

³Ane togoohu aana illekki mayira woratto? Albikkira yoote mayira shiqishattoe?

⁴Battaawinori giddonni battaawinokkire, fushshara dandaannohu nooni?

⁵Mannu diri haranchoho; hee'ranno dirono albanni hirqite agurootto. Sa"annokki gede heeshshosira gawalo worootto.

⁶Kiranyu gede barrisi wo'ma geeshsha agurisi; fooliishshi'rona aanisinni illekki hooli.

⁷«Galagale ciirara dandaanno daafira, murroonni haqqichira nafa hexxo noosi.

⁸Rumushshisi baattote giddo akkalironna, cifichuno baattote aana mooliro,

⁹wayi foole afi'ranni hee'renni, haaro ciiro fushshanno.

¹⁰Mannu kayinni, waammate giddo diriire gatanno; lubbosino fultanno; isirino hakkeeshsha calla ikke gatanno.

¹¹Foorare goofanno garbi gedenna, moolanno xashshi gede,

¹²mannu reyihu gedensaanni, gordu sa"a geeshsha dika"anno; goxanotennino baqqi diyaanno.

¹³«Jeennaatu giddo daheessite, hanqikki sa"a geeshsha maaxxe, hirqootto yanna iillitanno woyite, qaagoottoero woyyanno!

¹⁴Halaalinta mannu reyotenni kae, lubbotenni hee'rannoni? tirannoehu daa geeshsha cincatenni agadheemmo.

¹⁵Hatte yannara, woshshattoeha ikkoommero, ani yee yeemmo; atino kalaqamakki ikkoommoha ane la"ate halchatto.

¹⁶Hakkawoyite, qaafo'ya la"atto; ikkirono, cubbo'ya dikiiratto.

¹⁷Sao'ya haadhe hoolatto; cubbo'yano co'o assite hunatto.

¹⁸«Ikkollana, ilaalla ubbe cancanantannohunna, kinna darginni ho'litanno yanna dagganno.

¹⁹Wayi kinna hoshooshannonte gedenna, lolahu bushsha adhe ha'rannonte gede, atino, mannunnita heeshshote hexxo hatto assite hunatto.

²⁰Manna qeelte hegere geeshsha hunatto; hunattosi woyite reyo albasi soorritanno.

²¹Oososi ayirrinye afidhurono diafanno; sholliturono dikullannisi.

²²Umisi dhibbi callu leellannosita ikkinnina, wolunnire diqaaganno; umisi daafiralla wi'lanno» yii.